اقش پرەزيدەنتى جو بايدەن مەن رەسەي پرەزيدەنتى ۆلاديمير پۋتين اراسىنداعى تاريحي كەزدەسۋ كەشە، 16 ماۋسىم كۇنى جەنەۆادا ءوتتى. كەزدەسۋدەن بۇرىن تاراپتاردىڭ قانداي دا ءبىر اۋقىمدى كەلىسىمنەن ۇمىتتەنىپ وتىرماعانى ايتىلعان بولاتىن. ال، كەزدەسۋ وتكەننەن كەيىن ەكى ەل باسشىسىنىڭ كەزدەسۋگە قاتىستى پىكىرلەرى ماڭىزدى بولا ءتۇستى.
بۇل كەزدەسۋ اقش پەن رەسەي اراسىنداعى ناشارلاپ بارا جاتقان قارىم-قاتىناستى رەتكە سالىپ، قايشىلىقتاردى بارىنشا جەڭىلدەتۋ ءۇشىن ۇيىمداستىرىلدى. كەزدەسۋدەن كەيىنگى مالىمدەمەلەرگە قارعاندا تاراپتار بۇل ماقساتتارىنا جەتكەنى بايقالادى.
ەڭ كەمىندە ماسكەۋ مەن ۋاشينگتون ءبىر-بىرىنە ەلشىلەردى قايتا جىبەرەتىن بولدى. ەستەرىڭىزدە بولسا، جىل باسىندا ەكى ەل قاتىناسىنىڭ ناشارلاپ كەتۋىنە بايلانىستى رەسەيدىڭ اقش-تاعى ەلشىسى دجون سالليۆان مەن رەسەيدىڭ اقش-تاعى ەلشىسى اناتولي انتونوۆ ءوز ەلدەرىنە قايتقان ەدى، بۇل جولى ەكەۋى دە كەڭەيتىلگەن وتىرىس قۇرامىندا بولعان.
كەزدەسۋلەردەن كەيىنگى ءباسپاسوز جينالىسىندا پۋتين جوزەف بايدەندى «كونسترۋكتيۆتى، بايىپتى، تاجىريبەگە باي، تىسقاقتى جانە ساقا ساياساتكەر» دەپ اتاعان. بۇعان قوسا كەزدەسۋدى «سىندارلى ءوتتى» دەپ باعالاپ، «ەشقانداي دۇشپاندىقتىڭ جوق ەكەنىن» ايتقان.
ءباسپاسوز مالىمدەمەسىندە رەسەي پرەزيدەنتىنىڭ جەتكىزگەن مالىمەتتەرىنە قاراعاندا، اقش پەن رەسەي كيبەرقاۋىپسىزدىك پەن ستراتەگيالىق تۇراقتىلىق ماسەلەسىندە ءبىرشاما تۇسىنىستىك ورناتقانىن، بۇعان قوسا ەڭ ءىرى يادرولىق دەرجاۆا رەتىندە دە ماسكەۋ مەن ۋاشينگتون اراسىندا قارىم-قاتىناستى ساقتاۋ جاۋاپكەرشىلىگىنىڭ جوعارى ەكەنىن جەتكىزگەن.
ەكى ليدەردىڭ باسپاسوزگە ايتا بەرمەيتىن تەرەڭ مازمۇندارداعى بىرقاتار ماسەلەلەردى تالقىلاعانى انقى. قالاي بولماسىن، بۇل تاريحي كەزدەسۋ شيەلەنىستىڭ تەرەڭدەي تۇسكەن تۇسىندا، دەرجاۆالار اراسىنداعى قارىم-قاتىناستاردىڭ رەتكە كەلۋىنە از دا بولسا ىقپالى بولدى.
