4 ناۋرىزدا استانادا جوعارعى سوت قاڭتار وقيعاسىنا بايلانىستى سوتتالعان جانمۇرات اشتاەۆتىڭ كاسساتسيالىق شاعىمىن قاراپ، اقتاپ شىعاردى. ال ونىمەن بىرگە سوتتالعان دوسمامبەتوۆانىڭ ءىسىن راقىمشىلىق زاڭىنا جاتقىزدى. بۇل تۋرالى ازاتتىق راديوسى جازدى.

"شىمكەنت قالالىق سوتى مەن ءال-فارابي اۋداندىق سوتىنىڭ اشتاەۆ جونىندەگى قاۋلىسىنىڭ كۇشى جويىلسىن. اشتاەۆتىڭ ءىس-ارەكەتىندە قىلمىستىق كودەكستىڭ 272-بابىنىڭ 2-3 بولىگىندە كوزدەلگەن قۇقىقبۇزۋشىلىق بولماۋىنا بايلانىستى ءىس توقتاتىلسىن. اشتاەۆ قاماۋدان دەرەۋ بوساتىلسىن. ونىڭ قىلمىستىق-پروتسەستىك ءىستى جۇرگىزگەن ورگاننىڭ زاڭسىز ارەكەتتەرى سالدارىنان كەلتىرىلگەن زياندى وندىرۋگە قۇقىعى بار دەپ تانىلسىن” دەدى سۋديا.

اشتاەۆتىڭ ايەلى سوت قاۋلىسىن ەستىگەندە كوزىنە جاس الىپ، بۇل كۇندى كوپ كۇتكەنىن، دالەلسىز ايىپتالعانىن دالەلدەۋ اۋىر بولعانىن ايتتى.

"قۋانىشىمدى سوزبەن جەتكىزە الماي تۇرمىن" دەدى ول ازاتتىققا.

سوتقا بەلسەندىنىڭ ايەلى، ادۆوكاتى مەن جاقتاستارى قاتىستى. تۇزەۋ مەكەمەسىندە تەحنيكالىق مۇمكىندىك بولماعاندىقتان، اشتاەۆتىڭ ءوزى قاتىسا المادى.

16 قاڭتاردا جوعارعى سوت بەلسەندىنىڭ ءىسىن كاسساتسيالىق تارتىپپەن قايتا قاراۋ تۋرالى قاۋلى شىعارعان.

اشتاەۆ – شىمكەنتتە قاڭتار وقيعاسىنا بايلانىستى سوتتالىپ، قاماۋدا بولعان جالعىز ادام. ونىمەن بىرگە سوتتالعان بەلسەندى قايرات سۇلتانبەك راقىمشىلىققا ءىلىنىپ، بوستاندىققا شىققان، ال ءلاززات دوسمامبەتوۆانىڭ جازاسىن وتەۋ مەرزىمى كەيىنگە قالدىرىلعان.

جوعارعى سوت قاڭتار وقيعاسى بويىنشا سوتتالعان ادامدى العاش رەت اقتاپ وتىر.

جوعارعى سوت دوسمامبەتوۆانىڭ ءىسىن دە راقىمشىلىق زاڭىنا ءىلىندىردى. جوعارعى سوتقا ارىزدى اشتاەۆ پەن ونىڭ قورعاۋشىلارى جازعان. قورعاۋشىلار بەلسەندىلەردىڭ ايىبىن دالەلدەيتىن بىردە-ءبىر مالىمەت جوق ەكەنىن، ۇشەۋى تەلەفون ارقىلى سويلەسكەن سوزدەرى ءۇشىن عانا سوتتالعانىن العا تارتىپ، ءال-فارابي اۋداندىق سوتى مەن شىمكەنت قالالىق سوتى قاۋلىسىنىڭ كۇشىن جويۋدى، اشتاەۆ پەن دوسمامبەتوۆانى اقتاۋدى نەمەسە راقىمشىلىق زاڭىن قولدانۋدى سۇرادى.

"قيراتۋعا، ورتەۋگە قاتىسپادىم. ساياسي كوزقاراسىما بايلانىستى قۋدالاندىم. زاڭسىز سوتتالدىم. تاعى ايتامىن، ۇيالى تەلەفونمەن 6 قاڭتاردا سويلەستىك. وقيعا 4 قاڭتاردا بولدى. اقتاۋدى، جازادان بوساتۋدى سۇرايمىن" دەدى دوسمامبەتوۆا سوتتا. پروكۋرور سوت قاۋلىسىن وزگەرتپەۋدى سۇرادى.

2022 جىلى 15 شىلدەدە جانمۇرات اشتاەۆ قاڭتار وقيعاسى كەزىندە "جاپپاي تارتىپسىزدىككە قاتىستى", "حالىقتى بيلىك وكىلدەرىنىڭ تالاپتارىنا باعىنباۋعا شاقىردى" دەگەن ايىپپەن قىلمىستىق كودەكستىڭ 272-بابىنىڭ 2, 3-بولىگى ("جاپپاي تارتىپسىزدىككە قاتىسۋ جانە سوعان شاقىرۋ") بويىنشا ءۇش جىل، ءبىر اي مەرزىمگە تۇرمەگە قامالعان. مۇنداي ايىپپەن بەلسەندىلەر ءلاززات دوسمامبەتوۆا مەن قايرات سۇلتانبەك تە سوتتالعان.

2022 جىلى 8 قىركۇيەكتە اپپەلياتسيالىق سوت اشتاەۆقا شىققان ۇكىمدى وزگەرتپەگەن.

شىمكەنتتەگى سوت قاراشادا اشتاەۆ پەن دوسمامبەتوۆا بۇرىن "تىيىم سالىنعان ۇيىم قىزمەتىنە قاتىسۋ" بابىمەن سوتتالدى دەپ، راقىمشىلىق تۋرالى ءوتىنىشىن قاناعاتتاندىرماعان. ال قايرات سۇلتانبەك راقىمشىلىق زاڭى بويىنشا بوستاندىققا شىقتى. سوت دوسمامبەتوۆانىڭ ەكى بالاسى 14 جاسقا تولماعانىن، جالعىزىلىكتى انا ەكەنىن ەسكەرىپ، بەلسەندىنىڭ 3 جىل 7 اي تۇرمە جازاسىن وتەۋ ۋاقىتىن ەكى جىل كەيىنگە قالدىرعان.

2022 جىلى قاڭتاردىڭ باسىندا جاڭاوزەندە سۇيىتىلعان گاز قىمباتتاعانىنا بايلانىستى حالىق نارازىلىعى ەلدىڭ بىرنەشە ايماعىندا قولداۋ تاپقان. قازاقستاننىڭ ونداعان قالاسىندا، سونىڭ ىشىندە شىمكەنتتە دە جۇرت نارازىلىققا شىعىپ، بيلىككە تالاپ قويعان. كەيىن بەيبىت نارازىلىق جاپپاي دۇربەلەڭگە ۇلاسىپ، رەسمي مالىمەت بويىنشا، قازاقستاندا كەمى 238 ادام قازا بولعان.

رەسمي مالىمەت بويىنشا، شىمكەنتتە قاڭتار وقيعاسى كەزىندە 20 ادام ءولىپ، جۇزدەن اسا ادام جارالاندى. قالادا قاڭتار وقيعاسىنا بايلانىستى 86 ادامنىڭ ۇستىنەن قىلمىستىق ءىس قوزعالىپ، كوبىنىڭ باس بوستاندىعى شەكتەلگەن.