كورنەكى سۋرەت. فوتو: كوممەرسانت / ۆاسيلي نەستەرەنكو

الماتى قالاسىنىڭ المالى اۋدانىندا Aquastars باسسەيندەر جەلىسىنىڭ بىرىندە وننان استام بالا ۋلانىپ، «بالالار شۇعىل مەديتسينالىق جاردەم ورتالىعىنا» جەتكىزىلگەن. بۇل تۋرالى اقپارات قۇرالدارى حابارلادى.

قالالىق سانيتارلىق-ەپيدەميولوگيالىق باقىلاۋ قىزمەتى دەپارتامەنتى تاراتقان اقپارات بويىنشا، دارىگەرلەر 17 ادامدى قاراپ، 14 بالانىڭ ون ءبىرى اۋرۋحاناعا جەتكىزىلگەن. ولاردىڭ جاعدايى ورتاشا دەپ ايتىلادى.

جۇزۋگە باۋلۋ شەبەرلىك ساباعى كەزىندە 12 مەن 14 جاستاعى بالالار حلور بۋىنا ۋلانعان. الدىن الا اقپاراتقا قاراعاندا، دوزالاۋ ستانتسياسىنان اقاۋ پايدا بولىپ، باسسەيندى تازالايتىن «ەموۆەكس» سۇيىتىلعان حلورىنىڭ مولشەرى قالىپتى نورمادان اسىپ كەتكەن.

«تەرگەۋدىڭ الدىن الا مالىمەتتەرى بويىنشا، باسسەين وكىلىنىڭ ايتۋىنشا، ءبىر اپتا بۇرىن سۋدى حلورلاۋ بويىنشا جاڭا اپپارات ورناتىلعان، ول كەنەتتەن ىستەن شىعىپ، حلور باسسەين سۋىنا ارالاسىپ كەتكەن»، – دەلىنگەن دەپارتامەنت حابارلاماسىندا.

قازىرگى كەزدە داتچيك اۋىستىرىلعان. وقيعا ورنىندا توتەنشە جاعداي ماماندارى جۇمىس ىستەپ جاتىر. اۋا مەن سۋدىڭ قۇرامى تەكسەرىلەدى.

الماتى پوليتسيا دەپارتامەنتى بالالاردىڭ ۋلانۋ فاكتىسى قىلمىستىق كودەكستىڭ 306-بابى («قاۋىپسىزدىك تالاپتارىنا جاۋاپ بەرمەيتىن تاۋارلاردى شىعارۋ نەمەسە ساتۋ، جۇمىستاردى ورىنداۋ نە قىزمەتتەردى كورسەتۋ») بويىنشا سوتقا دەيىنگى تەرگەپ-تەكسەرۋدىڭ بىرىڭعاي تىزىمىنە تىركەلگەنىن حابارلادى. قىلمىستىق ءىس بويىنشا ءىس جۇرگىزۋدى المالى اۋداندىق پوليتسيا باسقارماسى جۇرگىزەدى.

The Qazaq Times