سولتۇستىك كورەيا بايدەنگە جاڭا قارۋىن كورسەتتى

اقش-تا جوزەف بايدەن يناۋگۋراتسياسىنىڭ الدىندا سولتۇستىك كورەيا دابىرالى اسكەري شەرۋ وتكىزدى. بۇل اسكەري پارادتا «الەمدەگى ەڭ قۋاتتى قارۋ» دەپ اتاعان جاڭا بالليستيكالىق زىمىرانىن كورسەتتى. زىمىران سۇڭگۋىر كەمەدەن اتىلادى جانە يادرولىق وق تۇمسىقتى تاسىمالدايدى.  بۇعان دەيىن پيوڭياڭ (پحەنيان) جاڭا، زاماناۋي قارۋلاردى دامىتىپ جاتقانىن جار سالىپ، قۇراما شتاتتاردى «باستى دۇشپان» دەپ مالىمدەگەن ەدى.

سولتۇستىك كورەيا رەسمي اقپارات قۇرالدارى جاريا ەتكەن سۋرەتتەردەن اۋىر اسكەري تاسىمال كولىكتەرىنە تيەلگەن قارا جانە اق تۇسكە سىرلانعان بالليستيكالىق زىمىراندى كورۋگە بولادى. وڭتۇستىك كورەيا مەن اقش ەكسپەرتتەرى ونى سولتۇستىك كورەيانىڭ بۇعان دەيىن كورسەتكەن زىمىراندارىنا سالىستىرا وتىرىپ، ساراپتاما جاساعان. ناتيجەسىندە ونى سولتۇستىك كورەيانىڭ جاڭا بالليستيكالىق زىمىرانى دەپ تۇراقتاندىردى.

بىلتىر قازان ايىندا وتكەن اسكەري شەرۋدە پيوڭياڭ ءوزىنىڭ ەڭ ۇلكەن قۇرلىق ارالىق بالليستيكالىق زىمىرانىن كورسەتكەن بولاتىن. بۇل رەت ول زىمىران كورسەتىلگەن جوق. ءدال وسى يادرولىق وق تۇمسىقتى زىمىران اقش-تىڭ ۇرەيىن ۇشىرادى، ونى جاساۋداعى سولتۇستىك كورەيانىڭ تابىسقا جەتۋى ەكسپەرتتەردى تاڭ قالدىرعان بولاتىن.

وتكەن اپتادا كحدر بيلىك پارتياسىنىڭ وتىرىسىندا ەل ليدەرى كيم جوڭ ۋن (Kim Jong Un) جاڭا ءارى زاماناۋي قارۋلاردى دامىتۋعا كۇش سالىپ جاتقاندارىن، ونىڭ قاتارىندا سۋ استى كەمەسىنەن اتىلاتىن بالليستيكالىق زىمىران، تىڭشىلىق جاساي الاتىن سپۋتنيك جانە الىستان باسقارىلاتىن سوعىس ۇشاعى بار ەكەنىن مالىمدەگەن. ساراپشىلار كحدر ليدەرىنىڭ بۇل مالىمدەمەسى اقش-تىڭ جاڭا بيلىگىن كەلىسىمگە شاقىرۋى دەپ بولجاعان.

ايتا كەتسەك، بۇعان دەيىن ترامپ پەن كيم ءۇش مارتە كەزدەسىپ، كەلىسسوز وتكىزگەن. بىراق، بەرىلگەن ۋادەلەردىڭ ارتى سۇيىلىپ، سوڭىندا ۋاشينگتون مەن پيوڭياڭ اراسى سۋىپ كەتتى. سەبەبى، سولتۇستىك كورەيا يادرولىق قارۋدان باس تارتۋىن اسا جوعارى باعالاپ، ول ءۇشىن قۇراما شتاتتاردا وزدەرىنىڭ يادرولىق قارۋلارىنان باس تارتۋى جانە سولتۇسىتك كورەياعا ەكونوميكالىق قولداۋ كورسەتۋى كەرەك دەپ تالاپ ەتكەن. ارينە، بۇنداي تالاپ قۇراما شتاتتار ءۇشىن مۇلدە قيسىنسىز. سەبەبى، قۇراما شتاتتاردا يادرولىق قارۋ عانا ەمەس الەمدەگى ەڭ ۇلكەن ەكونوميكا، ەڭ قۋاتتى قارۋلى كۇش بار.

“The Qazaq Times”