نۇرسۇلتان نازارباەۆقا سانكتسيا سالۋدى تالاپ ەتىپ تۇرعان قۇقىق قورعاۋشى ءاليما ءابدىروۆا. اقتوبە، 16 قىركۇيەك 2021 جىل. فوتو: Azattyq.org / جاڭاگۇل ءجۇرسىن

كەشە، 16 قىركۇيەكتە قۇقىق قورعاۋشى ءاليما ءابدىروۆا اقتوبە وبلىسى اكىمدىگى الدىندا جالعىز ادامدىق پيكەت وتكىزىپ، ەۋرووداقتان قازاقستاننىڭ ەكس-پرەزيدەنتى نۇرسۇلتان نازارباەۆقا سانكتسيا سالۋىن سۇرادى. بۇل جايلى ازاتتىق راديوسى جازدى. 

باسىلىم اقپاراتىنا قاراعاندا، ءابدىروۆا "قازاقستاندى وتىز جىلعا جۋىق باسقارعان نۇرسۇلتان نازارباەۆ پەن ول تاعايىنداعان سوتتار ادام قۇقىعىن جۇيەلى تۇردە بۇزىپ وتىر" دەپ سانايدى.

"وسى پيكەتتى وتكىزۋ ءۇشىن قالا اكىمدىگىنە بىرنەشە رەت ارىزداندىم. باسىندا اكىمدىك جالعىز ادامدىق، بەيبىت اكتسيانى وتكىزۋگە تىيىم سالدى. ولار "ەلباسى تۋرالى" زاڭعا سۇيەنىپ، ەلباسىنىڭ قولسۇعىلماۋشىلىعىن العا تارتتى. بىراق اڭگىمە سىرتقى ساياسات تۋرالى. ەۋروداقتىڭ "ەلباسى تۋرالى" زاڭعا قاتىسى جوق. ياعني، نازارباەۆقا سانكتسيانى ەۋرووداق سالا الادى. مەن سونى سۇراپ شىعىپ تۇرمىن" دەدى ءاليما ءابدىروۆا.

ءابدىروۆانىڭ ازاتتىققا ايتۋىنا قاراعاندا، پيكەت وتكىزۋگە قالا اكىمدىگى رۇقسات بەرگەنىن. مۇنا قالا اكىمدىگى دە راستاعان. پيكەتتىڭ ءبىرىنشى كۇنى وزدەرىن "اكىمدىكتەنبىز" دەپ تانىستىرعان بىرنەشە ادام ءابدىروۆانى سىرتتاي باقىلاپ، ۆيدەوعا ءتۇسىردى.

ازاتتىقتىڭ جازۋىنشا، اقتوبەلىك قۇقىق قورعاۋشىلار ءاليما ءابدىروۆا مەن ولگا كليمونوۆا مۇنداي نارازىلىق شارالارىن كوپتەن بەرى وتكىزىپ كەلەدى. بىلتىر قىركۇيەكتە ولار اقتوبەدەگى قالا اكىمدىگىنە بارىپ، "قۇقىق قورعاۋشىلار مەن ولاردىڭ وتباسى مۇشەلەرىنە جۇيەلى تۇردە قىسىم جاسايتىن" بيلىككە نارازىلىق بىلدىرگەن.

The Qazaq Times