اقش پەن يران كەمەلەرى اراب تەڭىزىندە كەزدەسىپ قالدى: اقش تارابى وق اتتى

اقش تەڭىز كۇشتەرىنىڭ ەكى كەمەسى اراب تەڭىزىنىڭ سولتۇستىگىندەگى حالىقارالىق سۋ جولىندا يراندىق ءۇش شابۋىلشى كەمەگە ۇشراسقان. اقش كەمەسى يران شابۋىلشى كەمەلەرىن الىستاتۋ ءۇشىن وق اتىپ ەسكەرتۋ جاساعان.  بۇل تۋرالى اقش بەسىنشى فلوتى سەيسەنبى كۇنى مالىمدەمە جاسادى.

اقش اسكەريلەرىنىڭ مالىمەتىنە قاراعاندا يران رەۆوليۋتسيا ساقشىلارى اسكەري-تەڭىز كۇشتەرىنە تيەسىلى شابۋىلشى قايىقتار راديو جانە وزگە دە ەسكەرتۋ سيگنالدارىن ەلەمەگەن. اقش اسكەري-تەڭىز كۇشتەرىنىڭ Firebolt پاترۋلدىك قايىعى مەن جاعالاۋ كۇزەتىنىڭ Baranoff پاترۋلدىك كەمەسىنەن 62 مەتر قاشىقتىقتا ءجۇزىپ وتكەن.

بەسىنشى فلوتتىڭ رەسمي مالىمدەمەسىندە يران تەڭىز كۇشتەرىنىڭ ارەكەتىن ايىپتاعان. ولار العاشقى ەسكەرتۋلەردى ەلەمەدى جانە اقش كەمەلەرىنە سوقىتعىسۋ قاۋپى بولدى دەگەندى ايتادى. «اقش اگرەسسور ەمەس، الايدا ءبىزدىڭ ارميا قاجەت بولعان جاعدايدا ءتيىستى قورعانۋ شارالارىن جاساۋدىڭ ناقتى دايىندىعىنان وتكەن»، – دەلىنگەن مالىمدەمەدە.

بۇل ءبىر اي ىشىندە اقش پەن يران كەمەلەرىنىڭ ەكىنشى مارتە كەزدەسىپ قالۋى. سونداي-اق، بۇل يرانمەن يادرولىق كەلىسىمدى قايتا قاراۋ بويىنشا كەلىسسوزدەر ءجۇرىپ جاتقان جانە اقش-يران قاتىناسىنىڭ بولاشاعى ءدۇدامال تۇرعان كەزدە بولىپ وتىر.

“The Qazaq Times”