اقش پەن ءۇندىستان ديپلوماتيا جانە قورعانىس سالاسىنداعى ىنتىماقتاستىقتى بارعان سايىن دامىتىپ كەلەدى. بۇل قادامدار بەيجىڭنىڭ ارتا تۇسكەن ىقپالىنا قارسى جاسالعان شارالاردىڭ ءبىر پاراسى. ەكى ەلدىڭ سىرتقى ىستەر مينيسترلىكتەرى اراسىنداعى تىعىز بايلانىستان تىس، قورعانىس مينيسترلىكتەرى دە جەڭ ۇشىنان جالعاسا ءتۇستى. ايتالىق، كەشە ءسىم باسشىلارىنان بۇرىن قورعانىس مينيسترلەرى وڭاشا كەزدەستى.

اقش-ءۇندىستان اراسىنداعى بايلانىستى دامىتۋشى باستى باعدارلاما «2+2» دەپ اتالادى. ونىسى ەكى سىرتقى ىستەر جانە ەكى قورعانىس مينيسترلىكتەردىڭ بايلانىسىن دامىتۋ دەگەندى بىلدىرەدى. 26 قازان جاڭا-دەليدە «2+2» كەزدەسۋىنەن بۇرىن پەنتاگوننىڭ قازىرگى باسشىسى مارك ەسپەر مەن ءۇندى قورعانىس ءمينيسترى رەجنات سيڭح (Rajnath Singh) كەزدەستى. بۇل كەزدەسۋدىڭ ناتيجەسىندە امەريكالىق جانە ءۇندى اسكەري كۇشتەرى اراسىندا ماڭىزدى بىرقاتار كەلىسىم جاسالدى. كەلىسىم «جەدەل قاۋىپسىزدىك ماسەلەلەرىنە ارنالعان اقپارات الماسۋ» تۋرالى مىندەتتەمەلەردى دە قامتىدى.

ايتا كەتەيىك، بۇل ەسپەردىڭ اقش-ءۇندىستان اراسىنداعى «2 + 2» كەزدەسۋىنە ەكىنشى رەت قاتىسۋى، ەكى ەل وسىنداي ءۇش ديالوگ وتكىزدى.

اقش قورعانىس ءمينيسترى ەسپەردىڭ ايتۋىنشا ءۇندى-امەريكا قورعانىس ىنتىماقتاستىعىنان كوپ ءۇمىت كۇتۋگە بولادى، تاراپتار ءار ءتۇرلى قىزمەتتەر اراسىنداعى ىنتىماقتاستىقتان تارتىپ، قاۋىپسىزدىكتىڭ كوممۋنيكاتسيالىق مۇمكىندىكتەرىن جاقسارتۋ جانە لوگيستيكاداعى ءوزارا بايلانىستاردى نىعايتۋ سەكىلدى بىرقاتار باعىتتا ءونىمدى قىزمەت جۇرگىزىپ جاتىر.

بۇل رەت اقش پەن ءۇنلىستان «نەگىزگى الماسۋ جانە ىنتىماقتاستى تۋرالى» كەلىسىمگە قول جەتكىزدى. الدا ەكى قورعانىس مينيسترلىگى اراسىنداعى اقپارات الماسۋدى كەڭەيتپەك. كەلىسىم ىشىندە، «قورعانىس قاجەتتىلىگىن جەدەل دامىتۋ»، «دامىپ كەلە جاتقان تەحنولوگيالار سالاسىنداعى سەرىكتەستىكتى ىلگەرلەتۋ»، «جاھاندىق قاۋىپسىزدىك سىن-قاتەرلەرىن ورتاق شەشۋ» قاتارلى تارماقتار بار.

تاپ وسى ماسەلەلەر قىتايدىڭ ءۇندى-تىنىق مۇحيتىنداعى ىقپالىن تەجەۋدە ەكى ەلدىڭ مۇددەلى سالالارى. كەزدەسۋ كەزىندە قىتاي تاقىرىبى اشىق ايتىلماعانىمەن، ءۇندى-امەريكا ستراتەگيالىق سەرىكتەستىگىن ارتتىرۋدىڭ باستى ماقساتى – قىتاي قاتەرىنە ورتاق جاۋاپ بەرۋ.

اقش-قىتاي، ءۇندىستان-قىتاي قاتىناسى قىسقا ۋاقىتتا ناشارلاپ، شيەلەنىس قاۋىپتى دەڭگەيگە جاقىن تۇر. وسى كەزدە اقش پەن ءۇندىستان اراسىندا قارىم-قاتىناس جەدەل دامىدى. كەزەكتى «2+2» كەلىسسوزىنەن بۇرىن امەريكالىق ساراپشىلار اقش-ءۇندى قاتىناسى وسى عاسىردا دەموكراتيانى قورعاۋشى ەلدەر ءۇشىن ەڭ ماڭىزدى قارىم-قاتىناس دەپ باعالاعان بولاتىن.

“The Qazaq Times”