الماتى قالاسىندا تىركەلمەگەن دەمپارتيانىڭ كەزەكتى ميتينگىسى ءوتتى. اباي ەسكەرتكىشىنىڭ تۇبىندە جينالعان بەلسەندىلەر بۇعان دەيىن حابارلانعانداي نەگىزگى ءۇش تالاپتى كوتەردى. «ساياسي تۇتقىندارعا بوستاندىق بەرۋدى»، «ۇكىمەتتىڭ ەلەكتروندى پلاتفورماسىن رەسەيلىك كوماپنيا كومەگىمەن ترانسفورماتسيالاۋعا قارسىلىق»، «مەملەكەتتىك ءتىلدى قورعاۋ» سياقتى تالاپتارمەن وتكەن جيىندا جانە قالانىڭ ورتالىق اۋماعىندا ءموبيلدى ينتەرنەت بۇعاتتالدى.
رەداكتسيا ءتىلشىسى ساعات 11.45 شاماسىندا قالا اكىمدىك ماڭايىندا ءموبيلدى ينتەرنەت ىستەمەۋىنىڭ سەبەبىن سۇراپ ۇيالى وپەراتورعا حابارلاسىپ كوردى. Activ («كسەلل» اق) بايلانىسىنىڭ كولل ورتالىق مامانى «قر بايلانىس تۋرالى زاڭىنىڭ» 41-1-بابى («بايلانىس جەلىلەرىنىڭ جانە (نەمەسە) قۇرالدارىنىڭ جۇمىسىن توقتاتا تۇرۋ ءتارتىبى») بويىنشا تەرروريزم قاۋپىنە قاتىستى قۇزىرلى ورگانداردىڭ تاپسىرماسىمەن ۋاقىتشا، بەلگىسىز مەرزىمگە دەيىن جۇمىس ىستەمەيتىنىن» جەتكىزدى.
پوليتسيا بەيرەسمي دەمپارتيا جاقتاستارىن بەلگىلەنگەن ورىندا ۇستاۋعا تىرىستى، ابزال دوستياروۆتى اۆتوزاكپەن اكەتتى. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
ميتينگ باستالارعا بىرەر ءسات قالعاندا پوليتسيانىڭ بەلسەندى ارۋجان دۇيسەباەۆانى ۇستاعانى حابارلاندى. پوليتسيا نارازىلاردىڭ قولىنداعى پلاكاتتار مەن رۋپوردى كۇشپەن تارتىپ الدى. جانبولات ماماي، ابزال دوستياروۆ پەن نۇربول بايتەرەكوۆ ۇشەۋىن اباي-دوستىق كوشەلەرىنىڭ قيىلىسىنا كەلگەن كەزدە ارنايى جاساقتىڭ 20 شاقتى ساربازى تاپ بەردى. دەمپارتيا جاقتاستارى تەكەتىرەسكە ءتۇسىپ، ماماي مەن بايتەرەكوۆتى الىپ قالدى. وموندىقتار ابزال دوستياروۆتى ۇستاپ اكەتتى. وعان دەيىن ىرىسبەك توقتاسىن ميتينگ قارساڭىندا 15 تاۋلىككە قاماۋعا سوتتالعان ەدى.
ميتينگتىڭ العاشقى كەزەڭىندە بەلسەندىلەر كەزەكتەسىپ تالاپ-پىكىرلەرىن ءبىلدىردى. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
ميتينگكە جينالعاندار بيلىكتى سىنادى. ولار «تاۋەلسىزدىككە قاۋىپ توندىرگەن» نازارباەۆ رەجيمىنىڭ «بيلىكتەن تولىقتاي كەتۋىن» تالاپ ەتىپ، «نازارباەۆ كەت!» دەپ ۇرانداستى. سونىمەن قوسا، «ارون اتابەك باستاعان ساياسي تۇتقىندارعا بوستاندىق بەرىلسىن»، «اەس سالۋ اسكەري قويماعا يە بولا المايتىن بيلىكتىڭ ءىسى ەمەس»، «سبەر كەرەك ەمەس، وتاندىق مامانداردىڭ شاماسى كەلەدى»، «قىتايدىڭ يندۋستريالىق-دەموگرافيالىق ەكسپانسياسىنا جول جوق»، «الەۋمەتتىك جەلىدەن قولىڭدى تارت» دەگەن تالاپ-لوزۋنگتەر ءجيى قايتالاندى.
«تاۋەلسىزدىك دەگەنىمىز نازارباەۆتىڭ وتباسى مەن ونىڭ اينالاسىنداعىلاردى بايىتۋعا ارنالعان قۇرال ەمەس. ول بۇكىل قازاقستاندىقتاردىڭ قۇندىلىعى، ونى قورعاۋ كەرەك»، – دەدى باستاماشىل توپ جەتەكشىسى جانبولات ماماي.
بۇل جولى دا وقيعا ورنىنا قوعامدىق كولىكتەر اكەلىندى. ساقشىلار جاياۋ جۇرگىنشىلەردىڭ ءجۇرىپ-تۇرۋىن شەكتەپ، اۋماققا وتۋىنە تىيىم سالدى. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
وقيعا ورنىندا بولعان رەداكتسيا تىلشىلەرى اباي مەن دوستىق كوشەلەرىنىڭ ماڭىن پوليتسيا كۇزەتىپ تۇرعانىن، تۇرعىنداردى جيىن ماڭايىنا وتكىزبەي جاتقانىن كوردى. وقيعا ورنىندا پوليتسيا دەپارتامەنتى باستىعىنىڭ ورىنباسارى نۇرلان الماسبەكوۆ پەن قوعامدىق دامۋ باسقارماسى باسشىسىنىڭ ورىنباسارى ايدار ەسەنبەكوۆ ءجۇردى.
كۇشتىك قۇرىلىم وكىلدەرى بۇل جولى دا قوعامدىق كولىكتەردى يگىلىگىنە پايدالاندى. «الماتىەلەكتروترانس» جشس اۆتوپاركىنە تيەسىلى №86 باعىتتاعى مارشۋرتتىڭ بىرنەشە اۆتوبۋس پوليتسيا نۇسقاۋىمەن ەسكەرتكىشتىڭ الدىنا قويىلدى. ىشىنە ادەتتەگىدەي قۇزىرلى ورگان وكىلدەرى بەل جازىپ، وتىرۋعا كىرىپ-شىعىپ ءجۇردى. پوليتسيانىڭ قوعامدىق تاسىمالداۋ قىزمەتىنىڭ كولىكتەرىن قولدانۋى قانداي دا ءبىر قۇقىقتىق نەگىزدە كەلىسىمشارت بويىنشا زاڭداستىرىلعان با دەگەن سۇراققا رەداكتسيا ەكى ايدان بەرى جاۋاپ الا الماي كەلەدى.
(بۇعان دەيىن 6 شىلدەدە وتكەن سانكتسيالانباعان ميتينگتە ارنايى جاساق پەن پوليتسيا اتالعان كومپانياعا قارايتىن №32 باعىتتاعى مارشرۋتتىڭ ءتورت-بەس اۆتوبۋسىن پايدالانعان. سوعان بايلانىستى رەداكتسيا قالالىق اكىمدىك پەن پوليتسيا دەپارتامەنتىنە سۇراۋ حات جولداعان، دەسە دە ءالى كۇنگە دەيىن جاۋاپ بەرىلمەدى – QT)
شەرۋگە ۇلاسقان نارازىلىق اكتسياسىنا 40 شاقتى بەلسەندى قاتىستى. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
ءتالتۇس كەزىندە، ساعات 13.30-تە بەلسەندىلەر دوستىق داڭعىلى بويىمەن ش.ءۋاليحانوۆ ەسكەرتكىشىنە، كەيىن تاۋەلسىزدىك مونۋمەنتىنە قاراي شەرۋلەتىپ باردى. كەيىننەن جەلتوقسان، اباي، ماسانچي كوشەلەرىنىڭ جيەگىمەن الماتى قالالىق پوليتسيا دەپارتامەنتىنە قاراي بەتتەدى. جول-جونەكەي جوعارىدا اتالعان تالاپتارىن ايتا ءجۇردى.
نارازىلار قالا ىشىندە 10 شاقتى شاقىرىم جاياۋ ءجۇرىپ تالاپتارىن ۇرانداسىپ ايتتى. جولدا كەزىككەن وزگە تۇرعىندار قالتا تەلەفونىنا تاسپالاۋعا تىرىستى. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
شەرۋلەتكەن توپتى الماتى قالالىق پوليتسيا دەپارتامەنتى باستىعىنىڭ ورىنباسارى رۋستام ءابدراحمانوۆ كۇتىپ الدى. ول دەپارتامەنت عيماراتىنىڭ الدىنا كەلگەن نارازىلارعا جاقتاستارىنىڭ بوساتىلمايتىنىن، سوت شەشىمى بويىنشا ارەكەت ەتەتىنىن مالىمدەدى.
«اكىمشىلىك قۇقىق بۇزعانى ءۇشىن اكىمشىلىك جاۋاپقا تارتىلىپ جاتىر. كەيبىر بەلسەندى 25 تامىزداعى ساداقا-اسقا قاتىسقان. ابزال جانە داۋرەن دوستياروۆتار 6 شىلدە كۇنگى ميتينگكە شىققانى ءۇشىن اكىمشىلىك سوت شەشىم شىعاردى. بۇل كىسىلەر مۇندا جوق، ...زاڭ بۇزعاندىقتان اكىمشىلىك قاماۋعا الىندى» دەدى ءابدراحمانوۆ.
الماتى قالالىق پوليتسيا دەپارتامەنتى باستىعىنىڭ ورىنباسارى رۋستام ءابدراحمانوۆ پەن دەمپاريالىقتار ۇستالعان بەلسەندىلەر تۋرالى ءسوز تالاستىردى. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
ونداعان ادام بەلسەندىلەر بوساتىلمايىنشا كەتپەيتىنىن ايتىپ، ەسىك الدىندا كۇتىپ وتىردى. نارازىلار ابزال دوستياروۆتىڭ كەيىنگى كەزدە ءۇش رەت قاتارىنان قامالعانىن ەسكە الىپ، كونستيتۋتسيالىق باستى قۇقىقتارىنا نۇقسان كەلگەنىن ايتتى. ساعات 15.30-دان اسقاندا دەپارتامەنت باسشىلىعى ارۋجان دۇيسەباەۆا مەن گۇلنار مەيىرمانبەتوۆانىڭ بوساتىلاتىنىن، ال ابزال-داۋرەن دوستياروۆتاردى بوساتۋ ءۇشىن قورعاۋشىلارى اپپەلياتسياعا شاعىم ءتۇسىرۋ قاجەتتىگىن حابارلادى.
جاقتاستارىنىڭ بوساتىلۋىن تالاپ ەتىپ تۇرعان دەمپارتيا مۇشەلەرى. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
سونىمەن قوسا، دەپارتامەنت باسشىسىنىڭ ورىنباسارى ءابدراحمانوۆ قوعامدىق كولىكتەردى ارنايى قۇزىرلى ورگانداردىڭ قىزمەتىنە تارتىلعانىنان بەيحابار ەكەنىن مالىمدەپ، ماسەلەنىڭ جاي-جاپسارى مەن زاڭدىلىعى جونىندە رەداكتسياعا جاۋاپ بەرۋگە ۋادە بەردى.
جەرگىلىكتى ينتەرنەت-بايلانىستى بۇعاتتاۋى مۇمكىن پوليتسيانىڭ اقپاراتتىق بارلاۋ كولىگى. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
ادەتتەگىدەي «فورماسىز بارلاۋشىلار» ميسسياسىن مۇلتىكسىز اتقاردى. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
دەمپارتيا باستاماشىل توبى جول بويىندا وزگە ازاماتتاردى ەلدەگى ساياسي ومىرگە ارالاسۋعا جانە ادام قۇقىقتارىنىڭ بۇزىلۋىنا بەيجاي قاراماۋعا ۇندەپ باقتى. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
بەلسەندىلەرگە قۇقىق قورعاۋ ورگاندارىنىڭ فورماداعى جانە فورماسىز ءتۇرلى لاۋازىمداعى قىزمەتكەرلەرى ەرىپ ءجۇردى. قالت جىبەرمەي بەينە-فوتو جازبا جۇرگىزدى. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
اباي داڭعىلىنىڭ بويىمەن كەتىپ بارا جاتقان شەرۋشىلەر. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
اباي مەن شوقاننىڭ ەسكەرتكىشىنەن كەيىن تاۋەلسىزدىك مونۋمەنتىنە كەلىپ، ارى قاراي قالالىق پد عيماراتىنا بەتتەگەن دەمپارتيالىقتار. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
الماتى قالاسىنىڭ پوليتسيا دەپارتامەنتى الدىنا كەلگەن نارازىلار بەلسەندىلەردىڭ بوساتىلۋىن تالاپ ەتىپ وتىر. الماتى قالاسى. 18 قىركۇيەك 2021 جىل. فوتو: QT / كۇلتەگىن اسپانۇلى
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
ارمان الىمبەكوۆ: مەن ول جەردىڭ رەزيدەنتسيا ەكەنىن بىلمەدىم. ەشنارسە بۇلدىرمەدىم.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى
رەزيدەنتسيا ءىسى. ورىنعازى سەرىكبول: بەيبىت شەرۋگە شىقتىم. ال، 269 باپتى مويىندامايمىن
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى
