اقش پرەزيدەنتى دونالد ترامپ الەمنىڭ ءار جەرىندەگى امەريكالىق اسكەرلەردى ەلگە قايتارىپ، قىتاي مەن رەسەيگە قارسى دايىندالاتىنىن ءبىلدىردى. بۇل تۋرالى ول بەيسەنبى كۇنگى Fox Business Channel ارناسىنا بەرگەن سۇحباتىندا ورتاعا سالدى.  

پرەزيدەنت ترامپ الەمنىڭ جەر-جەرىندە اسكەري وپەراتسيالار جۇرگىزۋ جانە قارۋلى كۇشتەردى ۇستاۋ قۇراما شتاتتاردىڭ بيۋدجەتى ءۇشىن ۇلكەن شىعىن ەكەنىن، سوندىقتان دا اۋعانستانداعى جانە وزگە ەلدەردەگى اسكەرلەرىن كەرى قايتارۋعا نيەتتى ەكەنىن جەتكىزگەن.

اق ءۇي باسشىسى اقش-تىڭ اۋعانستانداعى سوعىسى تىم ۇزاققا سوزىلعانىن ايتا كەلىپ، اۋعان جەرىنەن اسكەرلەردى كەرى قايتارىپ جاتقانىن، جىل سوڭىنا دەيىن قالعان 4 مىڭ جاۋىنگەر ۇيىنە قايتاتىنىن ءبىلدىردى. «بىلەسىز بە، ولار ءدال قازىردەن باستاپ ۇيىنە قايتادى»، – دەدى ترامپ سۇحباتىندا.

ترامپ اقش ءوزىنىڭ ستراتەگيالىق باسەكەلەستەرى قىتاي مەن رەسەيگە قارسى دايىندالۋ ءۇشىن شەتەلدەگى اسكەري شىعىندارىن قىسقارتۋى كەرەك دەپ ۇمىتتەنەدى.

اقش پرەزيدەنتى بۇنداي مالىمدەمەنى ءوزىنىڭ كوروناۆيرۋستان ەمدەلىپ شىققاننان كەيىنگى العاشقى سۇحباتىندا ورتاعا سالىپ وتىر. ول دۇيسەنبى كۇنى ۆالتەر ريد ۇلتتىق اسكەري-مەديتسينالىق ورتالىعىنان شىقتى. ال، سارسەنبىدە اق ۇيدەگى «امەريكا فۋتبول دوبىنا» ۇقسايتىن پرەزيدەنت كەڭسەسىنە قايتىپ ورالدى.

“The Qazaq Times”