9 قاراشا كەشكىسىن جەرگىلىكتى باسىلىمدار مەن تەلەگرام كانالدار دەرەككوزدەرىنە سىلتەمە جاساپ، بۇرىنعى ەكونوميكا ءمينيسترى قۋاندىق بىشىمباەۆتىڭ ۇستالعانىن حابارلادى. ول ايەلىن ءولىمشى ەتىپ سابادى دەگەن كۇدىككە ىلىنگەن. ايەلى اۋىر سوققىدان كوز جۇمعان. بۇل تۋرالى ازاتتىق راديوسى جازدى.

"جەدەل جاردەم كەلگەندە وتىزدار شاماسىنداعى ايەل كوز جۇمعان. دارىگەرلەردىڭ سوزىنشە، ونى استاناداعى "باۋ" مەيرامحاناسىندا كۇيەۋى سوققىعا شىققان. سول جەردە 1980 جىلى 11 ساۋىردە تۋعان قۋاندىق بىشىمباەۆ ۋاليحانۇلى ۇستالدى. ول 1992 جىلى 15 مامىردا تۋعان سالتانات نۇكەنوۆا امانگەلدىقىزىن پىشاقتاعان. ايەل ادام پىشاقتان كوز جۇمعان" دەپ جازدى Ulysmedia پوليتسياعا سىلتەمە جاساپ.

جەرگىلىكتى باسقا باسىلىمدار بىشىمباەۆقا ءوز ايەلىنىڭ ولىمىنە سەبەپكەر بولدى دەپ كۇدىككە ىلىنگەنىن جازىپ جاتىر.

ءىىم Tengrinews سايتىنا استاناداعى مەيرامحانانىڭ بىرىندە كەلۋشىلەر اراسىندا جانجال شىعىپ، ءبىر ايەل جاراقاتتان كوز جۇمعانىن ايتقان. كۇدىكتى ۇستالعان، بىراق مينيسترلىك ونىڭ كىم ەكەنىن ايتپاعان.

بۇرىنعى ەكونوميكا ءمينيسترى قۋاندىق بىشىمباەۆ 2018 جىلى ناۋرىزدا جەمقورلىق ايىبىمەن 10 جىلعا سوتتالعان. تەرگەۋ ونى "بايتەرەك" ۇلتتىق حولدينگىن باسقارىپ تۇرعاندا قىزىلورداداعى اينەك زاۋىتىنا بولىنگەن قارجىدان ءبىر ميلليارد تەڭگە جىمقىرعان دەپ ايىپتاعان. 2018 جىلى قازاندا ول شارتتى جازامەن بوساپ شىققان.

كەيىنگى ۋاقىتتا بىشىمباەۆ ۇكىمەتتىڭ ەلدەگى ەكونوميكالىق شەشىمدەرىنە پىكىر ءبىلدىرىپ ءبىردى-ەكىلى باسىلىم بەتتەرىنەن كورىنگەن ەدى.

ول جەمقورلىق ايىبىنا ىلىنبەي تۇرىپ، ياعني، 2017 جىلعا دەيىن مەملەكەتتىك اپپاراتتا لاۋازىمدى قىزمەتتەر اتقاردى. ەلدىڭ سول ۋاقىتتاعى پرەزيدەنتى نۇرسۇلتان نازارباەۆتىڭ كومەكشىسى دە بولعان. "بولاشاق" باعدارلاماسىمەن شەتەلدە وقىعان.