قاڭتار قىرعىنى سوتى. بۇگىنگە دەيىن وق اتتى دەپ جۇرگەن ادام باسقا بولىپ شىقتى

قاندى قاڭتار قىرعىنىنا بايلانىستى ايىپتى سانالىپ قاماۋدا وتىرعان 9 ازاماتتىڭ سوتىنا سۋديا قادىربەك نۇرجان باق وكىلدەرىن كىرگىزبەدى.

4 ساۋىردە تاراز قالاسىنداعى ءىىم قىلمىستىق-اتقارۋ جۇيەسى كوميتەتىنىڭ №67 مەكەمەسىندە ءوتىپ جاتقان قاندى قاڭتار قىرعىنىنا بايلانىستى سوتتا سۋديا قادىربەك نۇرجان جۋرناليستەردى سوت زالىنا كىرگىزبەدى. سۋديا اشىق سوتقا باق وكىلدەرىن نەگە جىبەرمەگەنىن تۇسىندىرمەدى. تەك وبل سوتتىڭ عيماراتىنداعى ەكراننان عانا باقىلاي الاسىزدار دەدى.

سوت باستالاردىڭ الدىندا سوت حاتشىسى دا، سۋديا دا پروتسەسس باستالعان كەزدە شاقىراتىندارىن ايتىپ وزدەرى كىرىپ كەتكەن.

جۋرناليستەر سوت زالىنا وتكىزۋدەن باس تارتقان كەزەكشىگە سوت وزدەرىن كىرگىزۋ تۋرالى وتىنىشتەرىن سۋدياعا جەتكىزۋدى ءوتىندى.

– شىقپايمىز، ەگەر سپيسوكتا جوق پا، زناچيت جوق! – دەپ ايتتى دەگەن جاۋاپ جەتكىزدى كەزەكشى.

– بىزگە سپيسوك بەردى، "مىنە وسى سپيسوكتان باسقا ادام كىرۋشى بولماسىن!" دەدى، بولدى. ءبىز وسىمەن جۇمىس جاسايمىز. ءبىزدىڭ جۇمىس وسى. ءبىزىڭ پروتسەسسكە دىم قاتىسىمىز جوق. كىرگىزۋ-شىعارۋ بولدى، ىشتە نە بولىپ جاتىر، قالاي بولىپ جاتىر ءبىزدىڭ قاتىسىمىز جوق! –دەپ سوت زالىنا جىبەرۋدەن باس تارتتى.

پروتسەس اياقتالعانىن كۇتىپ، بۇدان بۇرىنعى ەكى رەتكى وتىرىستا ءوزى باستاپ كىرگەن سوت حاتشىسى قانات مىرزادان نەگە اشىق سوتقا باق-ىن قاتىستىرماعانىن سۇرادىق.

– اشىق سوتقا كىرگىزبە، اناۋ-مىناۋ دەپ مەن ايتقان جوقپىن. مەن جاقتان ەشتەڭە جوق.  سوتتالۋشىلاردىڭ قورعاۋشىلارى «سەن كىرگىزبەي جاتسىڭ» دەپ ايتىپ جاتىر. مەنىڭ وعان قاتىسىم جوق. وبلىستىق سوت عيماراتى جاعىنا ونلاين جاساپ قويعان. سول جاققا بارىپ، كورىپ وتىرۋعا بولادى. مەكەمە باسشىلىعى «كىرگىزىپ جاتىرسىڭدار، (سوتتالۋشىلارمەن – رەد) جولىقتىرىپ جاتىرسىڭدار» دەپ، ەرتەڭ بىزگە اڭگىمە ايتادى، – دەدى حاتشى.

ال، سۋديا قادىربەك نۇرجان جۋرناليستەر ءۇشىن سوتتى تەك وبل سوت عيماراتىنداعى ەكراننان عانا كورە الاتىندىعىن ايتىپ قىسقا قايىردى.

قاماۋدا جاتقان ازاماتتاردىڭ جاقىندارى ىشكە جۋرناليستەردى جىبەرمەۋدىڭ سەبەبىن بۇدان بۇرىنعى پروتسەس الدىنداعى قاماۋداعى ازاماتتاردىڭ ايتقان جاۋاپتارىنا بايلانىستى قۇزەرەتتى ورگاندار وزدەرىنىڭ زاڭسىزدىقتارىن جاسىرىپ-جابۋ دەپ سانايدى.

قىلمىستىق كودەكستىڭ 272-بابىنىڭ 1,2,3-بولىگىمەن ايىپتالىپ جاتقان نۇراحان ماحاتوۆتىڭ جۇبايى – سوت وڭ كوزىمەن قاراپ، ءادىل شەشىم شەشەدى دەپ، ءبارىمىز شارشادىق، مىسالى كۇيەۋىم بۇگىن «قاتتى اۋىردىم، ءبىر اپتا جاتتىم» دەيدى گريپپەن. ءبارى شاراشاپ، وزىمدە قاتتى شارشادىم. – دەدى.

كامەراعا تۇسكىسى كەلمەگەن تاعى ءبىر ادام: – سوت اشىق وتۋدە. بىراق ولار جۋرناليستەردى جىبەرمەدى. ولار جۋرناليستەردى سمۋس-قا (وبل سوتتىڭ عيماراتىندا– رەد) جىبەردى. وندا ەشتەمە كورىنبەيدى، ەستىلمەيدى. ءبىز سۋديادان سۇراعانىمىزدا ول «بۇل رەجيىمدىك نىسان» دەدى. ءبىز رەجيىمدىك نىساننىڭ باسشىسىنان سۇراعانىمىزدا ول «بۇل سۋديانىڭ شەشىمى. ماعان كەلىپ-كەتەرى جوق. بىزگە قانداي ءتىزىم بەرەدى. ءبىز سولاردى جىبەرەمىز» دەدى.

قىلمىستىق كودەكستىڭ 24-بابى 3-بولىگى نەگىزىندە 291-بابى 3-بولىگى 4-تارماعى، 380-1-بابى 2-بولىگى 10-تارماعى، 287-بابى 4-بولىگىمەن ايىپتالىپ وتىرعان ەربول جۇمانوۆتىڭ اعاسى ەرجان جۇمانوۆ – تەرگەۋ بارسىندا كوپ قاتەلىكتەر كەتكەن. مىسالى، وسى كۇنگە دەيىن اتىپ (وق) كەلدى دەگەن ادام باسقا ادام بولىپ شىقتى. ول اتقام جوقپىن دەيدى. مايور جۇمانباەۆ ەمەس، كوپپاەۆ اتقان بولىپ شىقتى. سونى شاقىرتىپ سۇراق-جاۋاپ الامىز دەيدى... ىستە تىركەلگەن بەينە جازبالار قىسقارتىلعان، كەسىلگەن. سوعان بايلانىستى وسى بەينە جازباعا بايلانىستى شاقىرادى دەيدى. –دەدى.

«جاپپاي تارتىپسىزدىك ۇيىمداستىرۋ»، «قارۋدى، وق-دارىلەردi جىمقىرۋ»، «قۇقىق قورعاۋ ورگانى، ارناۋلى مەملەكەتتىك ورگان قىزمەتكەرىنىڭ، اسكەري قىزمەتشىنىڭ ومىرىنە قولسۇعۋشىلىق» سەكىلدى اۋىر ايىپتارمەن قاماۋعا الىنعان ازاماتتار وزدەرىنە تاعىلعان ايىپپەن كەلىسپەيدى.

تارازداعى قاندى قاڭتارعا بايلانىستى ءىس بويىنشا ايىپتالىپ وتىرعاندار:

ايبول ساعىنتاي، 30 جاستا – قىلمىستىق كودەكستىڭ 272-بابىنىڭ 1,2,3-بولىگىمەن;

دوسمۇحامبەت سادىقوۆ، 36 جاستا – قىلمىستىق كودەكستىڭ 272-بابى 2-بولىگىمەن;

داۋرەن نۇراليەۆا، 28 جاستا – قىلمىستىق كودەكستىڭ 272-بابىنىڭ 1,2,3-بولىگىمەن;

ەرماحان سايلاۋوۆ، 24 جاستا – قىلمىستىق كودەكستىڭ 24-بابى 3-بولىگى نەگىزىندە 291-بابى 3-بولىگى 4-تارماعىمەن جانە 287-بابى 4-بولىگىمەن;

ەربول جۇمانوۆ، 38 جاستا –  قىلمىستىق كودەكستىڭ 24-بابى 3-بولىگى نەگىزىندە 291-بابى 3-بولىگى 4-تارماعى، 380-1-بابى 2-بولىگى 10-تارماعى، 287-بابى 4-بولىگىمەن;

جاقسىلىق ابدۋللاەۆ، 32 جاستا – قىلمىستىق كودەكستىڭ 272-بابىنىڭ 1,2,3-بولىگىمەن;

نۇراحان ماحاتوۆ، 64 جاستا – قىلمىستىق كودەكستىڭ 272-بابىنىڭ 1,2,3-بولىگىمەن;

قانات نۇراحانۇلى، 35 جاستا – قىلمىستىق كودەكستىڭ 28-بابى 5-بولىگى نەگىزىندە 272-بابىنىڭ 1, 2, 3-بولىكتەرى جانە 28-بابى 3-بولىگى نەگىزىندە 291-بابى 3-بولىگى 4-تارماعىمەن;

سالامات قوسانوۆ، 21 جاستا – قىلمىستىق كودەكستىڭ 272-بابىنىڭ 2-بولىگىمەن.