"پوليتون" باعدارلاماسىندا كونستيتۋتسياعا وزگەرتۋلەر ەنگىزۋگە بايلانىستى "جاڭا قازاقستاننىڭ" رەفەرەندۋمى قالاي ءوتتى؟ اتتى ەفير ءوتتى. اتالمىش ەفيردى ىقشامداپ بەرۋدى ءجون كوردىك.

ارايلىم نازاروۆا بۇل جولى وتكەن رەفەرەندۋمنىڭ بۇرىنعى سايلاۋلاردان ەشقانداي ايىرماشىلىعى جوق دەيدى. ونىڭ سوزىنشە، كوميسسيا مۇشەلەرى ادەتتەگىدەي فالسيفيكاتسيالار جاساعان.

«بۇل جولعى رەفەرەندۋمنىڭ بۇرىنعى سايلاۋلاردان ايىرماشىلىعى بولدى دەپ ايتا المايمىن. كوميسسيا مۇشەلەرىنىڭ ارەكەتى ادەتكە اينالىپ قالعان سياقتى. ولار جاپپاي فالسيفيكاتسيا جاساماسا دا، ونداي جاعدايلار بولدى. الماتى قالاسىندا رەفەرەندۋم ناتيجەسى 33 پايىز بولدى. رەفەرەندۋمنىڭ جالپى كورسەتكىشى وسى دەپ ويلايمىن. بۇل تاۋەلسىز باقىلاۋشىلار جۇمىسىنىڭ ناتيجەسى»، - دەيدى نازاروۆا.

عازيزا امىربەكتىڭ پىكىرىنشە، جاڭا قازاقستاننىڭ رەفەرەندۋمىندا ەشقانداي وزگەرىس بولماعان. بارلىعى بۇرىنعىشا وتكەن.

«جاڭا قازاقستان دەپ ايتىپ جاتىرمىز عوي. بىراق ونى ءالى كورىپ وتىرعان جوقپىز. شىنداپ كەلگەندە، وسىعان دەيىن وتكەن پارلامەنت، پرەزيدەنت سايلاۋى كەزىندەگى بيلىكتىڭ ارەكەتتەرى بۇل جولعى رەفەرەندۋمدا دا وزگەرگەن جوق. ۋرناعا بيۋللەتەندى توپتاپ تاستاۋ، ءبىر ادامنىڭ بىرنەشە رەت داۋىس بەرۋى. تاۋەلسىز باقىلاۋشىلاردى سايلاۋ ۋچاسكەسىنەن شىعارىپ جىبەرۋ فاكتىلەرى بولدى. باياعى جارتاس، سول جارتاس قالپىندا قالدى»، - دەيدى امىربەك.

ماكس بوقاەۆ رەفەرەندۋمعا بارعان جوقپىن دەيدى. ونىڭ سوزىنشە، وعان بارۋدىڭ ءمانى جوق.

«مەن رەفەرەندۋمعا داۋىس بەرۋگە بارعان جوقپىن. بارۋدىڭ قاجەتى جوق دەپ ويلادىم. ال تاۋەلسىز باقىلاۋشى بولا المايمىن. سەبەبى وعان سوتتىڭ ۇكىمىمەن ماعان تىيىم سالىنعان... توقاەۆ رەفەرەندۋم وتكىزۋ ارقىلى جەرگىلىكتى ەليتالاردى تەكسەردى. بۇرىنعى سايلاۋ جۇيەسى جۇمىس ىستەپ تۇرعانىنا كوز جەتكىزدى»، - دەيدى بوقاەۆ.

;t=560s