قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى تاعى 7,6 مىڭعا ارتىپ، جالپى ەسەبى 790 مىڭنان استى. تەك شىلدە ايىندا 154 مىڭ ادام سىرقاتتانىپ، 1932 ادام (كۆي+ 1644, كۆي- 288) قايتىس بولعان. شىلدە ايىنىڭ ورتاسىنا قاراي تاۋلىكتىك كورسەتكىشى 5 مىڭنىڭ، تامىزعا قاراي 7 مىڭنىڭ ۇستىنە شىققان ىندەتتىڭ ءتورتىنشى تولقىنى باسەڭدەمەي تۇر. تامىز ايىنىڭ وزىندە سىرقاتتانعان 148 مىڭ ادام انىقتالدى جانە 2,5 مىڭ ادام كوز جۇمدى.
دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 19 تامىزدا كوروناۆيرۋس (كۆي+) جۇققان 7348 ادام، ال 18-ءى كۇنى كوروناۆيرۋس پنەۆمونياسىنا (كۆي-) شالدىققان 339 ادام تىركەلدى جانە سارسەنبىدە 163 قازاقستاندىق اۋرۋدان قايتىس بولدى. قازىر ەلدە 122 مىڭنان اسا ادام (كۆي+ بويىنشا 117 مىڭ، كۆي- بويىنشا 5,5 مىڭ) اۋىرىپ جاتىر.
#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى ادەتتەگىدەي مىڭ شاقتى كەيستىك ديناميكادا تۇرعان الماتى (1555) قالاسى جانە قاراعاندى (954) وبلىسىنان. بۇدان وزگە استانا (918), اتىراۋدا (435), اقتوبە (426), الماتى (400) وڭىرلەرى مەن شىمكەنتتە (415) ەپيداحۋال ءتىپتى ناشارلاي تۇسكەن. پاۆلودار (351), اقمولا (287), جامبىل (265), قوستاناي (261), ماڭعىستاۋ (238), قىزىلوردا (233), شقو (203), سقو (171), بقو (135), تۇركىستان (101) وبلىستارىندا دەرت قاۋپى ءالى سەيىلە قويمادى. وسى بەيسەنبىدە اۋرۋدان ايىققان 5886 ادام ۇيىنە شىعارىلعان. 18 تامىزدا جيىنى 118 ادام قايتىس بولعان.
#COVID_پنەۆمونياسى تامىزدىڭ 18-ءى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 339 ناۋقاس ەسەپكە الىندى. ۆەدومستۆو دەرەگىنشە، سارسەنبى كۇنى سىرقاتتار شىمكەنت (84), جامبىل (44), ماڭعىستاۋ (30), الماتى (22), قىحىلوردا (22), اقتوبە (18) وبلىستارىندا كوپتەپ انىقتالعان. سونىمەن قوسا، 131 ادام ايىعىپ شىققان، تاعى 45 ادام كوز جۇمعان.
#جالپى دەنمين دەرەگىنە قاراعاندا، ەمدەلىپ جاتقان 122 مىڭنان اسا ناۋقاستىڭ 30 مىڭى اۋرۋحانادا، 92 مىڭى امبۋلاتورلىق باقىلاۋدا. 1918 ناۋقاستىڭ جاعدايى ناشار، ونداعى 551 ادامنىڭ ءحالى وتە اۋىر. بۇدان وزگە 248 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.
ەپيدكارتادا «جاسىل ايماقتاعى» تۇركىستان وبلىسىنان باسقا ءوڭىردىڭ ءبارى تۇتاستاي «قىزىل ايماقتا» تۇر.
دەنمين حابارىنشا, 11 ناۋرىز بەن 12 شىلدە ارالىعىندا پتر تەستى وڭ كورسەتكەن 1311 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.
بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 723 مىڭنان، 1 تامىزدان بىلايعى كوروناۆيرۋس پنەۆمونياسى 67 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 790 مىڭعا جەتتى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.
پاندەميا باستالعالى جالپى ۆيرۋس جۇققانداردان 14,9 مىڭ ادام (كۆي+ / U07.1 – 8106, كۆي- / U07.2 – 4174, ىلەسپە اۋرۋلاردان – 2633) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.
قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 41-ورىنعا ورنىقتى.
ۇكىمەتتىڭ سوڭعى دەرەگىنە قاراعاندا، قازاقستاندا 4,9 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 6,2 ملن-نان اسادى.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟