ەۋروپا رەسەيگە جىلى قاباق تانىتتى

ەۋرووداق سىرتقى ساياساتتىڭ نەگىزگى ماسەلەلەرى بويىنشا رەسەيمەن ديالوگتى كەڭەيتكىسى كەلەدى. بۇل ەۋروپالىق ەلدەر مەن رەسەي قارىم قاتىناسىنىڭ ءبىرشاما وڭالا باستاعانىنىڭ العاشقى كورىنىسى دەپ باعالانىپ وتىر. ال مۇنىڭ كەرىسىنشە ەو اقش-تىڭ سىرتقى ساياساتىنا دەگەن الاڭداۋشىلىعى بارعان سايىن كۇشەيىپ كەلەدى. بۇل تۋرالى “The Wall Street Journal” باسىلىمى حابارلاعان بولاتىن ەدى.

ەو سىرتقى ساياسات ءبولىمىنىڭ باسشىسى فەدەريكو موگەريني (Federica Mogherini) وسى تاقىرىپتى تالقىلاۋ ءۇشىن وسى اپتانىڭ باسىندا ماسكەۋدە ساپاردا بولىپ، رەسەي سىرتقى ىستەر ءمينيسترى سەرگەي لاۆروۆپەن كەزدەستى. بۇل 2014 جىلدىڭ جىل باسىندا ۋكراينا داعدارىسى تۋىلعاننان بەرى قاراي ەو جوعارى لاۋازىمدىسىنىڭ العاش رەت كرەملدىڭ نەگىزگى وكىلدەرىمەن كەزدەسۋى.

ەكى تاراپتىڭ اراسىنداعى تىعىز بايلانىسقا قىرىم جانە ۋكراينانىڭ شىعىسىنداعى ماسەلەلەردەن كەيىن ءۇزىلىس جاريالاندى. سودان بەرى ەۋروپالىق وداق قارىم-قاتىناس مۇمكىندىگىن قايتا رەتتەۋگە تىرىسىپ كەلدى. ەكى جاقتىڭ قاتىناسى ۇزىلۋدەن بۇرىن، ەو-رەسەي ەكى جاقتىڭ كەزەكتى ءسامميتى وتكەن بولاتىن. وندا ەنەرگەتيكا جانە ساۋدا-ساتتىق جاقتارىنداعى ورتاق سىرتقى ساياساتتى قاراستىرىپ ەدى.

كەيبىر ەو-عا مۇشە ەلدەر رەسەيمەن قارىم-قاتىناستى جاقسارتۋعا شاقىردى. دەگەنمەن كەي ەۋروپالىق ەلدەر رەسەيگە كۇشتى ەكونوميكالىق سانكتسيا سالۋدى قولدايدى. موگەرينيدىڭ اينۋىنا قاراعاندا قازىر ەكى جاقتا تىرەسۋدى توقتاتىپ، ەكى جاقتىڭ دا ەكونوميكالىق مۇددەلەرىن ەسكەرەتىن، تىڭ سەرپىلىستىڭ جولدارىن قاراستىراتىن كەز ەكەن.

The Qazaq Times