فرانتسيالىق Le Figaro گازەتى قازاقستان پرەزيدەنتى قاسىم-جومارت توقاەۆ فرانتسيا پرەزيدەنتى ەممانۋەل ماكرونمەن فرانتسيادا تۇراتىن قازاقستاندىق بانكير مۇحتار ءابليازوۆتىڭ اينالاسىنداعى جاعدايدى تالقىلايدى دەپ جازدى. بۇل تۋرالى ورتالىق ازيا جاڭالىقتار قىزمەتى جازدى.

28 قاراشادا جاريالانعان ماقالادا "قازاقستان مەن فرانتسيا قارىم-قاتىناسىندا شاتاسقان سوت ءىسى بار، سول سوت ءىسى سەيسەنبىدە ەليسەي سارايىندا وتەتىن ماكرون مەن قازاقستاننىڭ جاقىندا عانا قايتا سايلاعان پرەزيدەنتى توقاەۆ كەزدەسۋىنىڭ نەگىزگى تاقىرىبى بولادى. بۇل – فرانتسيادان ساياسي باسپانا العان وليگارح مۇحتار ءابليازوۆتىڭ ءىسى" دەپ جازدى.

باسىلىم وقىرماندارىنا ءابليازوۆتى تانىستىرا كەلە، "قازاقستان بيلىگى ونى ليۋكسەمبۋرگ، سەيشەل ارالدارى جانە بريتانيالىق ۆيرگين ارالدارىنداعى 600 جالعان كومپانيا ارقىلى 7 ملرد دوللار جىمقىردى دەپ ايىپتايدى" دەپ جازدى.

Le Figaro قازاقستان مەن باسقا ەلدەر ءابليازوۆتى ەكستراديتسيالاۋعا تىرىسقانىن، ول 2009 جىلى قازاقستاننان قاشىپ لوندونعا بارعانىن، انگليادا سوتقا تارتىلىپ فرانتسياعا قاشقانىن، 2013 جىلى كاننى دا قامالعانىن، 2020 جىلى فرانتسيادان ساياسي باسپانا العانىن دا اتاپ وتكەن.

Le Figaro گازەتىنىڭ جازۋىنشا، 2021 جىلى جەلتوقساندا فرانتسيا ءابليازوۆتى ساياسي بوسقىن مارتەبەسىنەن ايىرعان، قازىر ول فرانتسيادا اپەللياتسيالىق سوتتى كۇتىپ جاتىر.

گازەت قازاقستان مەن فرانتسيا قارىم-قاتىناسىنا "تەرىس اسەر ەتىپ جاتقان" ءىس فرانتسيا بيلىگىن بىرنەشە جىلدان بەرى "الاڭداتىپ كەلەدى" دەپ جازادى.

"توقاەۆپەن كەزدەسۋدە ماكروننىڭ الدىندا ۇلكەن مىندەت تۇر" دەيدى باسىلىم.

"قازاقستان ءۇشىن قازاقستان كومىرسۋتەكتىڭ سەنىمدى كوزى سانالادى. بۇعان قوسا، فرانتسيا اتوم ەلەكتر ستانتسياسىن ساتۋدى كوزدەيدى" دەپ جازادى فرانتسيالىق گازەت.

باسىلىم ماكرون باس اۋرۋعا اينالعان ءابليازوۆ ىسىنە بايلانىستى قازاقستانمەن قارىم-قاتىناستىڭ "جاڭا پاراعىن اشا ما، ول جاعىن روجدەستۆوعا تامان بىلەمىز" دەيدى.