الماتى قالاسى بويىنشا سايلاۋشىلاردىڭ 18 پايىزى عانا سايلاۋ ناۋقانىنا قاتىستى. بۇل تۋرالى "تاۋەلسىز باقىلاۋشىلار"  بۇگىن وتكىزگەن ءباسسپاسوز جيىنىندا مالىمدەدى. بۇل تۋرالى ازاتتىق راديوسى جازدى.

جيىندا باقىلاۋشىلاردىڭ جەتەكشىسى ارايلىم نازاروۆا سايلاۋ كەزىندەگى 11 ءىستى زاڭ بۇزدى دەپ سوتقا بەرەتىندەرىن ايتتى. زاڭ بۇزىۋشىلىقتاردىڭ دەنى باقىلاۋشىلارعا قاتتامانى بەرمەگەندىگىندە، ءارى باقىلاۋشىلاردى ءزاڭسىز كەدەرگى كەلتىرگەندەرىندە.

زاڭ بويىنشا باقىلاۋشىلار حاتتامانى الا الادى.

باقىلاۋشىلاردىڭ جەتەكشىسى نازاروۆا: – تاۋەلسىز باقىلاۋشىلار ۇيىمىنىڭ ەسەبىمەن الماتى قالاسى بويىنشا سايلاۋشىلاردىڭ 18 پايىز عانا سايلاۋعا كەلدى. ال قولىمىزعا تۇسكەن حاتتامادا 27 پايىزدى كورسەتىپ وتىر. قولىمىزداعى حاتتاما بويىنشا قاراقات ابدەن 2,41 پايىز، نۇرلان اۋەسباەۆ 2,75 پايىز، جيگۋلي دايراباەۆ 3,69 پايىز، مەيرام قاجىكەن 1,2 پايىز، توقاەۆ 69,53 پايىز، سالتانات تۇرسىنبەكوۆا 2, 19 پايىز، بارىنە قارسىمىز دەگەندەر 9,32 پايىز، بۇلدىرىلگەن بيۋللەتەندەر سانى 8,85 پايىز. كورىپ وتىرعاندارىڭىزداي "بارلىعىنا قارسى" مەن بۇلدىرىلگەن بيۋللەتەندەر سانىن قوسقاندا 18 پايىز. توقاەۆتان باسقا بەس كانديداتتىڭ بىرىگىپ جيناعان داۋىسىنان دا كوپ، - دەيدى

پرەزيدەنتتى سايلاۋ كەزىندە «تاۋەلسىز باقىلاۋشىلار» قوعامدىق بىرلەستىگى 98 باقىلاۋشى دايىنداعان. ونىڭ 87-ءسى سايلاۋ ۋچاسكەسىنە كىرگەن. الماتىدا 60 سايلاۋ ۋچاسكەسىن قامتاماسىز ەتكەن.

بيىلعا كەزەكتەن تىس وتكەن پرەزيدەنت سايلاۋىنا مەملەكەت قازىناسىنا 20 ميلليارد تەڭگە ءبولىندى.

ورتالىق سايلاۋ كوميسسياسىنىڭ توراعاسى نۇرلان ءابدىروۆتىڭ مالىمەتىنە قاراعاندا، قازاقستانداعى 11 ميلليون 953 مىڭ 463 سايلاۋشىنىڭ 8 ميلليون 300 مىڭى نەمەسە 69,4 پايىزى داۋىس بەرۋگە كەلگەن. سايلاۋدى قازاقستان پرەزيدەنتتىگىنە كانديداتتاردىڭ 11 مىڭنان اسا سەنىمدى وكىلى، شەت مەملەكەتتەر مەن حالىقارالىق ۇيىمداردىڭ 641 وكىلى، ساياسي پارتيالاردىڭ 15,5 مىڭنان اسا، قوعامدىق بىرلەستىكتەردىڭ 30 مىڭنان اسا بايقاۋشىلارى باقىلاعان.

وسك مالىمەتىنشە، سايلاۋدا پرەزيدەنت قاسىم-جومارت توقاەۆ 81,3 پايىز داۋىس جيناعان.

حالىقارالىق ۇيىمدار اتاپ ايتقاندا، ەقىۇ-نىڭ دەموكراتيالىق ينستيتۋتتار جانە ادام قۇقىقتارى بيۋروسى (دياقب) مالىمدەمە جاريالاپ، "قازاقستانداعى كەزەكتەن تىس پرەزيدەنت سايلاۋى باسەكە جوق ساياسي احۋالدا ءوتتى", "سايلاۋ كۇنى بەيبىت ميتينگ وتكىزۋ جانە پىكىر ايتۋ ەركىندىگى تاعى شەكتەلدى" دەپ سىناعان. اقش پەن ەۋرووداق ەقىۇ باقىلاۋشىلارىنىڭ پىكىرىمەن كەلىسەتىنىن مالىمدەگەن. قازاقستان بيلىگى بۇل سىنمەن كەلىسپەيتىندىگىن مالىمدەپ، ەقىۇ قۇجاتىن "وبەكتيۆتى ەمەس" دەپ سانايتىنىن ايتقان.

سايلاۋ كۇنى تاۋەلسىز باقىلاۋشىلار ۋچاسكەلەردە ءتۇرلى زاڭسىزدىقتار بولعانىن (باقىلاۋشىنى ۋچاسكەگە كىرگىزبەۋ، ۋچاسكەدە جۇرۋىنە، سۋرەت-ۆيدەو تۇسىرۋگە تىيىم سالۋ جانە تاعى باسقا) ايتقان.