قازاقستان رەسەي باسشىسى ۆلاديمير ءپۋتيندى تۇتقىنداۋعا وردەر بەرگەن حالىقارالىق قىلمىستىق سوتتىڭ شەشىمىن ورىندامايدى. قازاقستان سىرتقى ىستەر مينيسترلىگىنىڭ 5 ءساۋىر كۇنگى حابارلاماسىنان وسىنى اڭعارۋعا بولادى، – دەپ جازدى ورتالىق ازيا جاڭالىقتار قىزمەتى.

"قازاقستان گااگاداعى حالىقارالىق قىلمىستىق سوتتىڭ قۇرىلتاي قۇجاتى – ريم ستاتۋتىنا قاتىسۋشى بولىپ تابىلمايدى. تيىسىنشە، بۇل ستاتۋتتىڭ قازاقستانعا قولدانىسى تارالمايدى جانە ءبىزدىڭ مەملەكەتىمىز ول بويىنشا ەشقانداي مىندەتتەمە المايدى" دەدى قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ ازاتتىققا جىبەرگەن رەسمي جاۋابىندا.

"ۋكراينانىڭ رەسەي باسىپ العان اۋماعىنان بالالاردى زاڭسىز تاسىمالداعانى ءۇشىن" حالىقارالىق قىلمىستىق سوت (گااگا سوتى) ناۋرىزدىڭ ورتاسىندا رەسەي پرەزيدەنتى ۆلاديمير ءپۋتيندى تۇتقىنداۋعا وردەر بەرگەن. وسىعان ۇقساس وردەر رەسەيدەگى بالا قۇقىعىن قورعاۋ جونىندەگى ومبۋدسمەن ماريا لۆوۆا-بەلوۆاعا دا بەرىلدى.

بۇرىنعى سوۆەت رەسپۋبليكالارى اراسىندا ستاتۋتتى بالتىق ەلدەرى، گرۋزيا، تاجىكستان راتيفيكاتسيالاعان. جۋىردا ارمەنيا كونستيتۋتسيالىق سوتى ريم ستاتۋتى ەلدىڭ كونستيتۋتسياسىنا قايشى كەلمەيدى دەگەن قاۋلى شىعارعان. ريم ستاتۋتىن راتيفيكاتسيالاعان مەملەكەتتەردىڭ بيلىگى پۋتين سول ەلدەردىڭ بىرىنە بارعان جاعدايدا ونى تۇتقىنداۋعا مىندەتتى.

دەگەنمەن بۇعان دەيىن رەسمي ەرەۆان ءپۋتيندى تۇتقىندامايتىنىن مەڭزەپ, بۇل تۇرعىدا ەرەۆان ماسكەۋمەن كەلىسىم جاساۋى مۇمكىن ەكەنىن دە جوققا شىعارماعان. ەرەۆاننىڭ تۇسىندىرۋىنشە، ارمەنيا ازەربايجاننىڭ تاۋلى قاراباقتاعى "اسكەري قىلمىسىنا" بايلانىستى حالىقارالىق قىلمىستىق سوتقا شاعىم تۇسىرگىسى كەلەدى.

بۇعان دەيىن پۋتين قازاقستانعا وسى كۇزدە ساپارلاپ كەلەتىنى حابارلانعان ەدى.

رەسەيگە تاۋەلدى قازاقستان رەسەيدىڭ ۋكرايناعا باسقىنشىلىعىن اشىق ايىپتاعان جوق. بىراق ۋكراينانىڭ اۋماقتىق تۇتاستىعىن قولدايتىنىن، ۋكراينانىڭ شىعىسىنداعى سەپاراتيستىك قۇرىلىمداردى مويىندامايتىنىن ايتقان. بۇۇ-دا رەسەي باسقىنشىلىعىن ايىپتاعان قارارلارعا داۋىس بەرۋ كەزىندە قازاقستان كوپ جاعدايدا قالىس قالادى.