الماتىدا ءبىر توپ رەجيسسەر ءباسپاسوز ءماسليحاتىن وتكىزدى. ولار 13 مامىردا «ۇلتتىق كينونى قولداۋ ورتالىعى» عيماراتىنىڭ الدىندا ميتينگكە شىعىپ، ورتالىقتىڭ جوبالاردى ىرىكتەۋ جۇمىسىنا نارازىلىقتارىن ءبىلدىرىپ، پرەزيدەنت قاسىم-جومارت توقاەۆقا ۇندەۋ جاساعان. كەيىننەن قارسىلىق اكتسياسىنا قاتىسقان 8 ادامنىڭ ۇستىنەن اكىمشىلىك ءىس قوزعالعان.

17 مامىردا ۇلتتىق ءباسپاسوز كلۋبىندا وتكەن بريفينگكە رەجيسسەر ازامات شارعىن، اداي ابەلدينوۆ، ارداگەر سانتىباەۆ، عالي مىرزاشەۆ، رۇستەم ءابدىراش جانە ونەرتانۋشى ەرلان تولەۋتاي قاتىستى.

ەرلان تولەۋتاي سوزىنشە، مينيتنگكە شىققانداردى اكىمشىلىك جاۋاپقا تارتۋ جاسالىپ جاتقان قىسىمنىڭ باسى عانا. الداعى ۋاقىتتا مينيسترلىك تاراپىنان رەپرەسسيا باستالۋى مۇمكىن.

– بۇل مەن ءۇشىن ۇلكەن قورلىق. ويتكەنى مەنىڭ جازىعىم جوق. مەن ءوزىمنىڭ كونستيتۋتسيالىق قۇقىعىمدى پايدالانىپ، كينودا بولىپ جاتقان ادىلەتسىزدىككە ءوزىمنىڭ ازاماتتىق پىكىرىمدى بىلدىرگىم كەلدى. سول ءۇشىن مەنى وسىنداي جاۋاپقا تارتىپ جاتىر. بۇل قۋعىننىڭ باسى. بۇدان كەيىن ءبىز مينيسترلىك تاراپىنان رەپرەسسيا بولاتىنىن كۇتەمىز، – دەدى ول.

ەرلان تولەۋتاي قازاق كينوسى تاريحىندا رەجيسسەرلار مەن ستسەناريستەردى سوتقا سۇيرەۋ ەش ۋاقىتتا بولعان جوق دەيدى. ونىڭ سوزىنشە، «قور ۇلتتىق ونەرى دە قور بولادى».

– قازاق كينوسىنىڭ 70 جىلعا جۋىق تاريحى بار. بۇنداي جاعداي ءبىرىنشى رەت بولىپ تۇر. رەجيسسەرلاردى قۋدالاۋ، ستسەناريستەرگە ايىپپۇل تولەتۋ بولعان ەمەس. پوليتسيا دىرىلداتىپ سۇيرەتىپ الىپ بارۋ، سوتتاۋ بولعان جوق. ءبىزدى ونلاين سوتتاپ جاتىر. پروكۋرور بىزبەن سويلەسكىسى دە كەلمەيدى. ءبىز ايىپپۇلدى تولەيمىز، زاڭعا باعىنامىز، – دەدى تولەۋتاي.

16 مامىردا ارداگەر سانتىباەۆ، اداي ابەلدينوۆ، نۇركەلدى سادىعۇلوۆ، عالي مىرزاشەۆتىڭ ۇستىنەن «بەيبىت جيىن ءتارتىبىن بۇزۋ» بابى بويىنشا اكىمشىلىك ءىس قوزعالىپ، 70 مىڭنان 120 مىڭ تەڭگەگە دەيىن ايىپپۇل سالىنعان.

بۇگىن ەرلان تولەۋتاي، ازامات شارعىن، ەلزات ەسكەندىر جانە ارىبيبەك ءورالتايدىڭ ۇستىنەن ءدال وسىنداي سوت بولادى.

ازامات شارعىن ماسەلە شەشىلمەيتىن بولسا اقوردانىڭ الدىنا جينالاتىندارىن ايتتى. ونىڭ سوزىنشە، جاسالىپ جاتقان قىسىمدار وعان كەدەرگى بولا المايدى.

– ءبىز بۇنداي قىسىمعا توقتامايمىز. ماسەلەمىز شەشىلمەيتىن بولسا، تالاپتارىمىز ورىندالماسا، وندا ءبىز كەلەسى كەزەكتە اقوردانىڭ، مينيسترلىكتىڭ الدىنا ميتينگكە جينالامىز. ءبىزدى ايىپپۇلمەن، 15 تاۋلىككە قاماۋمەن توقتاتا المايدى، – دەدى ول.

اداي ابەلدينوۆ وسى ۋاقىتقا دەيىن مادەنيەت مينيسترلىگىنە قانشاما حات جازىلعانىن، بىراق ءالى كۇنگە دەيىن ەشقانداي جاۋاپ الماعاندارىن ايتتى.

– مادەنيەت ءمينيسترلى اسحات ورالوۆ ءالى كۇنگە دەيىن ءۇنسىز. كينو سالاسى بويىنشا ۆيتسە-مينيستر نۇرعيسا تاۋەشوۆ تە ءالى ەشقانداي پىكىر بىلدىرگەن جوق. بىلايشا ايتقاندا، مادەنيەت مينيسترلىگى بۇل ماسەلە بويىنشا ءالى ەشقانداي رەسمي پىكىر بىلدىرگەن جوق. قانشاما حات جازىلدى. بىراق ءالى بىردە-ءبىر جاۋاپ العان جوقپىز، – دەدى ابەلدينوۆ.

ونىڭ ايتۋىنشا، «ۇلتتىق كينونى قولداۋ ورتالىعىندا» بارلىق شەشىمدى ورتالىق باسشىلارى ەسەتجان قوسۋباەۆ پەن ونىڭ ورىنباسارى باۋىرجان شۇكەنوۆ شىعارادى. بىراق ولارعا قارسى ەشكىم، ەشقانداي رەاكتسيا بىلدىرمەگەن.

بۇعان دەيىن باق-تا ءبىر توپ رەجيسسەر «ۇلتتىق كينونى قولداۋ ورتالىعى» جوبالاردى ىرىكتەۋ كەزىندە 153 جوبانى وتكىزبەي تاستاعانى جونىندە اقپارات تاراعان. سول ۋاقىتتا رەجيسسەرلار ىرىكتەۋ جۇمىستارى ادىلەتسىز وتكەنىن ايتقان.