قازاقستان رەسەي عارىش ايلاقتارىنىڭ باس وپەراتورى «جەردەگى عارىش ينفراقۇرىلىمىن پايدالانۋ ورتالىعىنىڭ» مۇلكىن بۇعاتتادى. بۇل جونىندە The Moscow Times باسىلىمىنىڭ ورىس قىزمەتى حابارلادى. 

باسىلىم مالىمەتىنشە، «روسكوسموس» مۇلكىنىڭ بۇعاتتالۋىنا رەسەي وپەراتورىنىڭ «بايتەرەك» كومپانياسىنا (قازاقستان مەن رەسەيدىڭ بىرلەسكەن كومپانياسى) 13,5 ملرد تەڭگە بەرەشەگى سەبەپ بولعان. بۇل قارىز «سويۋز-5»زىمىران تاسىعىشىنىڭ قورشاعان ورتاعا اسەرىن باعالاۋ جۇمىستارىنا بايلانىستى پايدا بولعان.

قازاقستان سوت ورىنداۋشىلارى رەسەي وپەراتورىنىڭ قازاقستاننان ماتەريالدىق قۇندى زاتتاردى الىپ شىعۋىنا جانە وپەراتور جەتەكشىلەرىنىڭ تەرگەۋ اياقتالعانشا رەسپۋبليكادان كەتۋىنە تىيىم سالعان.

عارىشتى يگەرۋ باعدارلاماسىن بىرگە جۇزەگە اسىرۋ ءۇشىن 2005 جىلى قازاقستان مەن رەسەي بىرلەسىپ، «بايتەرەك» كاسىپورنىن قۇرعان. باعدارلامادا ۋلى گەپتيلمەن ۇشاتىن «پروتون» زىمىران تاسىعىشىنىڭ ورنىنا ەكولوگيالىق تۇرعىدان زالالسىز زىمىران تاسىعىش پايدالانۋعا كوشۋ كوزدەلگەن. جاڭا ستارت الاڭىن سالۋ جوسپارلانعانىمەن، ول كەيىنگە قالدى.

جەرگىلىكتى باق قازاقستاننىڭ قاتاڭ تالاپقا كوشكەنى «روسكوسموستىڭ» جاڭا باسشىسى يۋري بوريسوۆتىڭ قازاقستاننىڭ تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات ءمۋسيندى سىناعانىنا قاتىسى بار بولۋى مۇمكىن دەپ بولجايدى. بوريسوۆ ونى «قازاقستان ستارت الاڭىنىڭ قۇرىلىسىن جارتى جىلعا كەيىنگە قالدىردى» دەپ سىناعان. مۋسين بوريسوۆتىڭ سىنىن «ديپلوماتيالىق قاتە» دەپ اتاعان.