ساياسي بەلسەندى ەرمەك نارىمباي زارەچنىي تۇرمەسىنە اۋىستىرىلدى

ونىڭ سوزىنە قاراعاندا، بەلسەندى 17 اقپاندا كۇندىز اتالعان اباقتىعا ەتاپپەن جەتكىزىلگەن.

– شەكارانى زاڭسىز كەسىپ ءوتۋ بويىنشا سوتقا دەيىنگى تەرگەۋ امالدارى باستالدى. (قازاقستاندا بوستاندىعى شەكتەلگەن بەلسەندى 2016 جىلى ەلدەن كەتىپ قالعان – رەد.) ول سول كەزدە ءوزىنىڭ شەكارانى قالاي كەسىپ وتكەنىن ايتقان. سودان سوڭ ءىز قوزعالعان. ول ەلدە بولماعاندىقتان ءىس توقتاپ قالعان ەدى. قازىر قايتادان جانداندى. ۇقك-دان تەرگەۋشى كەلدى. قازىر سول تەرگەۋگە كەتىپ بارا جاتىرمىن. تەرگەۋشى ودان سۇراق-جاۋاپ الادى، – دەدى ادۆوكات.

2015 جىلعى قازاندا قازاقستان سوتى ازاماتتىق بەلسەندىلەر ەرمەك نارىمباي مەن سەرىكجان مامبەتاليندى مۇرات تەلىبەكوۆتىڭ "ۆەتەر س ۋليتسى" كىتابىنىڭ ءۇزىندىسىن الەۋمەتتىك جەلىگە جاريالاعانى ءۇشىن سوتتاعان. "الاۋىزدىق تۋدىردى" دەگەن ايىپ تاعىلعان نارىمباي ءۇش جىلعا، مامبەتالين ەكى جىلعا بوستاندىعىنان ايىرىلعان.

قازاقستاندىق قۇقىق قورعاۋشىلار قاماۋداعى نارىمباي مەن مامبەتاليندى "ساياسي تۇتقىندار" تىزىمىنە ەنگىزگەن. كەيىن ەكەۋى دە ىسىنە "وكىنەتىنى" جايلى حات جاريالادى. نارىمباي تەرگەۋ اباقتىسىندا ءبىر ايدان استام ۋاقىت اشتىق جاريالاپ جاتتى، 2016 جىلعى 22 اقپاندا سوت ونى ءۇي قاماعىنا اۋىستىرعان سوڭ بەلسەندى اشتىعىن توقتاتتى. كەيىن اپەللياتسيا سوتى ونىڭ جازاسىن جەڭىلدەتىپ، ەركىندىگىن ءۇش جىلعا شەكتەۋگە الماستىرعان. 2016 جىلعى شىلدەدە ەرمەك نارىمباي قازاقستاننان بيلىكتىڭ رۇقساتىنسىز ۋكرايناعا كەتىپ قالدى.

ول بيىل اقپان ايىنىڭ باسىندا قازاقستانعا ورالعان كەزدە الماتى اۋەجايىنان بىردەن پوليتسيا بولىمشەسىنە جەتكىزىلىپ، سوڭىنان قامالدى. ادۆوكاتتىڭ ايتۋىنشا، ونىڭ ءالى وتەلمەگەن 2 جىل 5 اي جازاسى بار. قورعاۋ تارابى ونى بوساتۋعا كۇش سالاتىنىن ايتقان.

ەرمەك نارىمباي 2010 جىلعى 1 مامىردا الماتىدا سول كەزدەگى قازاقستان پرەزيدەنتى نۇرسۇلتان نازارباەۆتىڭ وتستاۆكاعا كەتۋىن تالاپ ەتكەن دەموكراتيالىق كۇشتەر جيىنىندا "نازارباەۆ، كەت!" دەپ ۇرانداعان. سول كۇنى كەشكە ونى پوليتسيا ۇستاپ اكەتىپ، ء"تارتىپ بۇزدى" دەگەن ايىپپەن 15 تاۋلىككە قاماعان. كەيىن قاماۋدا وتىرعان بەلسەندىگە "سوتقا قۇرمەت كورسەتپەدى" جانە "پوليتسەيلەرگە قارسىلاسىپ، كۇش كورسەتتى" دەگەن ايىپتار تاعىلدى. الماتىنىڭ بوستاندىق اۋداندىق سوتى وسى ەكى ايىپ بويىنشا 2010 جىلعى 26 ماۋسىمدا ەرمەك نارىمبايدى ءتورت جىلعا بوستاندىعىنان ايىردى. 2012 جىلعى 25 اقپاندا بيلىك راقىمشىلىق جاساپ ونى قاماۋدان بوساتقان.