2212 قازاقستاندىق COVID ەكپەسىن سالدىرعاننان كەيىن كوروناۆيرۋسقا شالدىققان. بقل جونىندە 8 شىلدە كءۇءنى ورتكومدا وتكەن بريفينگتە سانيتارلىق-ەپيدەميولوگيالىق باقىلاۋ كوميتەتىنىڭ باسشىسى ايجان ەسماعامبەتوۆا مالىمدەدى.
ەسماعامبەتوۆانىڭ دەرەگىنشە، ونىڭ 1308-ءى ەكپەنىڭ 1-دوزاسىن سالدىرعاننان كەيىن، تاعى 904-ءى ەكپەنى تولىق العان العان سوڭ اۋىرعان.
جالپىحالىقتىق ۆاكتسينالاۋ ناۋقانىن 1 اقپاندا باستاعان قازاقستاندا قازىر ءتورت ءتۇرلى ەكپە سالىپ جاتىر. ولار: رەسەيلىك «سپۋتنيك V»، وتاندىق QazVac, Hayat-Vax جانە CoronaVac ەكپەلەرى. سوڭعى ەكەۋىن قىتاي كومپانيالارى ازىرلەگەن، قازىرگى تاڭدا تاۋسىلۋعا جاقىن. ددسۇ ولاردى توتەنشە جاعداي ءۇشىن ماقۇلداعان.
ايجان ەسماعامبەتوۆانىڭ ايتۋىنشا، جالپى ەكپە العاننان كەيىن ناۋقاستانىپ قالعان 0,05% ادامنىڭ سانى مىناداي:
- 2024-ءى رەسەيلىك ۆاكتسينانى (1-دوزادان كەيىن 1190, 2-دوزادان كەيىن 834),
- 40-ى QazVac-تى (21/19),
- 140-ى Hayat-Vax-تى (89/51),
- التاۋى CoronaVac-تى (بارلىعى 1-دوزادان كەيىن شالدىققان) العان.
شەنەۋنىكتىڭ بۇل ساندارىن قوسقاندا، 2210 شىعادى. بۇل شەنەۋنىكتىڭ ءوزى ايتقان ساننان ەكى ادامعا كەم.
بەيسەنبى تاڭىنداعى رەسمي دەرەككە قاراعاندا، 19 ميلليونعا جۋىق حالقى بار قازاقستاندا 2 ميلليون 283 مىڭ 761 ادام ەكپەنى تولىق سالدىرعان.
ماۋسىمنىڭ سوڭىندا ەلدە قازىر الەمگە تەز تاراپ جاتقان «ۇندىستاندىق دەلتا» شتامى تىركەلىپ، اۋرۋشاڭدىق قايتا ءورشىپ بارادى. 1 شىلدەدەن باستاپ ەلدە قىزمەت كورسەتۋ سالاسىندا جۇمىس ىستەيتىندەرگە ۆاكتسينا سالدىرۋ مىندەتتەلدى. جەرگىلىكتى اتقارۋشى بيلىك وكىلدەرى جۇرتتى ىنتالاندىرۋ ماقساتىندا ءتۇرلى باعالى ۇتىس ويىندارىن ۇيىمداستىرىپ جاتىر. دەگەنمەن جۇمىس ورنىنان ءتۇرلى سارىندا قىسىم-ەسكەرتۋ كورگەن ازاماتتار جالعان ەكپە پاسپورتىن جاساتۋعا ءماجبۇر. العاشىندا ەرىكتى دەلىنگەن ەكپەن ۇكىمەت جوسپارى جۇرىسپەي-باياۋلاعان سوڭ مىندەتتەۋ شارالارىن قولعا الدى.
8 شىلدەدەگى ەپيداحۋال بويىنشا، قازاقستاندا پاندەميا باستالعالى دەرتكە شالدىققانى رەسمي راستالعان ناۋقاستار سانى 502 مىڭنان استى. ولار: كوروناۆيرۋس 445 مىڭ، وسى تەكتەس پنەۆمونيا 57 مىڭ ادامعا جۇققان. سونىمەن قوسا، جالپى ۆيرۋس جۇققانداردان 10 387 ادام (كۆي+ / U07.1 – 4544, كۆي- / U07.2 – 3476, ىلەسپە اۋرۋلاردان – 2367) قايتىس بولعان. قازاقستان سىرقاتتار سانى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 44-ورىندا تۇر.
ءبىز رەسەيدىڭ گۋبەرنياسى ەمەسپىز! سوۆەت تۋىن جۇلىپ العانى ءۇشىن قامالعان ازامات شىقتى
شوقپار اۋىلىنداعى ۋران قاتەرى. اكىم جوققا شىعارادى. تۇرعىندار رادياتسيا دەپ ۇرەيلەنەدى
قاندى قاڭتار سوتى. بەس جىلعا سوتتالعان ارتىقباەۆ ەشقانداي دالەل جوق دەپ ۇكىممەن كەلىسپەيدى
الماتى وبل پركۋراتۋراسى. بەلسەندىلەر: «جالعان جالامەن قاماۋداعى ايگەرىم مەن دۋمانعا بوستاندىق!»
ارمان الىمبەكوۆ: مەن ول جەردىڭ رەزيدەنتسيا ەكەنىن بىلمەدىم. ەشنارسە بۇلدىرمەدىم.
قوساي ماحامباەۆ: وق تيگەن ادامدى قۇتقارام دەگەندە ءوزىمدى اتىپ تاستادى