تاجىكستان مەن قىرعىزستاننىڭ شەكارا ماسەلەلەرى جونىندەگى جۇمىس توپتارى 10-16 ناۋرىز ارالىعىندا دۋشانبەدە كەزدەسەدى. بۇل تۋرالى ورتالىق ازيا جاڭالىقتار قىزمەتى جازدى.

قىرعىزستان ۇكىمەتىنىڭ باسشىسى اقىلبەك جاپاروۆ بىشكەكتەن باراتىن توپ قۇرامىن بەكىتىپ، ۇكىمەتتىڭ شەكاراداعى وكىلى نازاربەك بورۋباەۆتى ونىڭ جەتەكشىسى ەتىپ تاعايىندادى.

3-9 اقپان ارالىعىندا قىرعىز-تاجىك شەكاراسىنا قاتىستى كەزەكتى كەزدەسۋ وتكەن. رەسمي مالىمەتكە قاراعاندا، جۇزدەسۋدە ءتيىستى حاتتامالارعا قول قويىلعان. كەلەسى كەزدەسۋ تاجىكستان اۋماعىندا وتەتىنى حابارلانعان.

قىرعىزستان مەن تاجىكستاننىڭ ورتاق شەكاراسى 972 شاقىرىمعا سوزىلىپ جاتىر. ەكى ەلدىڭ پرەزيدەنتەرى سونىڭ 664 شاقىرىمىنا قاتىستى ورتاق پىكىر قالىپتاسقانىن راستادى. شەكارا تولىق شەگەندەلمەۋىنە بايلانىستى داۋلى جەرلەردە ۇنەمى جانجال بولىپ تۇرادى. شەكاراداعى جانجال كەيدە قارۋلى قاقتىعىسقا ۇلاسىپ كەتەدى.