2023 جىلدىڭ 28 اقپانىندا جەتىسۋ وبلىستىق سوتىندا بۇرىنعى الماتى وبلسىسى پوليتسيا باسقارماسىنىڭ ەكس باسشىسى سەرىك كۇدەباەۆتىڭ سوت وتىرسىندا ءجارىسسوز بولدى.

مەملەكەتتىك ايىپتاۋشى پروكۋرور جۇماعۇلوۆ كۇدەباەۆتى ايىپتاۋ حاتتاماسىن وقىپ، كۇدەباەۆتىڭ قاندى قاڭتار كەزىندەگى اركەتسىزدىگى مەن قىزمەتىن اسىرا پايدالانۋ بويىنشا كەلتىرىلگەن زارداپتاردى اتاپ ءوتتى. پروكۋرور ەرلان قىدىرباەۆ كۇدەباەۆقا قىلمىستىق كودەكستىڭ 362 بابىنىڭ 4 بولىگىمەن 8 جىل، 146 باپتىڭ 2 بولىگىمەن 4 جىل قاماۋ جازاسىن بىرىكتىرىپ، 58 باپتىڭ ياعني قىلمىستىق قۇقىق بۇزۋشىلىقتار جيىنتىعى بويىنشا جازا تاعايىنداۋدىڭ 3 بولىگىمەن 9 جىلعا قاماۋ جازاسىن سۇرادى.

كۇدەباەۆتىڭ ادۆوكاتى ساۋلە كوبجانوۆا ءبىر جارىم ساعاتقا سوزىلعان اقتاۋ سوزىندە پروكۋرورلاردىڭ ايىپتاۋلارىن جوققا شىعارىپ كۋاگەرلەردىڭ سوزدەرىن العا تارتىپ ءوز قورعاۋىنداعى گەنەرالدى اقتاۋدى سۇرادى. سەرىك كۇدەباەۆتىڭ كوزىنشە ازاپتالدى دەلىنگەن جابىرلەنۋشىلەر احمەدياروۆ پەن ءابدىراحمانوۆ كۇدەباەۆقا ەشقانداي تالاپ قويمايتىنىن ايتتى.

كۇدەباەۆ وزىنە بەرىلگەن ءسوز كەزەگىندە ءوزىنىڭ حالىققا وق اتپاۋ ءۇشىن سونداي ارەكەتكە بارعانىن العا تارتىپ قاندى قاڭتار كەزىندە قاراساي اۋدانىنا نە ءۇشىن كەتكەنىن ايتتى. جابىرلەنۋشى ءابدىراحمانوۆ كۇدەباەۆتىڭ ادۆوكاتى كوبجانوۆانىڭ اقتاۋ سوزىنە كەلىسپەيتىنىن ايتىپ قاندى قاڭتار كەزىندە ياعني كۇدەباەۆ باسشى بولىپ تۇرعان تۇستا ازاپتاۋدان قايتىس بولعان ازاماتتى ەسكە الدى.

كۇدەباەۆ 2022 جىلدىڭ قاندى قاڭتارى كەزىندە الماتى وبلىسىندىڭ كوماندانتى بولعان. 18 اقپاندا ول ءوز ەركىمەن جۇمىستان بوساتىلعان. قاندى قاڭتاردان سوڭ تالدىقورعاندا شەرۋگە شىققاندار جاپپاي قامالىپ ولار جانتۇرشىگەرلىك ازاپپەن ازاپتالعان. ۇتىك باسىلىپ، تىرناقتارىنىڭ كوبەسىنە شەگە سۇعىلعان، تىستەرى جۇلىنىپ، قول-اياق، قابىرعالارى سىندىرىلعان. الايدا ازاپتاۋشىلاردىڭ دەنى ماسكامەن جۇرگەندىگىن العا تارتقان قۇزىرلى ورگان ابىرلەنۋشىلەردىڭ كوبىنىڭ ءىسىن توقتاتىپ تاستاعان. تەك 23 جابىرلەنۋشىنىڭ ارىزىمەن 5 پوليتسيا قىزمەتكەرى قاماۋعا الىنىپ 3-5 جىلعا سوتتالعان بولاتىن. ونىڭ ءبىرى ارنايى جاساق قىزمەتكەرى ەرمەك جۇماشەۆ ءوزىنىڭ تەك گەنارال كۇدەباەۆقا عانا باعىنعانىن، تەك سونىڭ عانا بۇيرىعىن ورىندايتىنىن ايتقان.