"پروەكت", "ۆاجنىە يستوري", The Insider, Bellingcat باسىلىمدارى مەن الەكسەي ناۆالنىي كومانداسى "ساميزدات" ءموبيلدى قوسىمشاسىن ىسكە قوستى. رەسەيدەگى وقىرمان جۋرناليستەردىڭ زەرتتەۋلەرىن وسى قوسىمشانىڭ كومەگىمەن VPN-ءسىز وقي الادى، -دەپ جازدى ورتالىق ازيا جاڭالىقتار قىزمەتى.

قوسىمشانى App Store پەن Google Play ارقىلى جۇكتەپ الۋعا بولادى.

ء"بىز تەگىن ءموبيلدى قوسىمشانى ىسكە قوستىق. ول بۇعاتتان ساقتالعان. سونىمەن كومەگىمەن ورىس تىلىندەگى ماڭىزدى زەرتتەۋلەردى ءبىر جەردەن وقۋعا بولادى", - دەپ جازدى رەداكتسيا. قوسىمشا اۆتورلارى "ساميزداتتىڭ" ورتاق رەداكتسيالىق ساياساتى مەن باسشىلىعى جوعىن، ءاربىر ۇجىم جازبالارىنا جەكە-جەكە جاۋاپ بەرەتىنىن مالىمدەپ وتىر.

"قازىرگى داعدارىس رەسەي جۋرناليستيكاسى تاريحىنداعى العاشقىسى ەمەس. جۋرناليستيكا بولاشاعىنا بالتا شابىلاتىنداي كورىنگەن ساتتەر بۇعان دەيىن دە بولعان: سوۆەت وداعى كەزىندە ادامداردى تۇرمەگە جاپتى، جيىرما جىل بۇرىن بيلىك تەلەۆيدەنيەنى باسىپ الدى، ال كەيىنگى ون جىلدا ءباسپاسوزدى وزىنە باعىندىردى". رەسەيدەگى تاۋەلسىز اقپارات قۇرالدارىنىڭ ءبارى قۋعىن-سۇرگىننەن جاپا شەكتى. بىراق قۋعىنداۋدىڭ زەرتتەۋشى جۋرناليستەرگە زيانى كوبىرەك ءتيدى. ولارعا "شەتەل اگەنتى" دەگەن كۇيە جاعىلىپ، تۇتاس رەداكتسيالارعا قىلمىستىق ىستەر قوزعالدى، ولاردىڭ سايتتارى بۇعاتتالدى.

"ساميزدات" اۆتورلارى باسقا دا تاۋەلسىز رەداكتسيالاردى وسى جوباعا قوسىلۋعا ۇندەدى.

سوعىس باستالعالى بەرى رەسەيدە جەتى مىڭنان استام سايت بۇعاتتالدى. ولاردىڭ اراسىندا ازاتتىق راديوسىنىڭ مەدياجوبالارى – سەۆەر.رەالي، سيبير.رەالي، Idel.رەالي سايتتارى، سونىمەن بىرگە "دوجد" تەلەارناسى، "ەحو موسكۆى" راديوسى، "مەدۋزا", DOXA, "مەديازونا" سەكىلدى ءىرى باق-تار بار.

سوعىستىڭ العاشقى ەكى اپتاسىندا 150-دەن استام جۋرناليست رەسەيدەن كەتۋگە ءماجبۇر بولدى. تاۋەلسىز اقپارات قۇرالدارىنىڭ كەيبىرى شەتەلدە جۇمىسىن جالعاستىردى. 2021 جىلى 1,5 مىڭ جۋرناليست پەن بەلسەندى رەسەيدەن كەتتى.