مينسك سوتى 3 ناۋرىزدا بەلارۋس قۇقىق قورعاۋشىسى، بەيبىتشىلىكتى نىعايتۋ سالاسىنداعى نوبەل سىيلىعىنىڭ لاۋرەاتى الەس بەلياتسكيدى 10 جىل تۇرمەگە كەستى. بۇل جونىندە ازاتتىقتىڭ بەلارۋس قىزمەتى حابارلادى،-دەپ جازدى ازاتتىق راديوسى.

بەلياتسكيمەن بىرگە ونىڭ ارىپتەسى "ۆەسنا" قۇقىق قورعاۋ ۇيىمىنىڭ وكىلى ۆالەنتين ستەفانوۆيچكە دە ۇكىم وقىلعان. سوت ونى 9 جىلعا باس بوستاندىعىنان ايىردى. ۆلاديمير لابكوۆيچ – 7 جىلعا بوستاندىعىنان ايىرىلدى، سىرتتاي سوتتالعان دميتري سولوۆيوۆكە 8 جىل تۇرمە جازاسى بەرىلدى.

قۇقىق قورعاۋشىلارعا 2020 جىلى الەكساندر لۋكاشەنكوعا قارسى نارازىلىقتى "قارجىلاندىردى" جانە "اقشانى شەكارادان زاڭسىز وتكىزدى" دەگەن ايىپتار تاعىلدى. قۇقىق قورعاۋشىلار تاعىلعان ايىپتاردى جوققا شىعارىپ، وزدەرىن ساياسي سەبەپپەن قۋدالاپ وتىرانىن ايتقان.

الەس بەلياتسكي 2022 جىلى بەلارۋس تۇرمەسىندە وتىرعان كەزدە وعان بەيبىتشىلىك سالاسىنداعى نوبەل سىيلىعى بەرىلدى. ونىمەن بىرگە نوبەلدىڭ بەيبىتشىلىك سىيلىعى ۋكراينالىق ازامات بوستاندىقتارى ورتالىعى مەن رەسەي بيلىگى تىيىم سالعان "مەموريال" ۇيىمىنا بەرىلدى. سىيلىق تۇرمەدەگى قۇقىق قورعاۋشىنىڭ جۇبايى ناتاليا پينچۋككە تابىستالعان.

"تۇرمەدە تەك الەس وتىرعان جوق – ازاماتتىق پوزيتسياسى ءۇشىن قۋدالانىپ، قامالعان مىڭداعان بەلارۋس ازاماتى وتىر. جۇزدەگەن مىڭ ادام دەموكراتيالىق ەلدە ءومىر سۇرگىسى كەلگەنى ءۇشىن ەلدەن كەتۋگە ءماجبۇر بولدى. بەلارۋستە، وكىنىشكە قاراي، بيلىك جىلدار بويى ءوز حالقىنا، ءتىلى مەن تاريحىنا، دەموكراتيالىق قۇندىلىقتارعا قارسى سوعىس جۇرگىزىپ جاتىر" دەدى وسلوداعى سالتاناتتى شارا كەزىندە ناتاليا پينچۋك.

ايىپتالۋشىلار سوت وتىرىسى كەزىندە پروتسەستى بەلارۋس تىلىندە وتكىزۋگە ءوتىنىش بەرگەن. الايدا سۋديا ەلدە ەكى مەملەكەتتىك ءتىل بارىن العا تارتىپ، ءوتىنىشتى ورىنداماعان.

2011 جىلى بەلارۋس سوتى "سالىقتان جالتاردى" دەگەن ايىپپەن بەلياتسكيدى 4,5 جىلعا سوتتاپ، قاتاڭ رەجيمدەگى كولونياعا جىبەرگەن. قۇقىق قورعاۋشى بەلياتسكي جالپى بەلسەندىلىگى ءۇشىن 20 رەتتەن استام قىلمىستىق جاۋاپقا تارتىلعان.

  • اقش، ەو ەلدەرى جانە بىرقاتار وزگە ەلدەر بەلارۋستە 2020 جىلى تامىزدا وتكەن پرەزيدەنت سايلاۋىنان كەيىن الەكساندر لۋكاشەنكونى ەلدىڭ زاڭدى پرەزيدەنتى دەپ تانۋدان باس تارتتى. ەلدە سايلاۋدىڭ رەسمي قورىتىندىسىنا كەلىسپەگەندەردىڭ نارازىلىعى اياۋسىز كۇشپەن باسىپ-جانشىلدى. باتىس ەلدەرى لۋكاشەنكو مەن ونىڭ اينالاسىنداعى شەنەۋنىكتەرگە سانكتسيا سالعان. لۋكاشەنكو رەجيمى ادام قۇقىعىن ورەسكەل بۇزدى، وپپوزيتسيانى قۋدالادى دەپ ءجيى سىنالادى.