بريتاننىڭ ىشكى كونتر-بارلاۋ اگەنتتىگىنىڭ باسشىسى كەن ماككاللۋم. فوتو: VOA.

بريتانيا قىتايدىڭ ۇلكەن ءارى ۇزاق مەرزىمدى قاۋپىنە تاپ بولۋدا. بۇنداي مالىمدەمەنى بريتان ىشكى كونتر-بارلاۋ اگەنتتىگى (MI5) جەتەكشىسى مالىمدەدى.

MI5 باسشىسى كەن ماككاللۋم كەشە بريتانياعا سىرتتان تونەتىن قاتەرلەر تۋرالى مالىمدەمە جاسادى. ول بريتانيا يسلامدىق راديكاليزم مەن سولشىل ەكسترەميزم قاتەرىنە قارسى كۇرەسىپ جاتقانىن، رەسەي قازىرگى ۋاقىتتا ۇلىبريتانيا الدىندا تۇرعان ەڭ ۇلكەن ۇلتتىق قاۋىپ ەكەنى، الايدا قىتاي بولاشاقتا بريتانيا ءۇشىن ودان دا قاۋىپتى بولاتىنىن ايتتى.

كەن ماككاللۋم بارلاۋ اگەنتتىگى قىتايدىڭ جاسىرىن ارەكەتتەرىنە قارسى بارلاۋ ىستەرىن كەڭەيتۋدى جوسپارلاپ وتىرعانىن ايتقان. ول بەيجىڭنىڭ فارماتسەۆتيكالىق كومپانيالار مەن ۋنيۆەرسيتەتتەردىڭ زياتكەرلىك مەنشىك قۇقىعىن قوسا، بريتاندىق يندۋستريانىڭ زياتكەرلىك مەنشىك قۇقىعىن ۇرلاۋعا ارەكەت ەتىپ وتىرعانىن جەتكىزگەن.

بريتاندىق بارلاۋ قىزمەتىنىڭ جەتەكشىسىنىڭ سوزىنە سەنسەك، قىتاي، رەسەي سەكىلدى ەلدەر ۇكىمەتتىك قۇپيالىقتى ۇرلاۋ سەكىلدى تىڭشىلاردىڭ ءداستۇرلى ارەكەتتەرىنە كوپ ءمان بەرىپ وتىرعان جوق، دەگەنمەن ۇلىبريتانيانىڭ ەكونوميكاسى مەن ينفراقۇرىلىمىنا قارسى ارەكەت جاساپ، بريتاندىق دەموكراتيانى بۇزۋعا تىرىسۋدا. ماككاللۋم جاريا ەتكەن مالىمەتتەرگە قاراعاندا، بريتان بارلاۋ قىزمەتى بۇدان بىلاي رەسەي، قىتاي، يران جانە باسقا دا تاراپتاردىڭ ۇلتتىق قاۋىپسىزدىككە توندىرگەن قاتەرىنە قارسى كۇرەسۋگە كوپ كۇش جۇمسايدى. بۇعان قوسا لاڭكەستەرگە قارسى كۇرەس تە بار.

45 جاستاعى ماككاللۋم ءمى5 تاريحىنداعى ەڭ جاس جەتەكشى. بۇعان دەيىن 24 جىل بارلاۋ اگەنتتى بولىپ جۇمىس ىستەگەن، بيىل ءساۋىر ايىندا عانا اتالعان اگەنتتىككە باسشى بولىپ كەلگەن. ول بريتانيانىڭ بارلاۋ قىزمەتىنە رەفورمالار الىپ كەلۋى مۇمكىن دەگەن بولجامدار دا بار.

“The Qazaq Times”