دۋگينا جانە ونىڭ قۇپيا ءولىمى تۋرالى ساراپشىلار نە دەيدى؟

وتكەن سەنبى كۇنى كەشكە ماسكەۋ ماڭىندا ءپۋتيننىڭ جاقىن سەرىكتەسى الەكساندر دۋگيننىڭ قىزى داريا دۋگينا جارىلىستان كوز جۇمدى. شابۋىلدىڭ ماقساتى ونىڭ ىقپالدى اكەسى الەكساندر دۋگين بولۋى مۇمكىن دەيدى ساراپشىلار. ونىڭ ۋكراينا اۋماعىنداعى «جاڭا رەسەي» نەمەسە «نوۆوروسسيا» تۋرالى ەكسپانسيونيستىك يدەيالارى پرەزيدەنت ۆلاديمير ءپۋتيننىڭ 2014 جىلى قىرىمدى اننەكسيالاۋىنا اسەر ەتكەنى ايتىلادى. دۋگينا حانىم مەن ونىڭ اكەسى سەنبى كۇنى كەشكە ماسكەۋ ماڭىنداعى فەستيۆالگە قاتىسىپ، ولار ءبىر كولىكپەن كەتپەكشى بولعان، بىراق سوڭعى ساتتە جوسپارلارىن وزگەرتكەن. دۋگينا حانىم كولىكپەن ءوزى قايتقان.
تەرگەۋشىلەر ول تىزگىندەگەن Toyota Land Cruiser كولىگىنىڭ استىنا جارىلعىش زات قويىلعانىن ايتتى. دۋگينا حانىم رەسەيدىڭ ۋكرايناعا باسىپ كىرۋىن بەلسەندى جاقتاعان جانە اكەسىنىڭ حالىقارالىق ەۋرازيالىق قوزعالىس ۇيىمىنىڭ ساياسي شولۋشىسى بولعان. ول كرەملشىل باق-قا ۇنەمى حات جازىپ تۇردى جانە شىلدەدە ۇلىبريتانيانىڭ سانكتسياسىنا «ۋكرايناعا قاتىستى جالعان اقپارات تاراتۋشى» رەتىندە ىلىنگەن. رەسەيلىك باق فسب انىقتاعان كۇدىكتىنى ماسكەۋ تەرروريستىك توپ دەپ سانايتىن ۋكراينانىڭ ازوۆ پولكىمەن بايلانىستىردى. ازوۆ پولكى بۇل ايىپتاۋدى ءۇزىلدى-كەسىلدى جوققا شىعاردى. فسب-نىڭ داريا دۋگينانىڭ ءولىمى تۋرالى مالىمەتىنە سايكەس، كيەۆتەگى قاۋىپسىزدىك قىزمەتىنە قاتىسى بار ۋكراينالىق ايەل شىلدە ايىندا كىشكەنتاي قىزىمەن بىرگە رەسەيگە كوشىپ كەلگەن. ايەل دۋگينا حانىممەن ءبىر عيماراتتا ءبىر اي بويى پاتەر جالداپ، شابۋىلعا دايىندالىپ جۇرگەن.

كەيىن فسب كۇدىكتىنىڭ كولىگىنىڭ رەسەيگە كىرگەنىن، سودان كەيىن ونىڭ دۋگينا حانىمنىڭ عيماراتىنا كىرىپ، اقىرى رەسەيدەن ەستونياعا كەتكەنىن كورسەتەتىن بەينەجازبانى جاريالادى.
ەستونيانىڭ  سىرتقى ىستەر ءمينيسترى ۋرماس رەينسالۋ سەيسەنبى كۇنى بۇل ايىپتاۋدى رەسەيدىڭ «جالعاسىپ جاتقان ارانداتۋى» دەپ اتادى. سونداي-اق، ەستونيا سىرتقى ىستەر مينيسترلىگى ەستونيالىقتاردى رەسەيگە بارماۋعا شاقىردى.
رەسەي مەملەكەتتىك تەلەارناسى ماسكەۋدەگى وستانكينو تەلەورتالىعىنداعى ەسكە الۋ كەشىنىڭ سۋرەتتەرىن تىكەلەي ەفيردە كورسەتتى. اسىرە ۇلشىل الەكساندر دۋگين قىزىنا «ول رەسەي ءۇشىن، حالىق ءۇشىن ءولدى» دەپ قۇرمەت كورسەتتى. رەسەيلىك دەپۋتاتتار ونى «رەسەي ەگەمەندىگىنە ۇلەس قوسقان جاۋىنگەر» دەپ اتادى. دەپۋتاتتاردىڭ ءبىرى لەونيد سلۋتسكي «دەناتسيفيكاتسيالاۋ» - «اياقتالعاننان» كەيىن كيەۆتەگى الاڭدى داريانىڭ قۇرمەتىنە وزگەرتۋگە شاقىردى.

29 جاستاعى داريا دۋگينا «ورىس الەمى» تۇجىرىمداماسىن ناسيحاتتاعان اكەسىنىڭ يدەيالىق مۇراگەرى. دۋگينا ماسكەۋ مەملەكەتتىك ۋنيۆەرسيتەتىنىڭ فيلوسوفيا فاكۋلتەتىن تۇلەگى، داريا پلاتونوۆا لاقاپ اتىمەن رت جانە تسارگراد ءۇشىن ساياسات تۋرالى ماتەريالدار جازدى. ول سونىمەن قاتار «زۆەزدا» تەلەارناسىندا ساراپشى بولدى. وندا دۋگينانى Geopolitika.ru سايتىنىڭ ءوزى ايتقانداي، «ەۋرازيالىق كوزقاراستى ۇستاناتىن» شاعىن پورتالدىڭ ساياسي باقىلاۋشىسى رەتىندە تانىستىردى.

كەيبىر ساراپشىلار دۋگينانىڭ ءولىمى رەسەيدىڭ سوعىسقا دەگەن كوزقاراسىن وتىن ارى قاراي ۇرلەي تۇسەدى دەگەن دە پىكىرلەر بىلدىرۋدە.

ن.بايتۇرسىن

“The Qazaq Times”