قىزىلوردا قالالىق  №2 سوتى قاڭتاردا «جاپپاي تارتىپسىزدىك ۇيىمداستىردى» دەپ ايىپتالعان ساياسي بەلسەندى مۇراتباي بايماعامبەتوۆتىڭ سوتىن كەيىنگە قالتىردى. سۋديا قانات ابدۋللاەۆ پروتسەسكە جۋرناليستەردىڭ قاتىسۋى ءۇشىن الدىن الا ءوتىنىش بەرىلمەگەنىن سىلتاۋراتىپ سوتتى كەيىنگە شەگەردى. سۋديا ابدۋللاەۆ جۋرناليستەرگە نە ءۇشىن سوتتقا جۋرناليستەردى قاتىستىرا المايتىنىن تۇسىندىرمەدى. 

ساياسي بەلسەندى مۇراتباي بايماعامبەتوۆتىڭ ءىسىن قارادى. سوتتا سۋديا ابدۋللاەۆ جۋرناليستەرگە پروتسەستى فوتو-ۆيدەوعا تۇسىرۋگە قارسىلىق ءبىلدىردى. ونىڭ ءسوزىن پروكۋرور گ دۇيسەنباەۆ پەن ىستە جابىرلەنۋشى دەپ تانىلعان قالالىق اكىمدىك، پوليتسيا، اسكەري ءبولىم وكىلدەرى قولدادى. مۇراتباي بايماعامبەتوۆ پەن ادۆوكاتى قامباروۆ باق وكىلدەرى پروتسەستى باسىنان-اياعىنا دەيىن ءتۇسىرسىن دەدى. سۋديا 15 مينۋتتىق ۇزىلىستەن كەيىن «جۋرناليستەر قاتىساتىن بولسا ءىس كەيىنگە قالدىرىلادى» دەدى.

ءۇزىلىس كەزىندە ءوزىن تانىستىرماعان ايەل ادام كەلىپ، جۋرناليستەرگە سوت زالىنان شىعۋدى تالاپ ەتتى. سوت حاتشىسى جاڭىل قاسىموۆا Masa.madia ءتىلشىسى سوت قۇرامى جونىندە اقپارات بەرۋىن سۇراعاندا «ءسىز ەشقانداي تاراپتىڭ وكىلى ەمەسسىز، بەرمەيمىن» دەپ جاۋاپ بەردى.

ادۆوكات قامباروۆ مۇراتباي بايماعامبەتوۆقا تاعىلعان ايىپ نەگىزسىز دەيدى. ونىڭ سوزىنشە، بايماعامبەتوۆ قاڭتار وقيعاسى كەزىندە جينالعان حالىققا «ەشقايدا كەتپەيمىز، تارقامايمىز» دەگەن ءسوزى ءۇشىن سوتقا تارتىلىپ وتىر. بۇل ءسوزدىڭ ەشقانداي قىلمىستىق قۇرامى جوق.

– جابىرلەنۋشى دەپ تانىلعان وبلىستىق اكىمشىلىك، اسكەري ءبولىم جانە پوليتسيا وكىلدەرى سوتقا تاپسىرمامەن كەلىپ وتىر. 16 پاراقتان تۇراتىن ايىپ نەگىزسىز. مەنىڭ قورعاۋىمدا وسىعان دەيىن دە قاڭتار كەزىندە قيراتىپ، بۇلدىرگەن ادامدار بولدى. ولاردىڭ ءىسى تەز بىتكەن. ال بايماعامبەتوۆتىڭ ارەكەتىندە تەك قانا جينالعان حالىققا «تاراماڭدار» دەپ ايتقان. بۇندا قانداي قىلمىس بار؟ بۇل قانداي ايىپ ەكەنىن تۇسىنبەيمىز، – دەيدى ادۆوكات.

بەلسەندى مۇراتباي بايماعامبەتوۆ وزىنە تاعىلعان ايىپپەن كەلىسپەيدى. ول بۇنى ساياسي استارى بار ءىس دەپ ەسەپتەيدى.

– 272 باپتىڭ 1 تارماعى بويىنشا «جاپپاي تارتىپسىزدىكتى ۇيىمداستىرۋشى» دەپ ايىپتاپ جاتىر. بۇعان دەيىن 272 باپتىڭ 2 تارماعى «جاپپاي تارتىپسىزدىككە قاتىسۋ» بولعان. سوتقا تاپسىراتىن كەزدە جاڭا ايىپتاۋ اكتىسىن 272 باپتىڭ 1 تارماعىنا اۋىستىرىپ تاستادى. قىزىلوردادا بولعان بۇلىك، ورتەنگەن عيماراتتاردىڭ بارلىعىن مەنىڭ مويىنىما ءىلىپ تۇر. قازىر مەنىڭ مويىنىما 833 ميلليون تەڭگە ىلىنگەن. شىمكەنتتە قاڭتار ءىسى بويىنشا ءۇش بەلسەندىنى سوتتادى عوي، سول سياقتى ەندى قىزىلوردانىڭ بىرەۋىن سوتتايىق دەگەن شىعار. مەن بۇنى ساياسي قۋدالاۋ دەپ ەسەپتەيمىن، – دەدى بايماعامبەتوۆ.

قىزىلوردا قالالىق №2 سوتى  2021 جىلدىڭ ساۋىرىندە مۇراتباي بايماعامبەتوۆتىڭ بوستاندىعىن ەكى جىلعا شەكتەگەن. وعان قۋعىنداعى وپپوزيتسيالىق ساياساتكەر مۇحتار ءابىليازوۆتىڭ قدت قوزعالىسىن قولدادى دەگەن ايىپ تاعىلعان. سول ۋاقىتتا قۇقىق قورعاۋشىلار بايماعامبەتوۆتى «ساياسي تۇتقىندار» تىزىمىنە قوسقان.

قدت قوزعالىسىن قازاقستان بيلىگى «ەكسترەميستىك ۇيىم» دەپ تانىپ، جۇمىسىنا ەل اۋماعىندا تىيىم سالعان. ەۋروپارلامەنت قدت-نى «بەيبىت وپپوزيتسيالىق ۇيىم» دەپ تانىعان.