فوتو: 24kg

قىرعىزستان سوتسيال-دەموكراتيالىق پارتياسىنىڭ (SDK) جاقتاستارى بىشكەك ورتالىعىنا جينالىپ، پارلامەنت سايلاۋىنىڭ ناتيجەلەرىنە نارازىلىق ءبىلدىردى. 

24kg سايتىنىڭ حابارلاۋىنشا، 100-دەن استام ادام قاتىسقان ميتينگتە KFOR مۇشەسى، بەلسەندى يرينا كارامۋشكينا: «ءبىز سايلاۋ ناتيجەلەرىن زاڭدى دەپ تانىمايمىز، ويتكەنى سايلاۋ كەزىندە ورەسكەل زاڭ بۇزۋشىلىقتار ورىن الدى»، – دەيدى. ونىڭ ايتۋىنشا، بيلىك اكىمشىلىك رەسۋرستاردى قولدانعان، ال جەڭگەن بىرقاتار پارتيالار سايلاۋشىلارعا پارا بەرۋ ءىسىن اشىق جۇرگىزگەن.

جەڭىلىسكە ۇشىراعان تاعى بىرنەشە پارتيا، سونىڭ ىشىندە «اتا-مەكەن» وكىلدەرى بىشكەكتە نارازىلىق شارالارىن وتكىزەتىنىن جاريالاعان.

سايلاۋعا 3,5 ميلليون سايلاۋشىنىڭ 56,5% قاتىستى. پارلامەنت 120 ورىنعا 16 پارتيا تالاستى. سايلاۋ كۇنى ەلدە 2475 سايلاۋ ۋچاسكەلەرى جۇمىس ىستەدى، ونىڭ 45-ءى رەسپۋبليكادان تىس جەرلەردە ورنالاسقان. الدىن الا مالىمەتتەر بويىنشا، ءتورت ساياسي پارتيا عانا پارلامەنتكە ءوتۋ ءۇشىن قاجەت داۋىس مولشەرىن جيناي العان. ۇشەۋىن قازىرگى پرەزيدەنت سوورونباي جەەنبەكوۆكە جاقىن پارتيالار دەپ اتايدى. ولاردىڭ قاتارىندا «بيريمديك» (24,95%),«مەكەنيم كىرگىزستان» (24,31), «كىرگىزستان» (8,91%). وپپوزيتسيالىق پارتيالار اراسىنان تەك «بۋتۋن كىرگىزستان» (7,21%) عانا پارلامەنتكە وتەدى.

ورتالىق سايلاۋ كوميسسياسى قىرعىزستان زاڭناماسىنا سايكەس داۋىس بەرۋ اياقتالعاننان كەيىن 20 كۇنتىزبەلىك كۇن ىشىندە سايلاۋدىڭ رەسمي ناتيجەلەرىن جاريالاۋعا مىندەتتى. جاڭا دەپۋتاتتىق كورپۋس سايلانعاننان كەيىن ۇكىمەت اۆتوماتتى تۇردە وتستاۆكاعا كەتەدى. كابينەتتىڭ ۋاقىتشا مۇشەلەرى مەملەكەت باسشىسىنىڭ جارلىعىمەن تاعايىندالادى.

جاڭا ۇكىمەتتىڭ قۇرىلۋىمەن پارلامەنتتىك كوپشىلىك نەمەسە قۇرىلعان كواليتسيا اينالىسۋى كەرەك. پرەزيدەنت زاڭ شىعارۋشى ورگانعا ەنگىزىلگەن تاراپتاردىڭ بىرىنە ءوز قالاۋى بويىنشا ءتيىستى وكىلەتتىكتەر بەرەدى. ەگەر پارتيالار ءۇش رەت كواليتسيا قۇرا الماسا، وندا قايتا سايلاۋ تاعايىندالادى. جاڭا كواليتسيا كەلەسى ۇكىمەتتىڭ قۇرامى مەن قۇرىلىمىن قۇرايدى.

"The Qazaq Times"