دونالد ترامپ اقش پرەزيدەنتى بولىپ كەلگەلى بەرى الەمنىڭ گەو-ساياسي بەينەسىنە از بولماعان وزگەرىستەر كىرگەنى شىن. ورتا شىعىستا جاڭا بەت-بەينە قالىپتاستى، باتىس پەن قىتايدىڭ قارىم-قاتىناسى وزگەردى. بۇدان تىس، ترامپ بيلىگى سولتۇستىك كورەيامەن ەڭ كوپ ديالوگقا كەلگەن امەريكالىق ۇكىمەت بولىپ قالدى. ەندى مىنە، اق ۇيدەگى بيلىكتىڭ الماسۋىنا قاتىستى پىكىرتالاستىڭ قايتا ورشۋىنە قاراماستان، كوپتەگەن اقپارات قۇرالدارى ترامپ ۇكىمەتىن اقش-تىڭ ەسكى بيلىگى قاتارىندا ساناي باستادى. وسى تۇستا اق ءۇيدىڭ باس ديپلوماتى، اقش مەملەكەتتىك حاتشىسى مايكل پومپەو ترامپ ۇكىمەتىنىڭ «اتتەگەن-ايلارىن» ايتىپ وتكەن ەكەن.

پومپەونىڭ ايتۋىنشا، الەم بۇدان ءتورت جىل بۇرىنعىعا قاراعاندا قاۋىپسىزدەۋ ەكەن. بۇل ونىڭ ءوزى قىزمەت ەتكەن ترامپ بيلىگىنە بەرگەن باعاسى بولسا كەرەك. دەگەنمەن ول قىتاي مەن سولتۇستىك كورەيانىڭ «قيىن ماسەلەلەرىن» سوڭىنا شىعارا الماي بارا جاتۋى ترامپ بيلىگىنىڭ «اتتەگەن-ايى» دەپ كورسەتكەن ەكەن.

Bloomberg تەلەارناسىنداعى سۇحباتىندا پومپەو قىتايعا باعىتتالعان قاتاڭ ساياساتىنا قاراماستان بەيجىڭ ءالى دە ادىلەتسىز ساۋدا ساياساتىن جۇرگىزىپ جاتقانىن باسا بەلگىلەگەن. بۇعان قوسا قىتايدىڭ قۇراما شتاتتاردان زياتكەرلىك مەنشىك قۇقىقتارىن ۇرلاۋى ءالى دە پروبلەما بولىپ قالا بەرگەنىنە دە وكىنىش بىلدىرگەن.

ال، سولتۇستىك كورەيا جاعدايى بەلگىلى، ەكى ەلدىڭ ليدەرى بىرنەشە رەت كەزدەسىپ كەلىسسوز وتكىزگەنىمەن، كيم جوڭ ۋن يادرولىق قارۋدان باس تارتۋ تۋرالى ۋادەسىن اتقاراتىن سىڭعاي تانىتپايدى.

وسىلارعا قاراماستان، پومپەو ترامپ بيلىگىنىڭ باستى جەتىستىكتەرى قاتارىندا، يزرايل مەن يران ساياساتتارىنىڭ اشىققا شىعۋىن، ناتو-نىڭ قىتايدى باستى ستراتەگيالىق قارسىلاس رەتىندە قابىلداعانىن، ورتا شىعىستاعى اقش جاۋاپكەرشىلىگىنىڭ جەڭىلدەۋىن اتاپ وتكەن ەكەن.

ارينە، ترامپ بيلىگىن سىناۋشىلار ونىڭ پرەزيدەنتتىگى كەزىندە اقش كوپتەگەن حالىقارالىق كەلىسىمدەردەن بىرجاقتى باس تارتىپ، قۇراما شتاتتاردىڭ جاھاندىق كوشباسشىلىق ءرولىن السىرەتتى دەپ سانايدى. سونداي-اق، ونىڭ سىرتقى ساياساتى اقش وداقتاستارىن الشاقتاتىپ، سونىڭ سالدارىنان قىتاي بيلىگىنە بەلگىلى دەڭگەيدە مۇمكىندىكتەر بەرىپ قويدى دەپ سىنايدى.

“The Qazaq Times”