باتىس ەلدەرى رەسەيگە سانكيا سالعان سوڭ فەدەراتسيا ەكونوميكاسى ناشارلاۋىنا بايلانىستى تاجىك ميگرانتتارىنىڭ بىرقاتارى قازاقستاننان جۇمىس ىزدەۋگە ءماجبۇر بولدى. ەڭبەك ميگرانتتارىنىڭ ايتۋىنشا، قازاقستاندا رەسەيگە قاراعاندا از تولەيدى، بىراق مۇندا قاۋىپسىز. بۇل تۋرالى ورتالىق ازيا جاڭالىقتار قىزمەتى جازىدى.

استاناداعى "شارىن" كوتەرمە بازارىندا ونداعان تاجىك ميگرانتى جۇمىس ىستەيدى.

35 جاستاعى حامزا بوبوەۆ استاناداعى جۇمىسقا جاقىندا كەلگەن. ول مۇندا جەمىس-جيدەك ساتادى، كەيدە جۇك تاسيدى. "بۇعان دەيىن سوچيدە جۇمىس ىستەدىم. وندا ايلىق جاقسى. قازاقستاندا تابىس از، بىراق مۇنداعى پوليتسيا قىزمەتكەرلەرى سىرتتان كەلگەندەرگە تيىسە بەرمەيدى. ال رەسەيدە قۇجاتتارى دۇرىس ميگرانتتاردى دا ۇستايدى", - دەيدى تاجىك ميگرانتى. حامزا رەسەيدە ايىنا 70 مىڭ رۋبل تاپقان، استاناداعى تابىسى 40 مىڭ رۋبلدەن اسپايدى.

"استاناعا كەلگەنىمىزگە كوپ بولعان جوق. مۇنداعى پوليتسيا قىزمەتكەرلەرى دە ميگرانتتاردى ۇستايدى، بىراق تەز بوساتىپ جىبەرەدى نەمەسە قۇجاتتاردى دۇرىستاۋعا كەڭەس بەرەدى", - دەيدى تاعى ءبىر تاجىك ميگرانتى وليمجون كامولوۆ.

تاجىك ميگرانتتارى استاناداعى قۇرىلىستا دا جۇمىس ىستەيدى. ولاردىڭ بىرقاتارى رەسەيدەن دەپورتاتسيالانعان سوڭ قازاقستانعا كەلۋگە ءماجبۇر بولعان.

"رەسەي قازاقستانعا قاراعاندا دامىعان ەل، ايلىقتى جاقسى تولەيدى. ءبىزدى تىركەۋدە تۇرماعاندىقتان رەسەيدەن دەپورتاتسيالادى. سول سەبەپتى قازاقستانعا جۇمىسقا كەلدىك", - دەيدى كومرون رادجابزودا.

استانادا ناقتى قانشا تاجىك ميگرانتى جۇمىس ىستەيتىنى بەلگىسىز. تاجىكستان كوشى-قون قىزمەتىنىڭ 2022 جىلعى شىلدەدەگى مالىمەتىنشە، قازاقستاندا 10,5 مىڭ تاجىكستاندىق جۇمىس ىستەپ ءجۇر.