3 ناۋرىزدا قۇرلىق اسكەرى ينستيتۋتىنىڭ كۋرسانتى قاراۋىل پوستىسىنان ءولى كۇيىندە تابىلدى. بۇل جونىندە جۇما كۇنى قورعانىس مينيسترلىگىنىڭ ءباسپاسوز قىزمەتى حابارلادى. تەرگەۋ باستالعان، وقيعا سەبەبى انىقتالىپ جاتىر دەپ حابارلادى مينيسترلىك،-دەپ جازدى ورتالىق ازيا جاڭالىقتار قىزمەتى.

"وقيعانىڭ ءمان-جايىن انىقتاۋعا قۇرلىق اسكەرى باس قولباسشىسى ءبىرىنشى ورىنباسارىنىڭ باستاۋىمەن ارنايى كوميسسيا جىبەرىلدى" دەپ جازىلعان حابارلامادا.

ۆەدومستۆو وزگە اقپارات تەرگەۋ قۇپياسىنا بايلانىستى جاريالانبايتىنىن حابارلادى. قازا بولعان كۋرسانتتىڭ اتى-ءجونى، قايدان ەكەنى ايتىلمايدى.

قۇرلىق اسكەرى ينستيتۋتى الماتىدا ورنالاسقان. مەكەمەنىڭ رەسمي سايتىندا "ساعادات نۇرماعامبەتوۆ اتىنداعى قۇرلىق اسكەرى اسكەري ينستيتۋتى ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەردىڭ قارۋلى كۇشتەرى ءۇشىن اسكەري كادرلاردى بىرلەسە دايارلايتىن وقۋ ورىنداردىڭ قاتارىنا ەڭگىزىلگەن" دەپ جازىلعان.