9 قاراشادا قازاقستان جانە رەسەي باسشىلارىنىڭ قاتىسۋىمەن وتكەن وڭىرارالىق فورۋم بارىسىندا تاراپتار ءتيىستى قۇجاتقا قول قويدى. وعان سايكەس، رەسەي قازاقستاننىڭ ءۇش قالاسىنا – وسكەمەن، كوكشەتاي جانە سەمەيگە جىلۋ ەلەكتر ستانتسياسىن سالىپ بەرمەك.

بىلتىر قاراشا سوڭىندا ەكىباستۇز جىلۋ ەلەكتر ستانتسياسىندا ءىرى اپات بولىپ، سودان كەيىن ەلدە جىلۋ جەلىلەرىنىڭ ابدەن توزعاندىعى جانە ينفراقۇرىلىمداردى جاڭالاۋ ءۇشىن تاريفتەردى كوتەرۋ قاجەتتىگى ايتىلعان.

بيىل ۇكىمەت جىلۋ ەنەرگەتيكا نىساندارىنا رەسپۋبليكالىق جانە جەرگىلىكتى بيۋدجەتتەن 37 ملرد تەڭگە بولگەن.

9 قاراشادا قازاقستانعا رەسمي ساپارمەن رەسەي باسشىسى ۆلاديمير پۋتين كەلگەن. ساراپشىلار باتىس ەلدەرىنىڭ ۇزاق ۋاقىت بويى رەسەيدىڭ ىقپال ەتۋ ايماعى سانالىپ كەلگەن ورتالىق ازياعا قىزىعۋشىلىعى ارتقان شاقتا رەسەي باسشىسىنىڭ قازاقستانعا كەلگەنىن اتاپ ءوتىپ وتىر.

بەيسەنبى كۇنى تۇستەن كەيىن اقوردادا ەكى ەل باسشىلارى 19-شى وڭىرارالىق ىنتىماقتاستىق فورۋمىن اشقان. وعان توقاەۆ پەن پۋتين ۆيدەوبايلانىس ارقىلى قاتىستى.

اقپاراتقا قاراعاندا، شارادا اۋىل شارۋاشىلىعى جانە ازىق-تۇلىك قاۋىپسىزدىگى ماسەلەلەرى تالقىلانعان.

شارا كەزىندە قازاقستان ساۋدا جانە ينتەگراتسيا ءمينيسترى سەرىك جۇمانعارين فورۋمعا قاتىسۋشىلارعا رەسەيلىك كومپانيالار قانت زاۋىتتارىنا يە بولىپ، قازاقستاننىڭ وڭتۇستىگىندە جىلىجاي كەشەندەرىن اشىپ جاتقانىن ايتتى.