«كوز الدىمىزدا سولىپ بارادى». جارىلىستان كەيىن رەانيماتسياعا تۇسكەن اسكەريدىڭ تۋىستارى استانادان كومەك سۇرايدى

جامبىل وبلىسى بايزاق اۋدانىنداعى №28349 اسكەري بولىمىندە بولعان جويقىن جارىلىستان جاراقاتتانعان ءجۇز شاقتى ادامنىڭ ىشىندە قازىر جاعدايى ەڭ اۋىرى – ءبولىم باستىعى كاپيتان ەرلان قىرعىزاليەۆتىڭ تۋىستارى استانا دارىگەرلەرىنىڭ كەلىپ كومەكتەسۋىن سۇرايدى.

دەنەسىن 85%-ىن كۇيىك شالعان ءارى اپات سالدارىنان ەكىجاقتى پنەۆمونياعا شالدىققان اسكەري قىزمەتكەردىڭ احۋالى اۋىر. قىرعىزاليەۆتىڭ حالىنە الاڭداعان جاقىندارى توتەنشە جاعداي تۋرالى الەۋمەتتىك جەلىدە تۇراقتى تۇردە اقپارات تاراتىپ وتىرعان جۋرناليست يرينا سوۆەتجانقىزىنا حات جازىپ، جاعدايدى بايانداعان.

«قان قىسىمى تۇراقسىز، جاعدايىن كۇننەن-كۇنگە ناشارلاپ، ءومىر مەن ءولىمنىڭ اراسىندا جانتالاسىپ جاتقان باۋىرىمىزدى قاراۋعا استانادان، سىرتتان بىلىكتى دارىگەرلەر شاقىرىلسىن. تەلەارنادان «مىقتى مامانداردى تارتتىق» دەپ ەسەپ بەرىپ جاتقانىمەن، شىن مانىندە جەرگىلىكتى دارىگەرلەر عانا قاراپ جاتىر. بىزگە ونلاين كومەك ەمەس، ەلوردادان ارنايى اپپاراتتارىمەن بىلىكتى دارىگەرلەردى تارازعا الدىرۋىن تالاپ ەتەمىز»، – دەلىنگەن حاتتا.

QT رەداكتسياسى جارىلىس كەزىندە جاپا شەككەن كاپيتاننىڭ جاقىندارىنا حابارلاسىپ كوردى. سىرقاتتىڭ اپكەسى ساندۋعاش رىسقۇلبەكقىزى تىلشىگە باۋىرىنىڭ دەنساۋلىعى مەن ومىرىنە قاتتى الاڭداپ وتىرعانىن ايتادى. وقيعا ورنىندا جارالانعان كاپيتان قازىر تاراز قالاسىنداعى №1 اۋرۋحانانىڭ جانساقتاۋ بولىمىندە ءحال ۇستىندە جاتىر.

– قوسىمشا دارىگەرلەردى شاقىرتىڭىزدار دەگەن ۋاجىمىزگە ولار كەلگەندە نە ىستەيدى، ونلاين ءبارىن ءبىلىپ تۇر دەيدى. Skype ارقىلى بايلانىسىپ وتىر ەكەن. ساناۆيتسيامەن تاسىمالداۋعا جاراماي تۇر. العاشىندا ءۇش كۇنگە تيىسپەيمىز دەدى. سودان كەيىن عانا كوزىن اشىپ، سۋ سۇراعان. سول كەزدە بەتى بەرى قارادى دەپ ويلاپ قۋانعان ەدىك. ىشكى ورگاندارى قاتتى زاقىمدالعان. قازىر كىشى دارەتىنىڭ ءوزى جۇرمەي جاتىر. سويلەي المايدى. قاسىنداعى بەس جىگىتتىڭ تورتەۋى قايتىس بولدى. ەندى ەكىجاقتى پنەۆمونيا قوسىلىپتى. قاراپ جاتقان دارىگەر يۋن ۆلاديميرگە ارتار ەش وكپە، العىستان باسقا ايتارىمىز جوق. بىراق دارىگەرگە كومەك كەرەك، جالعىز ءوزى جۇگىرىپ ءجۇر. ءبىز استانادان ارنايى سالالىق كاسىبي بىلىگى جوعارى ماماندار كەلىپ قاراسا ەكەن دەيمىز، جاعدايى اۋىر جالعىز پاتسيەنتكە كومەكتەسپەسە، ۇكىمەتتەن نە پايدا؟ ونلاين ەمەس، كەلىپ قاراسىن. قازىر مەملەكەت، ەڭ باستىسى، ءبىر ءۇيدىڭ ارقاسۇيەرىن اياققا تۇرعىزىپ بەرۋگە بارىن سالسىن! – دەيدى اشىنعان اپكەسى.

ساندۋعاش قىرعىزاليەۆانىڭ ايتۋىنشا، باۋىرىنىڭ ءتورت بالاسى بار، الدى 13, كەنجەسى 2,5 جاستا. بايزاق اۋدانى سارىكەمەر ەلدى مەكەنىندە تۇرادى. وسىعان تاياۋ قاينار اۋىلىنىڭ تۇبىندەگى اسكەري بولىمگە بىلتىر عانا قىزمەتكە ورنالاسقان. وعان دەيىن اقتاۋ قالاسىندا كەلىسىمشارت نەگىزىندە 5 جىل اسكەري قىزمەتتە بولعان. جارىلىستان كەيىن كاپيتاننىڭ وتباسىنا ەشكىم حابارلاسپاعان. «تەك ءتورتىنشى كۇنى تۇنگى 00.00-دە وكرۋگ اكىمدىگىنەن قوڭىراۋ شالىپ، جەكە كۋالىگىنىڭ فوتوسىن سۇراتتى» دەيدى. ەرلاننىڭ اناسى بۇعان قاتتى ىزالانىپ، مازاسى قاشقان.

جامبىل وبىلسىنداعى اسكەري قويمادا بولعان جويقىن جارىلىستان جاپا شەككەندەردىڭ باسىم بولىگى جەتكىزىلگەن تاراز قالاسىنىڭ كوپسالالى اۋرۋحاناسى. 31 تامىز 2021 جىل. فوتو: QT / كۇلتەگىن اسپانۇلى

رەداكتسيا ءتىلشىسى دەنساۋلىق ساقتاۋ مينيسترلىگى مەن وبلىستىق دەنساۋلىق ساقتاۋ باسقارماسىنا جاعدايدىڭ ءمان-جايىن سۇراپ حابارلاسىپ كوردى. ۆەدومستۆو سىرقاتتىڭ ءحالى بويىنشا بەرگەن رەسمي اقپاراتىندا ازىرگە ونلاين كونسيليۋممەن شەكتەلىپ وتىرعانىن راستادى.

اۋرۋحانا اكىمشىلىگى زارداپ شەككەن ناۋقاس ەرلان قىرعىزاليەۆتىڭ شۇعىل تۇردە «ارالاس جاراقات» دياگنوزىمەن جانساقتاۋ بولىمىنە جاتقىزىلدى. 3 دارەجەلى شوك، كۇيىك اۋرۋى، دەنەنىڭ تۇگەلدەي 1-2-3 دارەجەلى تەرميالىق كۇيىك شالىپ، تەرى جابىنىنىڭ 85%-ى كۇيگەن، 1-2 دارەجەلى تىنىس جولدارىنىڭ كۇيىگى. باس، مويىن، ماگيسترالدىڭ جانە ەكى اياق بىرنەشە رەت جاراقاتتانعان. جابىق باس سۇيەك-مي جاراقاتىن الىپ، باس ميى شايقالعان. كونتۋزياعا قوسا كونيۋنكتيۆانىڭ تەرميالىق كۇيىگىنە شالدىققان، تاعى قاباقتىڭ ەروزياسى بار. مەديتسينالىق كومەكتىڭ مۇنداي ءتورتىنشى دەڭگەيىنە تاسىمالداۋ مۇمكىن ەمەس. اۋرۋحاناعا تۇسكەن كەزدەن باستاپ مەديتسينالىق كومەك رەانيماتولوگ، تراۆماتولوگ، كومبۋستيولوگ، نەيروحيرۋرگ، لور-دارىگەرى، تەراپەۆت، وفتالمولوگ، نەفرولوگ-ەففەرەنتولوگ ماماندارىنىڭ مۋلتيديستسيپلينارلىق توبىمەن جۇزەگە اسىرىلادى، – دەلىنگەن رەسمي جاۋاپتا .

ناقتىراق ايتقاندا، وبلىستىڭ جەتەكشى ماماندارىنىڭ قاتىسۋىمەن كۇنىنە ەكى رەت كونسيليۋم وتەدى جانە بەكىتىلگەن حاتتاماعا ساي ەمدەۋ جالعاسىپ جاتىر دەيدى. پاتسيەنتكە ۋلترافيلتراتسيامەن گەموفيلتراتسيا جۇرگىزىلگەن.

باسقارما پاتسيەنتتى ەمدەۋ نۇسقاۋى «ەلدەگى بىلىكتى ماماندار – مەديتسينا عىلىمدارىنىڭ دوكتورى ب. جارقىنباەۆپەن جانە مەديتسينا عىلىمدارىنىڭ دوكتورى گ. اعىباەۆپەن كۇندەلىكتى تەلەمەديتسينا سەانستارىندا ءۇشمۇو جانە ۇتو عزي ورتالىعىمەن (ۇلتتىق شۇعىل مەديتسينانى ۇيلەستىرۋ ورتالىعى جانە ۇلتتىق تراۆماتولوگيا جانە ورتوپەديا عىلىمي زەرتتەۋ ينستيتۋتى) كەلىسىلەدى» دەپ حابارلادى.

اۋرۋحانانىڭ باس دارىگەرى نۇرلان ابىلداەۆ QT رەداكتسياسىنا بەرگەن جاۋابىندا جاعداي دەنساۋلىق ساقتاۋ مينيسترلىگى مەن وبلىستاعى باسقارمانىڭ باقىلاۋىندا ەكەنىن ايتتى. ونىڭ سوزىنشە، رەسپۋبليكالىق سانيتاريالىق اۆياتسيا ورتالىعىنا رەانيماتولوگ، كومبۋستيولوگ، ەففەرەنتولوگتىڭ كۇندىزگى كونسۋلتاتسياسى تۋرالى ءوتىنىم بەرىلگەن.

بيلىك 26 تامىزدا جامبىل وبلىسىندا اسكەري قويمادان شىققان الاپات ءورت پەن جارىلىستان قازا تاپقانداردىڭ ءبىر بولىگىن ماراپاتتاپ ۇلگەردى. ال وزگە مارقۇمدار مەن زارداپ شەككەن قاۋىپسىزدىك-اسكەري قىزمەتكەرلەرگە ناقتى قانداي سىي-كومەك بەرىلەرى ازىرگە بەلگىسىز.

The Qazaq Times