اقش-جاپون كەلىسىمىن جۇزەگە اسىرۋ جولدارى بەيمالىم

18 ءساۋىر، امەريكا قۇراما شتاتتارى مەن جاپونيا اراسىندا ءۇش جاقتى ساۋدا ارىپتەستىك-سەلبەستىك كەلىسسوزىن جاساۋعا كەلىستى. بۇل كەلىسسوز ديالوگىن اقش ۆيتسە-پرەزيدەنتى مايك پەنس (Mike Pence) پەن جاپونيا پرەمەر-ءمينيسترىنىڭ ورىنباسارى تارو اسو (Taro Aso) توكيادا وتكىزبەكشى. بۇل تۋرالى تانىمال “The Wall Street Journal” باسىلىمى حابارلايدى.

ەكى ۇكىمەتتىڭ بىرلەسكەن مالىمدەمەسىندە، بولاشاقتا اقش-جاپون ەكونوميكالىق سەلبەستىگىنىڭ ءۇش نەگىزگى تاعانى بولادى، ولار – ساۋدا جانە ينۆەستيتسيالىق رەگلامەنتتەرىنىڭ بىرىڭعاي ستراتەگياسى; ەكونوميكا جانە ساياسي قۇرىلىمدىق ىنتىماقتاستىق; دامۋ ماقساتىنداعى جۇمىسپەن قامتۋدى جۇزەگە اسىرۋدىڭ ناقتى سالالارداعى ىنتىماقتاستىعى قاتارلىلار دەپ كورسەتتى.

الايدا مالىمدەمەدە وسى ىنتىماقتاستىق جاساۋ جوسپارلارىنىڭ ناقتى قانداي سالالاردا جۇزەگە اساتىندىعى تۋرالى ايتىلمادى. سونىمەن بىرگە ترامپ جانە وزگە دە اق ءۇي شەندىلەرى ايتىپ جۇرگەن اقش اۆتوكولىكتەرىنىڭ جاپون نارىعىنداعى ۇلەس سالماعىنىڭ تومەندىگى تۋرالى دا ءسوز بولعان جوق. بىرلەسكەن ءباسپاسوز جينالىسىنا قاتىسقان تانىمال باسىلىم تىلشىلەرى قاناعاتتاندىرارلىق جاۋاپ الا الماعانىن ايتادى. ايتالىق، بولاشاق اقش-جاپون ىنتىماقتاستىعى، اعىمدا قولدانىلىپ جاتقان اقش-وڭ.كورەيا اراسىنداعى ەركىن ساۋدا كەلىسىمى قالىبىمەن ىسكە اسا ما دەگەن سۇراقتارعا دا جاۋاپ جوق. كەلىسسوزدىڭ باستى مىندەتى تەك ەكى جاقتى ساۋدا كەلىسىمىنە قول قويۋ عانا بولعانداي.

ال، ەكى ەل وكىلى ءبىر اۋىزدان وسى قىسقا مەرزىمدى ساۋدا كەلىسىمى ايتارلىقتاي ناتيجە كورسەتەدى دەپ وتىر. پەنس پەن تارو بيىل جىل سوڭىنا دەيىن تاعى ءبىر مارتە كەڭەيتىلگەن كەلىسسوز وتىرىسىن جوسپارلاعانىن ايتتى.

The Qazaq Times