ءماجىلىس دەپۋتاتتارى: ءار بالاعا 4 ملن تەڭگە كاپيتال قۇيۋ كەرەك

سارسەنبى كۇنى ءماجىلىس وتىرىسىندا قازاقستان حالىق پارتياسىنىڭ دەپۋتاتتارى ۇكىمەت باسشىسىنا دەپۋتاتتىق ساۋال جولداپ، انا كاپيتالىن ەنگىزۋدى ۇسىندى.

دەپۋتات ەرلان سمايىلوۆتىڭ ايتۋىنشا، ەلىمىزدە انا مەن بالانى قولداۋعا ارنالعان ءتۇرلى جوبالار ءتيىستى دەڭگەيدە ولاردىڭ ءومىر ءسۇرۋ جاعدايىنا اسەر ەتىپ وتىرعان جوق. يۋنيسەف-ءتىڭ زەرتتەۋىنە سۇيەنسەك، ەلىمىزدە بالالاردىڭ 15,6%-ى تۇرمىسى تومەن وتباسىلاردان، ياعني بۇل دەگەنىمىز ءبىر ميلليون بالا الەۋمەتتىك جاعىنان از قامتىلعانىن كورسەتەدى.

«مەملەكەت ءبىر نارسەنى انىق ءتۇسىنۋى كەرەك، بۇگىنگى كەدەي بالالار – ول ەرتەڭگى كەدەي مەملەكەت»، – دەدى ول.

دەپۋتاتتاردىڭ ۇسىنىسى بويىنشا الەۋمەتتىك تولەمدەردەن ەندى ادام كاپيتالىن ەنگىزىپ، ءار بالاسى بار وتباسىلارعا ينۆەستيتسيا جاساۋ كەرەك.

«قازاقستاندا ءار بالاعا 4,2 ملن تەڭگە مولشەرىندە مەملەكەتتىك تولەمدى انا كاپيتالى رەتىندە بەرگەن دۇرىس. بۇل قاراجاتتى ءار انا قاجەتتىلىگىنە قاراي باسپانا الۋعا، بالانىڭ ءبىلىم الۋىنا نەمەسە زەينەتاقى جيناعىنا سالۋعا قۇقىلى بولۋى كەرەك»، – دەدى سمايىلوۆ.

ولاردىڭ ايتۋىنشا، ەلىمىزدە انا مەن بالانىڭ جاعدايىن جاساۋعا قاراجات بارىنشا كوپ بولىنسە، كەدەيلىك قانا ەمەس، بالالار اراسىنداعى اۋرۋلار مەن زورلىق-زومبىلىق تا كەميدى.

ون كۇننەن بەرى استانا اكىمدىگىندە نارازىلىق تانىتىپ، تۇنەپ جۇرگەن ءبىر توپ انا وتباسى تابىسىنا قاراماي ءار بالاعا اي سايىن 42,5 مىڭ تەڭگە مەملەكەتتىك جاردەماقى تاعايىندالۋىن تالاپ ەتىپ كەلەدى.

"The Qazaq Times"