Almatıda bir top rejisser baspasöz mäslihatın ötkizdi. Olar 13 mamırda «Wlttıq kinonı qoldau ortalığı» ğimaratınıñ aldında mitingke şığıp, ortalıqtıñ jobalardı irikteu jwmısına narazılıqtarın bildirip, prezident Qasım-Jomart Toqaevqa ündeu jasağan. Keyinnen qarsılıq akciyasına qatısqan 8 adamnıñ üstinen äkimşilik is qozğalğan.

17 mamırda Wlttıq baspasöz klubında ötken brifingke rejisser Azamat Şarğın, Aday Abeldinov, Ardager Santıbaev, Ğali Mırzaşev, Rüstem Äbdiraş jäne önertanuşı Erlan Töleutay qatıstı.

Erlan Töleutay sözinşe, minitngke şıqqandardı äkimşilik jauapqa tartu jasalıp jatqan qısımnıñ bası ğana. Aldağı uaqıtta ministrlik tarapınan repressiya bastaluı mümkin.

– Bwl men üşin ülken qorlıq. Öytkeni meniñ jazığım joq. Men özimniñ konstituciyalıq qwqığımdı paydalanıp, kinoda bolıp jatqan ädiletsizdikke özimniñ azamattıq pikirimdi bildirgim keldi. Sol üşin meni osınday jauapqa tartıp jatır. Bwl quğınnıñ bası. Bwdan keyin biz ministrlik tarapınan repressiya bolatının kütemiz, – dedi ol.

Erlan Töleutay qazaq kinosı tarihında rejisserlar men scenariysterdi sotqa süyreu eş uaqıtta bolğan joq deydi. Onıñ sözinşe, «qor wlttıq öneri de qor boladı».

– Qazaq kinosınıñ 70 jılğa juıq tarihı bar. Bwnday jağday birinşi ret bolıp twr. Rejisserlardı qudalau, scenariysterge ayıppwl töletu bolğan emes. Policiya dırıldatıp süyretip alıp baru, sottau bolğan joq. Bizdi onlayn sottap jatır. Prokuror bizben söyleskisi de kelmeydi. Biz ayıppwldı töleymiz, zañğa bağınamız, – dedi Töleutay.

16 mamırda Ardager Santıbaev, Aday Abeldinov, Nwrkeldi Sadığwlov, Ğali Mırzaşevtıñ üstinen «beybit jiın tärtibin bwzu» babı boyınşa äkimşilik is qozğalıp, 70 mıñnan 120 mıñ teñgege deyin ayıppwl salınğan.

Bügin Erlan Töleutay, Azamat Şarğın, Elzat Eskendir jäne Äribibek Öraltaydıñ üstinen däl osınday sot boladı.

Azamat Şarğın mäsele şeşilmeytin bolsa Aqordanıñ aldına jinalatındarın ayttı. Onıñ sözinşe, jasalıp jatqan qısımdar oğan kedergi bola almaydı.

– Biz bwnday qısımğa toqtamaymız. Mäselemiz şeşilmeytin bolsa, talaptarımız orındalmasa, onda biz kelesi kezekte Aqordanıñ, ministrliktiñ aldına mitingke jinalamız. Bizdi ayıppwlmen, 1täulikke qamaumen toqtata almaydı,  dedi ol.

Aday Abeldinov osı uaqıtqa deyin mädeniet ministrligine qanşama hat jazılğanın, biraq äli künge deyin eşqanday jauap almağandarın ayttı.

– Mädeniet ministrli Ashat Oralov äli künge deyin ünsiz. Kino salası boyınşa vice-ministr Nwrğisa Täueşov te äli eşqanday pikir bildirgen joq. Bılayşa aytqanda, mädeniet ministrligi bwl mäsele boyınşa äli eşqanday resmi pikir bildirgen joq. Qanşama hat jazıldı. Biraq äli birde-bir jauap alğan joqpız, – dedi Abeldinov.

Onıñ aytuınşa, «Wlttıq kinonı qoldau ortalığında» barlıq şeşimdi ortalıq basşıları Esetjan Qosubaev pen onıñ orınbasarı Bauırjan Şükenov şığaradı. Biraq olarğa qarsı eşkim, eşqanday reakciya bildirmegen.

Bwğan deyin BAQ-ta bir top rejisser «Wlttıq kinonı qoldau ortalığı» jobalardı irikteu kezinde 153 jobanı ötkizbey tastağanı jöninde aqparat tarağan. Sol uaqıtta rejisserlar irikteu jwmıstarı ädiletsiz ötkenin aytqan.