تۇركيانىڭ جەر سىلكىنىسىنەن قاتتى زارداپ شەككەن قالاسىنىڭ ءبىرى قاھرامانماراشتا 17 جاستاعى قىز 10 كۇننەن كەيىن ءۇيىندى استىنان ءتىرى تابىلدى. قۇتقارۋشىلار قىزدى 16 اقپاندا قۇتقارعان. بۇل تۋرالى تۇركيانىڭ TRT Haber تەلەارناسىنا سىلتەمە جاساپ، Reuters اگەنتتىگى حابارلادى، -دەپ جازدى ازاتتىق راديوسى.

ال كەشە، 15 اقپاندا وسى قالادا قيراعان ءۇي استىنان 42 جانە 74 جاستاعى ەكى ايەل قۇتقارىلعانى حابارلاعان ەدى. انتاكيا قالاسىندا ءبىر ايەل مەن ونىڭ ەكى بالاسى ءۇيىندى استىنان امان تابىلدى.

قازىر تۇركيادا ءارتۇرلى ەلدەن كەلگەن قۇتقارۋشىلار 6 اقپانداعى جەر سىلكىنىسىنەن قيراعان ۇيلەردى ارشىپ جاتىر. كۇن وتكەن سايىن امان قالعان ادامداردى تابۋ قيىنداپ بارادى. ۇيلەرىنەن ايىرىلعان مىڭداعان ادام ۋاقىتشا پانالاۋ ورىندارىندا، شاتىرلاردا تۇرىپ جاتىر.

تۇركيا مەن سيريادا بولعان ءزىلزالادان 10 كۇن ءوتتى، قازىر ەكى ەلدە قازا تاپقاندار سانى 42 مىڭعا جۋىقتادى. تۇركيادا 35 مىڭنان استام ادام، سيريادا 5800 ادام قازا بولعان. بۇۇ سيريادا قۇتقارۋ جۇمىستارى باياۋ ءجۇرىپ جاتقانىن مالىمدەپ، قازا تاپقاندار سانى الداعى كۇندەرى ءوسۋى مۇمكىن ەكەنىن ەسكەرتتى.

امەريكالىق JP Morgan قارجىلىق كومپانياسى 16 اقپاندا "تۇركياعا جەر سىلكىنىسىنەن كەلگەن شىعىن 25 ملرد دوللارعا دەيىن جەتۋى مۇمكىن" دەپ مالىمدەدى.

6 اقپاندا تۇركيانىڭ گازيانتەپ ايماعىندا بولعان جەر سىلكىنىسىنەن ءۇش قازاقستاندىق وپات بولدى.