2,5 دوزا ۆاكتسيانا تيەگەن ۇشاق تايۆان ارالىنا قوندى. فوتو: VOA

امەريكا قۇراما شتاتتارى تايۋانعا (تايۆان) كوروناۆيرۋسقا قارسى ۆاكتسينانىڭ 2,5 ملن دوزاسىن بەردى. ماۋسىم ايىنىڭ سوڭىنا دەيىن تاعى 750 مىڭىن جەتكىزىپ بەرمەك.

بايدەن بيلىگى ۋادە ەتكەن 2,5 ملن ۆاكتسينا دوزاسىن تيەگەن ۇشاق 20 ماۋسىم كۇنى تايۋان ارالىنا بارىپ قوندى. امەريكالىق «مودەرنا» كومپانياسىنىڭ ءونىمى تايۋان ۇكىمەتىنىڭ رەسمي وكىلدەرىنە تابىس ەتىلدى. ۆاكتسينانىڭ قالعان بولىگى ماۋسىم ايىنىڭ سوڭىنا دەيىن جەتكىزىلىپ بولماق.

قۇراما شتاتتاردىڭ تايۋانعا ۇسىنعان ۆاكتسياناسىنىڭ مولشەرى تايبەي ۇكىمەتىنىڭ سۇراعان مولشەرىنەن ءۇش ەسەگە كوپ. تايۋانداعى دەنساۋلىق ساقتاۋ سالاسىنا جاسالعان بۇنداي قولداۋدىڭ ساياسي ءمانى اقپارات قۇرالدارىنىڭ نازارىنا ىلىنۋدە.

امەريكا قۇراما شتاتتارى مەن تايۋان اراسىندا رەسمي ديپلوماتيالىق قارىم-قاتىناس جوق. دەگەنمەن، اقش كونگرەسى قابىلداعان «تايۋان ىستەرى جونىندەگى» زاڭ جوباسى بويىنشا ۋاشينگون تايۋانمەن ساۋدا-ەكونوميكالىق بايلانىستاردى ساقتاپ كەلگەن.

اقش پەن قىتاي اراسىنداعى باسەكەلەستىكتىڭ ارتۋىنا بايلانىستى تايۋان تاقىرىبى كۇننەن كۇنگە وزەكتىلەنە ءتۇستى.