ۋكراينا پرەزيدەنتى ۆلاديمير زەلەنسكي گەرمانياعا ساپارلاپ كەلدى. بەرليندە ول گەرمانيا باسشىسى فرانك-ۆالتەر شتاينمايەرمەن كەزدەستى. بۇل تۋرالى ازاتتىق راديوسى جازدى.

"ۋكراينانىڭ قازىرگى زامانعى تاريحىنداعى ەڭ كۇردەلى كەزەڭدە گەرمانيا ءوزىنىڭ ناعىز دوس ءارى سەنىمدى وداقتاسى ەكەنىن دالەلدەدى. دەموكراتيا قۇندىلىقتارى مەن ەركىندىگىن قورعاۋ بويىنشا كۇرەستە ۋكراين حالقىن قولداۋدان اينىمايدى. ءبارىمىز بىرگە جەڭەمىز جانە ەۋروپاعا بەيبىتشىلىكتى قايتارامىز" دەپ جازدى زەلەنسكي پرەزيدەنت رەزيدەنتسياسىنداعى قۇرمەتتى قوناقتارعا ارنالعان كىتاپتا.

كەيىن ۋكراينا باسشىسى گەرمانيانىڭ فەدەرالدىق كانتسلەرى ولاف شولتسپەن كەلىسسوز جۇرگىزدى.

زەلەنسكيدىڭ ساپارىنا بايلانىستى بەرليندە قاۋىپسىزدىك شارالارى كۇشەيىپ، قوزعالىس شەكتەلدى.

ۋكراينا باسشىسى بەرلينگە جەكسەنبىگە قاراعان ءتۇنى يتاليادان ۇشىپ كەلدى. ونىڭ ۇشاعىنا گەرمانيانىڭ اۋە قورعانىس كۇشتەرى ىلەسىپ ءجۇردى.

"بەرلين. قارۋ. ءىرى پاكەت. اۋە شابۋىلىنان قورعايتىن جۇيە. رەكونسترۋكتسيا. ەو. ناتو. قاۋىپسىزدىك" دەپ جازدى زەلەنسكي گەرمانياعا ۇشىپ كەلگەننەن كەيىن Twitter-دەگى پاراقشاسىندا.

زەلەنسكي ء"ىرى پاكەت" دەپ بۇعان دەيىن گەرمانيا بيلىگىنىڭ ۋكرايناعا شامامەن 2,7 ملرد ەۋرو (3 ملرد دوللار) كولەمىندە بولگەن اسكەري كومەگىن ايتىپ وتىر. بۇل رەسەي باسقىنشىلىعى باستالعالى بەرگى ەڭ ءىرى كومەك.

زەلەنسكي مەن شولتس بەرليننەن كەيىن گەرمانيانىڭ احەن قالاسىنا بارادى. ول جاقتا ۋكراينا پرەزيدەنتىنە ەۋروپاداعى بىرلىگىنە ۇلەس قوسقانى ءۇشىن ۇلى كارل اتىنداعى سىيلىق تاپسىرىلماق.

ءبىر كۇن بۇرىن ۋكراينا پرەزيدەنتى يتاليادا وسى ەل باسشىلىعى جانە پاپا فرانتسيسكپەن كەزدەسكەن.