ەلىمىزدىڭ باستى قۇندىلىعى – ادام. مۇنى ەشكىم جوققا شىعارمايدى. ۇلت ساۋلىعىن ويلاۋ – باستى ماسەلە. دەنساۋلىق سالاسىندا تالاي جىلدان بەرى ءتۇرلى رەفورمالار جۇرگىزىلدى. پاندەميانىڭ تيگىزگەن زاردابى كوپ. ۇلت ساۋلىعىن تۇزەتۋ ءۇشىن قاجەتتى ۇلتتىق جوبانى جۇزەگە اسىرۋىمىز قاجەت. وسى تۇرعىدان كەلگەندە پرەزيدەنتىمىز قاسىم-جومارت توقاەۆتىڭ 2 قىركۇيەكتەگى حالىققا جولداۋى وسى ماسەلەنىڭ باعىت-باعدارىن ايقىنداپ بەردى.

مەملەكەت باسشىسى ءوز جولداۋىندا: «دەنساۋلىق ساقتاۋ سالاسىندا ءبىراز رەفورما جۇرگىزىلدى. دەگەنمەن، ونىڭ جاعدايى ءالى دە ءماز ەمەس. ارينە، جىلدار بويى قوردالانعان تۇيتكىلدەر ءبىر مەزەتتە شەشىلمەيدى. سوندىقتان، اسا ماڭىزدى  ماسەلەلەردى رەتكە كەلتىرۋگە باسا ءمان بەرگەن ءجون. سونىڭ ءبىرى – قارجىلاندىرۋ جۇيەسى. وسى سالاعا قارجىنىڭ جەتكىلىكتى بولىنبەۋى قالىپتى جاعدايعا اينالعان. سونىڭ كەسىرىنەن، جۇرت ساقتاندىرۋ جۇيەسىنە قوسىلسا دا، مەديتسينالىق قىزمەت تولىق كولەمدە كورسەتىلمەي وتىر.

بۇگىندە مەديتسينالىق كومەك مەملەكەت كەپىلدىك بەرگەن جانە ساقتاندىرۋ پاكەتى دەپ ەكىگە بولىنگەن. اشىعىن ايتساق، مۇنداي جۇيەنىڭ تيىمدىلىگى تومەن. ءتىپتى، ساقتاندىرۋ مودەلى تۇراقسىز ءارى جۇيەسىز دامۋدا. بۇل – ۇلكەن ولقىلىق. ەرىكتى مەديتسينالىق ساقتاندىرۋ جۇيەسىن ەنگىزەتىن ۋاقىت الدەقاشان جەتتى» دەگەن ەدى. ءتىپتى پرەزيدەنت ۇكىمەتكە الەۋمەتتىك سالانى قارجىلاندىرۋ جۇيەسىن قايتا قاراۋدى تاپسىردى.

ەلىمىزدە قانشاما ەمدەۋ مەكەمەلەرى بار. شالعايداعى ەلدى مەكەندەگى ەمدەۋ مەكەمەلەرىنىڭ جاي-كۇيى قانداي؟ اۋىلداعى اعايىننىڭ باسى اۋىرىپ، بالتىرى سىزداسا، ەمدەلەتىن مەكەمەسى ساقاداي-ساي ما؟ ماسەلە – وسىندا! پرەزيدەنت تە وسىنى قاداپ-قاداپ ايتىپ وتىر.

كەلەسى جىلدان باستاپ مەديتسينادا ۇلتتىق جوبا جۇزەگە اسادى. بۇل جوبا ەڭ الدىمەن اۋىل تۇرعىندارىنىڭ سۇرانىسىن قاناعاتتاندىرۋعا ارنالعان. وسى جوبا اياسىندا ايماقتاعى اۋرۋحانالار زامانعا ساي جاڭارىپ، اۋدانارالىق كوپبەيىندى مەكەمەگە اينالاتىن بولادى. مۇنىڭ ءبارى ەلگە ساپالى مەديتسينالىق قىزمەت كورسەتۋ ءۇشىن اتقارىلىپ جاتىر.