حاسان رۋحاني: يران قارۋلى كۇشتەرىن كۇشەيتۋ ءۇشىن ەشكىمنەن رۇقسات سۇرامايدى

ير پرەزيدەنتى: «يران ادىلەتسىز شاپقىنشىلىقتىڭ قۇربانى بولعان. سوندىقتان ەشكىمنەن قارۋلى كۇشتەرىن كۇشەيتۋگە جانە زىمىران مەن ۇشاق جاساۋعا رۇقسات سۇرامايدى» دەدى، دەپ حابارلادى «فارس» ءباسپاسوزى.

يران پرەزيدەنتى حاسان رۋحاني سەنبى كۇنى تەھراندا قورعانىس مينيسترلىگى جەتىستىكتەرىنىڭ تۇساۋكەسەر راسىمىندە: «يران قارۋلى كۇشتەرىنىڭ قورعانىستىق الەۋەتىن كۇشەيتۋ تەك ەلدى قورعاۋ ءۇشىن عانا جانە ەشقاشان وزگە ەلگە قارسى قولدانىلمايدى.

"ماھادجەر-6" اتتى بارلاۋشى جانە قارۋلى تاكتيكالىق ۇشقىشسىز ۇشاعى. فوتو: ParsToday

ءىرى الپاۋىتتاردىڭ مۇددەسىنە قاۋىپ ءتوندىرىپ وتىرعان جانە ادىلەتتىلىك پەن ازاتتىق ءۇنىن الەم جۇرتشىلىعىنىڭ قۇلاعىنا جەتكىزگەن ايماقتىق تەڭگەرىم مەن يراننىڭ قورعانىستىق تەجەگىش كۇشىن ساقتاۋ قاجەتتىلىك بولىپ تابىلادى» دەدى.

ول ايماق پەن الەمدەگى كەيبىر ەلدەر مەن امەريكانىڭ تاياۋ شىعىستاعى ءتۇرلى شاپقىنشىلىقتارىنا سىلتەمە جاساپ: «الپاۋىتتاردىڭ ارالاسۋشىلىعى مەن «قاتەرلى ىسىك» بولىپ تابىلاتىن يزرايل رەجيمى ءاردايىم تاياۋ شىعىس ايماعىندا الاڭداۋشىلىق، بەيبەرەكەتتىك پەن قاقتىعىسقا ۇيىتقى بولدى.

يران ەشقاشان شاپقىنشىلىق جاساۋدى ماقسات ەتپەگەن جانە ەتپەيدى، بىراق ءاردايىم قىراعى بولۋى كەرەك. ويتكەنى يران يسلام رەۆوليۋتسياسىنىڭ جەڭىسىنەن كەيىن بىرنەشە رەت ساياسي، اسكەري جانە ەكونوميكالىق شابۋىلدارعا ۇشىرادى» دەدى.

حاسان رۋحاني بۇگىن سەنبى كۇنى "كاۋسار" اتتى يراننىڭ تۇڭعىش جەرگىلىكتى قىرعي ۇشاعى، "ماھادجەر-6" اتتى بارلاۋشى جانە قارۋلى تاكتيكالىق ۇشقىشسىز ۇشاق، "ناسير" اتتى كەمەگە قارسى قولدانىلاتىن قاناتتى زىمىران مەن اۋەدەن اۋەگە اتىلاتىن "فاكۋر" اتتى زىمىراننىڭ تۇساۋىن كەستى.

“The Qazaq Times”