اقش جانە بىرقاتار باتىس ەلدەرىنىڭ اقپارات اگەنتتىكتەرى ترامپتىڭ بايدەنگە بيلىكتى وتكىزىپ بەرۋگە كەلىسىم بەردى دەگەن حابارلاردى تاراتتى. دەگەنمەن، ترامپتىڭ الەۋمەتتىك جەلىدەگى مالىمدەمەلەرى بۇعان تولىقتاي سايكەس كەلمەدى.

اقش-تىڭ بيلىك الماسۋ كەزىندەگى قىزمەتتەردى ۇيلەستىرەتىن جالپى قىزمەتتەر اگەنتتىگى (GSA) دەگەن قۇزىرەتتى ورگانى كەشە مالىمدەمە جاساپ، بايدەن كومانداسى بيلىكتى وتەرىپ الۋ پروتسەدۋراسىن باستاۋ ءۇشىن قاجەتتى رەسۋرستار مەن قىزمەتتەرگە قول جەتكىزە الاتىنىن حابارلادى. سونداي-اق، پرەزيدەنت ترامپ اتالعان ورگانعا ءوز جۇمىسىن اتقارۋعا تاپسىرما دا بەرگەن.

GSA-تىڭ قازىرگى ديرەكتورى ەميلي مارفي حانىم بايدەنگە جازعان حاتىندا: ««جالپى قىزمەتتەردىڭ ديرەكتورى رەتىندە مەن سايلاۋدان كەيىنگى بەلگىلى ءبىر رەسۋرستار مەن قىزمەتتەردى پرەزيدەنتتىڭ تاپسىرۋىنا كومەكتەسۋ ءۇشىن 1963 جىلعى قايتا قارالعان پرەزيدەنتتى تاپسىرۋ تۋرالى زاڭعا سايكەس ۇسىنا الامىن»، – دەپ جازعان ەكەن. ول سونداي-اق، ءوز مىندەتىنە جاۋاپكەرشىلىكپەن قارايتىنىن ايتا كەلىپ: «سوڭعى قۇقىقتىق قيىندىقتار مەن سايلاۋ ناتيجەلەرىن كۋالاندىرۋ پروگرەسسىنە بايلانىستى، ءسىز ءتيىستى رەسۋرستار مەن قىزمەتتەرگە قول جەتىمدى ەكەنىڭىزدى راستاپ وسى حاتتى جولداپ وتىرمىن»، – دەپ جازعان.

GSA ديرەكتورى ەميلي مارفيگ حانىم مالىمدەمە جاسادى. فوتو: VAO.

ادەتتە اتالعان ورگان جاڭا سايلانعان پرەزيدەنتكە قاجەتتى رەسۋرستار مەن قىزمەتتەردى پايدالانۋ مۇمكىندىگىن سايلاۋ وتە سالىسىمەن بەرىپ جاتادى. بىراق، بيىلعى داۋلى سايلاۋعا بايلانىستى ولاي بولمادى.

ترامپ ءوزىنىڭ «تۆيتتەردەگى» پاراقشاسىندا ەميلي مارفيگە ءتۇرلى قىسىم مەن بوپسالاۋ ارەكەتتەرى بولدى دەپ مالىمدەدى. ول GSA-گە ونىڭ ديرەكتورى مەن قىزمەتكەرلەرىنىڭ قاۋىپسىزدىگى ءۇشىن سونداي تاپسىرما بەرگەنىن، الايدا سايلاۋ ناتيجەسى ءۇشىن كۇرەستى جالعاستىراتىنىن جەتكىزگەن.

“The Qazaq Times”