سەنبى كۇنى، 23 قاڭتار اقش اسكەري-تەڭىز كۇشتەرىنە قاراستى «USS تەودور رۋزۆەلت» اۆياتاسىمالداۋشىسى باستاعان اسكەري كەمەلەردىڭ قوسىنى وڭتۇستىك قىتاي تەڭىزىنە كىردى. بۇل تۋرالى پەنتاگون رەسمي مالىمدەمە تاراتتى. اقش اسكەري-تەڭىز كۇشتەرى بۇل ارەكەتىن «اشىق تەڭىز ەركىندىگىن قورعاۋ مەن تەڭىزدەگى اشىقتىقتى ناسيحاتتاۋ ءۇشىن» دەپ تۇسىندىرگەن.

اقش-تىڭ قۋاتتى اسكەري كەمەلەر توبىنىڭ وڭتۇستىك قىتاي تەڭىزىنە كىرۋى قىتايدىڭ تايۋانعا 12 سوعىس ۇشاعىن جىبەرىپ، اسكەري قىسىم كورسەتۋ ارەكەتىمەن تۇسپا-تۇس كەلدى. بۇل تايۋان بۇعازى قايشىلىعىنىڭ اسقىنا تۇسكەنىن كورسەتتى.

وڭتۇستىك قىتاي تەڭىزىنە وڭىردەگى قىتاي، تايۋان، فيليپپين، مالايزيا، يندونەزيا، تايلاند، ۆەتنام قاتارلى كوپتەگەن ەلدەر شەكاراسەدى. قىتاي بۇل حالىقارالىق ماڭىزدى سۋ جولىنىڭ كوپ بولىگى وزىنە تيەسىلى دەپ سانايدى. وسى ءبىر حالىقارالىق ماڭىزدى سۋ جولىندا الەم ساۋداسىنىڭ ۇشتەن ەكى بولىگى ءوتىپ جاتادى. ال، اتالعان اقش اۆياتاسىمالداۋشى كەمەسىنىڭ فلوتى مالىمدەمەسىندە ءوز ارەكەتتەرى «تەڭىز بوستاندىعىن جانە تەڭىز قاۋىپسىزدىگىن قامتاماسىز ەتۋ ماقساتىنداعى سەرىكتەستىك ورناتۋ ءۇشىن» جاسالعان كۇندەلىكتى وپەراتسيالاردىڭ ءبىرى دەپ كورسەتكەن.

قىتايعا جاقىن جانە تەرريتوريالىق داۋ-شارلى تەڭىزگە كىرگەن قۋاتتى كەمەلەر قوسىنىنا اقش-تىڭ تاجىريبەلى كونتر-ادميرالى داگ ۆەريسسيمو قولباسشىلىق ەتەدى. ساپارىنىڭ الدىندا ول: «مەن وڭتۇستىك قىتاي تەڭىزىندەگى اشىق تەڭىز ەركىندىگى مەن قاۋىپسىزدىگىن نىعايتىپ، ونداعى سەرىكتەرىمىزدىڭ ۋايىمىن جويۋ ءۇشىن بارا جاتقانىما قۋانىشتىمىن»، – دەگەن ەكەن. ول ماڭىزدى حالىقارالىق سۋ جولىنداعى حالىقارالىق ءتارتىپ پەن ەركىندىكتى قورعاۋ ءۇشىن ارەكەت ەتىتىنىن ايتقان.

داگ ۆەريسسيمونىڭ مالىمدەمەسى جو بايدەن پرەزيدەنت رەتىندە انت بەرىپ قىزمەتكە كىرىسكەننەن كەيىن بىرنەشە كۇننەن سوڭ جاسالدى. وسىعان قاراپ بۇل ارەكەت بايدەن بيلىگىنىڭ قىتايعا قاراتقان ۇستامى دەپ اتاپ جاتقان ساراپشىلار دا بار. ايتالىق، VOA اگەنتتىگىنە بەرگەن جاۋابىندا اقش ستراتەگيالىق زەررتتەۋ ورتالىعى تايۋان بۇعازى ماسەلەسى جونىندەگى زەرتتەۋشىسى ۋان شيلي: «بايدەننىڭ باس ديپلوماتى بولۋعا ۇمىتكەر ەنتوني برينكەن دە قىتايىدىڭ قۇراما شتاتتار ءۇشىن ەڭ ۇلكەن قيىندىق تۋدىرىپ جاتقانىن مويىندادى، سوعان قوسا اقش اسكەري-تەڭىز كۇشتەرىنىڭ وڭتۇستىك قىتايعا قۋاتتى ۇشاق تاسىمالداۋشى كەمەلەر توبىن جىبەرۋى اقش جاڭا بيلىگىنىڭ بەيجىڭمەن كەيبىر ماسەلەلەردە قاتاڭ مامىلەنى ساقتاپ تۇراتىنىن كورسەتەدى»، – دەگەن.

رەسمي بەيجىڭ اقش اسكەري كەمەلەرىنىڭ وڭتۇستىك قىتاي تەڭىزىنە كىرگەنىنە نارازىلىعىن ءبىلدىردى. بۇل جاعدايلار تايۋان بۇعازى مەن وڭتۇستىك قىتاي تەڭىزى قايشىلىقتارىنىڭ بارعان سايىن كۇشەيە تۇسكەنىن، وڭىردەگى قاۋىپسىزدىك ماسەلەسىنىڭ باستى كۇن تارتىپكە شىققانىن اڭعارتادى.

“The Qazaq Times”