الماتى اكىمشىلىك سوتى 4 مامىردا بەلسەندى ءالنۇر ىلياشەۆتى "سوت ۇكىمىن ورىندامادى" دەپ بەس تاۋلىككە قامادى. بۇعان ىلياشەۆتىڭ "حالىق پارلامەنتىنىڭ" جيىنىنا قاتىسۋى سەبەپ بولعان.

سوت ىلياشەۆتى "قوعامدىق بىرلەستىكتەر قىزمەتىنە قاتىسۋ قۇقىعىنان ايىرىلعانىن بىلە تۇرا", تىركەلمەگەن "حالىق پارلامەنتىنىڭ" 1 ساۋىردەگى جيىنىنا قاتىسقانىنا بايلانىستى ايىپتاپ وتىر. سوت قاۋلىسىنداعى مالىمەتتە، سوت وتىرىسىندا بەلسەندى "زاڭ بۇزعانىن مويىنداپ", سوتتان وزىنە اكىمشىلىك جازا تاعايىنداۋدى سۇراعان.

بيلىكتى سىناعان جازباسىنان كەيىن ىلياشەۆ 2020 جىلى 22 ماۋسىمدا "جالعان اقپارات تاراتتى" دەپ ايىپتالىپ ءۇش جىلعا باس بوستاندىعى شەكتەلگەن. ول بۇنىڭ ساياسي قۋدالاۋ ەكەنىن ايتىپ، تاعىلعان ايىپپەن كەلىسپەگەن.

19 ناۋرىزداعى سايلاۋدىڭ ناتيجەسىنە كەلىسپەگەن "حالىق پارلامەنتىنىڭ" ميتينگىسىنەن كەيىن بىرقاتار بەلسەندى اكىمشىلىك جاۋاپقا تارتىلعان بولاتىن.

ءالنۇر ىلياشەۆ تا سەنات سايلاۋىنا كانديدات رەتىندە تىركەلۋگە تالپىنعانىمەن ودان ەش ناتيجە شىقپاعان. اۋماقتىق سايلاۋ كوميسسياسى ونى "سوت مەرزىمىن ءالى وتەپ بىتپەدى" دەپ تىرگەۋدەن باس تارتقان.  وزدەرىن كانديدات رەتىندە تىركەمەگەن سايلاۋ كوميسسيالارىن سوتقا بەرگەن بەلسەندىلەردىڭ ارىزىن سوت قاناعاتتاندىرماي شەشىم وزگەرىسسىز قالعان بولاتىن.