پوليتسەيلەر قولىنان ولگەن انافياەۆتىڭ سوتى كەيىنگە قالتىرىلدى

ولارعا قىلمىستىق كودەكستىڭ "ازاپتاۋ" (146-شى) بابىنىڭ ءۇشىنشى تارماعى بويىنشا، ياعني "جابiرلەنۋشiنى ابايسىزدا ءولتىرىپ العان" دەگەن ايىپ تاعىلعان. بۇل باپ بويىنشا ايىپتى دەپ تانىلعان ادامعا بەس جىلدان ون ەكى جىلعا دەيiنگi مەرزiمگە بوستاندىعىنان ايىرۋ جازاسى قاراستىرىلعان.

جاۋاپقا تارتىلىپ جاتقان پوليتسەيلەر وزىنە تاعىلعان ايىپتى مويىندامايدى.

المالى اۋداندىق سوتىنىڭ سۋدياسى ەسەن ۇستەلباەۆ پروتسەسسكە قاتىسۋشىلاردى تۇگەندەدى. ايىپتالۋشى ايان ەلۋبەكوۆتىڭ قورعاۋشىسى وزگە پروتسەسستە بولعاندىقتان بۇل سوت وتىرىسىنا كەلمەگەنى انىقتالدى. سۋديا "بولاشاقتا مۇنداي قايتالانباسىن" دەپ ەسكەرتتى.

پروتسەسس باستالا سالىسىمەن پروكۋرور ايىپتالۋشىلارعا قاتىستى جاڭادان ايىپتاۋ اكتىسى دايىندالعاندىقتان ونىمەن پروتسەسسكە قاتىسۋشىلاردى تانىستىرۋ ءۇشىن ۋاقىت بەرۋدى سۇرادى. سۋديا ايىپتالۋشىلار مەن جابىرلەنۋشى تاراپ، ولاردىڭ ادۆوكاتتارى جاڭا ايىپتاۋ اكتىسىمەن تانىسۋ ءۇشىن ءۇزىلىس جاريالادى. سوت وتىرىسى كەلەسى دۇيسەنبىگە قالدى.

– ەگەر جابىرلەنۋشى جاق بۇل ايىپپەن كەلىسپەسە، وندا زاڭعا سايكەس، قازىرگى ايىپ بويىنشا سوت جالعاسا بەرەدى، – دەدى جابىرلەنۋشىنىڭ ادۆوكاتى احمەت بالماشەۆ.

سوت حاتشىسى پروتسەسستىڭ الداعى دۇيسەنبى، 23 قاڭتارعا قالدىرىلعانىن راستادى.

47 جاستاعى جاسۇلان انافياەۆتى بىلتىر 9 قاڭتاردا كەشكە الاتاۋ اۋداندىق پوليتسيا بولىمىنە اكەتكەن. 11 قاڭتاردا الماتى قالالىق پوليتسيا دەپارتامەنتىنە اپارعان. انافياەۆتىڭ ايەلىنىڭ سوزىنشە، 12 قاڭتارعا قاراعان ءتۇنى جاسۇلان قاماۋدا قايتىس بولعان. تۋىستارى مارقۇمدى پوليتسيا قىزمەتكەرلەرى ۇرىپ-سوعىپ، ازاپتاپ ولتىرگەن دەپ ەسەپتەيدى.

جاسۇلاننىڭ سۇيەگىن تۋىستارى 18 قاڭتاردا، ياعني قازا بولعاننان كەيىن ءبىر اپتادان سوڭ عانا العان. پوليتسيا اكەتكەندە جاسۇلاننىڭ قالتاسىندا تەلەفونى دا، قۇجاتى دا بولعان. پوليتسيادا قازا بولعاننان كەيىن مايىتحاناعا اپارىپ تاستاعانىن تۋىستارىنا ەشكىم حابارلاماعان. ءمايىتحانا ساراپشىسى "اجالى پانكرەاتيتتەن بولدى" دەپ قاعاز جازىپ بەرگەن.

رەسمي مالىمەت بويىنشا، قاڭتار وقيعاسى كەزىندە قازاقستاندا 232 ادام ولگەن. بۇعان قوسا اباقتىدا ازاپتاۋدان كەيىن التى ادام قازا بولعان. اۋەلدە ازاپتاۋ فاكتىلەرىن جوققا شىعارىپ كەلگەن بيلىك ازاپتاۋدان زارداپ شەككەنىن ايتىپ ارىزدانۋشىلار مەن ايعاق-دالەلدەر كوبەيگەن سوڭ مويىنداۋعا ءماجبۇر بولدى. 5 قاڭتاردا پارلامەنتتە قاڭتار تۋرالى تىڭداۋدى باس پروكۋرور بەرىك اسىلوۆ ەلدە ازاپتاۋ ارىز-شاعىمدارى بويىنشا 329 ءىس قوزعالعانىن، ۇقك مەن پوليتسيانىڭ 34 قىزمەتكەرىنىڭ ءىسىن پروكۋراتۋرا قاراپ جاتقانىن حابارلادى.