Donal'd Tramp AQŞ prezidenti bolıp kelgeli beri älemniñ geo-sayasi beynesine az bolmağan özgerister kirgeni şın. Orta Şığısta jaña bet-beyne qalıptastı, Batıs pen Qıtaydıñ qarım-qatınası özgerdi. Bwdan tıs, Tramp biligi Soltüstik Koreyamen eñ köp dialogqa kelgen amerikalıq ükimet bolıp qaldı. Endi mine, Aq üydegi biliktiñ almasuına qatıstı pikirtalastıñ qayta örşuine qaramastan, köptegen aqparat qwraldarı Tramp ükimetin AQŞ-tıñ eski biligi qatarında sanay bastadı. Osı twsta Aq üydiñ bas diplomatı, AQŞ memlekettik hatşısı Maykl Pompeo Tramp ükimetiniñ «ättegen-ayların» aytıp ötken eken.

Pompeonıñ aytuınşa, älem bwdan tört jıl bwrınğığa qarağanda qauipsizdeu eken. Bwl onıñ özi qızmet etken Tramp biligine bergen bağası bolsa kerek. Degenmen ol Qıtay men Soltüstik Koreyanıñ «qiın mäselelerin» soñına şığara almay bara jatuı Tramp biliginiñ «ättegen-ayı» dep körsetken eken.

Bloomberg telearnasındağı swhbatında Pompeo Qıtayğa bağıttalğan qatañ sayasatına qaramastan Beyjiñ äli de ädiletsiz sauda sayasatın jürgizip jatqanın basa belgilegen. Bwğan qosa Qıtaydıñ Qwrama Ştattardan ziyatkerlik menşik qwqıqtarın wrlauı äli de problema bolıp qala bergenine de ökiniş bildirgen.

Al, Soltüstik Koreya jağdayı belgili, eki eldiñ lideri birneşe ret kezdesip kelissöz ötkizgenimen, Kim Joñ Un yadrolıq qarudan bas tartu turalı uädesin atqaratın sıñğay tanıtpaydı.

Osılarğa qaramastan, Pompeo Tramp biliginiñ bastı jetistikteri qatarında, Izrail' men Iran sayasattarınıñ aşıqqa şığuın, NATO-nıñ Qıtaydı bastı strategiyalıq qarsılas retinde qabıldağanın, Orta Şığıstağı AQŞ jauapkerşiliginiñ jeñildeuin atap ötken eken.

Ärine, Tramp biligin sınauşılar onıñ prezidenttigi kezinde AQŞ köptegen halıqaralıq kelisimderden birjaqtı bas tartıp, Qwrama Ştattardıñ jahandıq köşbasşılıq rölin älsiretti dep sanaydı. Sonday-aq, onıñ sırtqı sayasatı AQŞ odaqtastarın alşaqtatıp, sonıñ saldarınan Qıtay biligine belgili deñgeyde mümkindikter berip qoydı dep sınaydı.

“The Qazaq Times”