فوتو: euroradio.fm

رەسەي ماريۋپولدە ۋكراين اسكەري تۇتقىندارىن "سوتتاۋ سايقىمازاعىن" وتكىزسە، كيەۆ پەن ماسكەۋ اراسىندا كەلىسسوز جۇرگىزۋ مۇمكىن بولمايدى. ۋكراينا پرەزيدەنتى ۆلاديمير زەلەنسكي كۇندەلىكتى كەشكىلىك جولداۋىندا وسىلاي دەپ مالىمدەدى. بۇل تۋرالى ورتالىق ازيا جاڭالىقتار قىزمەتى جازدى.

"مەملەكەتىمىزدىڭ بۇعان قاتىستى ارەكەتى تۇسىنىكتى. مىناداي سوت-سىماق وتەر بولسا، بارلىق كەلىسىمدەر مەن حالىقارالىق ەرەجەلەردى بۇزا وتىرىپ، ءبىزدىڭ ازاماتتارىمىزدى وسىنداي ساحناعا شىعارار بولسا... سول ساتتە كەلىسسوز وتكىزۋ مۇمكىن بولماي قالادى. رەسەيدىڭ ءوزى كەلىسسوز جۇرگىزۋ مۇمكىندىگىنەن ايرىلادى", - دەپ مالىمدەدى زەلەنسكي.

حالىقارالىق قاۋىمداستىق مويىنداماعان "دحر" باسشىسى دەنيس پۋشيلين بۇنىڭ الدىندا "تريبۋنالعا دايىندىق ءجۇرىپ جاتقانىن", "تريبۋنالداردىڭ ءبىرى ماريۋپولدە وتەتىنىن" ايتقان.

رەسەي مەن ۋكراينا ءباسپاسوزىنىڭ مالىمەتىنشە، رەسەي باسىپ العان ماريۋپولدە "ازوۆ" پولكىنىڭ جاۋىنگەرلەرىن سوتتايدى. رەسەي ونى تەرروريستىك ۇيىم دەپ تانىعان.

ءماريۋپولدىڭ ۋكراين مەرى ۆاديم بويچەنكو رەسەيلىكتەر ۋكراين تۇتقىندارىن 24 تامىز - ۋكراينا تاۋەلسىزدىگى كۇنى سوتتاۋى مۇمكىن ەكەنىن مالىمدەدى.

رەسەي ۋكرايناعا باسىپ كىرگەلى بەرى ەكى ەل بىرنەشە مارتە كەلىسسوز جۇرگىزگەن، بىراق ولاردىڭ ءبارى ناتيجەسىز اياقتالعان.

ۋكراينا رەسەي اسكەرىنىڭ باسىپ العان جەرلەردەن شىعۋىن تالاپ ەتسە، رەسەي ەشقايدا كەتپەيمىز دەپ وتىر.

“The Qazaq Times”