الماتىعا قاڭتار وقيعاسى مەن تىركەلمەگەن دەمپارتيا جەتەكشىسى جانبولات مامايدىڭ ءىسىن تەرگەۋ بويىنشا ۇلىبريتانيا پارلامەنتتىك كوميسسياسى كەلدى. بۇل جونىندە ساياساتكەردىڭ جۇبايى ينگا يمانباي حابارلادى.  

– بۇگىن الماتىعا قاڭتار وقيعاسىن جانە جانبولات مامايدى قىلمىستىق قۋدالاۋ ءىسىن تەرگەۋ بويىنشا ۇلىبريتانيا لوردتار پالاتاسىنىڭ مۇشەسى كەن ماكدونالد (Lord Macdonald KT KC of River Glaven) باستاعان كوميسسيا وكىلدەرى كەلدى. كوميسسيا قۇرامىندا حالىقارالىق قۇقىقتىق كومەك كورسەتۋ كومپانياسى Bindmans LLP جەتەكشىسى تاياب الي مەن باسقا دا ارنايى ماماندار كەلىپ جەتتى.  بىرنەشە كۇننەن كەيىن الماتىعا كوميسسيانىڭ تاعى ءبىر مۇشەسى - ۇلىبريتانيا پارلامەنت دەپۋتاتى سەر روبەرت باكلەند تە ات باسىن بۇرماق، – دەپ جازدى يمانباي الەۋمەتتىك جەلىگە.  

ونىڭ سوزىنشە، كوميسسيا مۇشەلەرى الماتىدا قۇقىق قورعاۋشى، جۋرناليستتەر، جانبولات ماماي جانە قاڭتاردا ازاپتالعاندار مەن وققا ۇشىپ قازا تاپقانداردىڭ تۋىستارىمەن كەزدەسۋدى جوسپارلاۋدا.  

– بىرنەشە كۇننىڭ ىشىندە كوميسسيا مۇشەلەرى قاڭتار وقيعاسىنا قاتىسۋشىلارمەن، ازاپتاۋ قۇرباندارىمەن، قاسىرەتتى كۇندەرى تۋعان-تۋىسىنان ايرىلعاندارمەن جانە بىرقاتار قۇقىق قورعاۋشىلارمەن، جۋرناليستەرمەن دە كەزدەسپەك. سونىمەن بىرگە، كوميسسيا وكىلدەرى قازىرگى تاڭدا ءۇي قاماقتا وتىرعان جانبولات مامايمەن دە سويلەسۋدى جوسپارلاپ وتىر. بۇعان بايلانىستى ماماي تارابى سوتقا ارنايى قاعازدى دا جولدادى. ودان بولەك، كوميسسيا استاناعا بارىپ، قازاقستاننىڭ لاۋازىمدى وكىلدەرىمەن دە كەزدەسپەك. وسى اپتادا الماتىدا كوميسسيا وكىلدەرى ارنايى ءباسپاسوز ءماسليحاتىن وتكىزبەك، – دەلىنگەن يمانبايدىڭ جازباسىندا.