ءۇندىستان قىتاي شەكاراسىنداعى اسكەرلەرىنە وق اتۋعا رۇقسات بەردى

ءۇندى-قىتاي شەكارا جانجالى قاقتىعىسقا جاقىنداپ تۇرعان بولاتىن. جاقىندا ەكى ەلدىڭ جوعارى اسكەري شەندىلەرى اراسىندا كەلىسسوز وتكىزىپ، كەرەعار ماسەلەلەر جونىندە ءبىرشاما كەلىسىمگە قول جەتكىزگەندەي بولدى. ناتيجەسىندە، داۋلى شەكارا ايماعىنا اينالعان لاداح جەرىنە تاراپتار قوسىمشا اسكەري كۇش جونەلتپەۋگە كەلىستى. بىراق، قازىرگە دەيىن شەكارا ماڭىنا جينالىپ قالعان ەكى ەل اسكەرىن كەرى شەگىندىرۋ تۋرالى كەلىسە العان جوق. ءبىر سوزبەن ايتقاندا تاراپتار شەكارا قايشىلىعىن ءتۇبىرلى شەشىم ەتە المادى.

ۇندىستاندىق جوعارى لاۋازىمدى تۇلعانىڭ VOA اگەنتتىگىنە بەرگەن مالىمەتىنە قاراعاندا، ءۇندىستان ۇكىمەتى ءۇندى-قىتاي شەكاراسىنداعى جاۋىنگەرلەرىنە ەگەر قىتاي شەكاراشىلارى جاعىنان قاۋىپسىزدىكتەرىنە قاتەر ءتونىپ جاتقان جاعدايدا وق اتۋعا رۇقسات بەرگەن. كەشە ءۇندى باسپاسوزدەرىندە ءۇندىستان قورعانىس كۇشتەرى شەكارا ماڭىندا قىتايدىڭ اسكەر سانى جاعىنان باسىمدىققا يە بولۋ ماقساتىنا جول بەرمەۋگە تىرىسىپ جاتقانىن جازىپ ەدى. سونداي-اق، ماۋسىمدا بولعان شەكاراشىلار اراسىنداعى قاقتىعىس كەزىندە قىتاي شەكاراشىلارىنىڭ سانى باسىم بولعانىن العا تارتتى. قاقتىعىس كەزىندە قىتاي شەكاراشىلارى تەمىر تاياقتارمەن قارۋلانعانى (ەكى ەل اراسىندا شەكارا ماڭىندا وق اتىسپاۋ تۋرالى كەلىسىم بولعاندىقتان ءۇندى-قىتاي شەكارا ساربازدارى تاس نەمەسە سويىلدى قولدانعان) دا ەندى اشىق جازىلا باستادى. ناتيجەدە ءۇندىستان جاعىنان 20 سارباز مەرت بولىپ ەدى.

ءۇندىستان مەن قىتاي شەكارا ماڭىندا مىڭداعان اسكەرلەرىن جيناپ قويعان. فوتو: رەيتەردەن.

قىركۇيەكتىڭ باسىندا دا شەكارادا وق اتىلدى. بەيجىڭ مەن جاڭا-دەلي ءبىر-ءبىرىن ايىپتادى. ءۇندىستان تارابى جوعالىپ كەتگەن ەكى شەكاراشىنى قىتاي شەكارا كۇزەتى قولدى ەتتى دەپ تە مالىمدەگەن. ال، قىتاي تارابى ولاردى شەكارا بۇزدى دەپ ايىپتاعان.

22 قىركۇيەكتە بولعان كەلىسسوز ەكى ەل جوعارى اسكەري قولباسشىلارى دەڭگەيىندەگى 6-شى رەتكى باس قوسۋ. ونىڭ ءوزى قايشىلىقتى تولىق شەشكەن جوق. تەك، شەكاراعا قوسىمشا اسكەر جىبەرمەۋگە عانا كەلسىم ايلىپ قايتىستى.

ءۇندى-قىتاي شەكارا جانجالى شەشىلمەي جاتىپ، پاكىستان مەن ءۇندىستان اراسىندا شەكارا قايشىلىعى ءورشىدى. فوتو: Reuters

بەيجىڭ بولسا شەكارا قايشىلىعى ءۇشىن ءۇندىستاندى ايىپتاۋىن توقتاتقان جوق. قىتاي ءسىم باسشىسى ۋاڭ ي 17 قىركۇيەكتەگى مالىمدەمەسىندە «شەكاراداعى جانجالدىڭ باستى جاۋاپكەرشىلىگى ءۇندىستاندا» ەكەنىن، «ءۇندىستان تارابى ءوز قاتەسىن تەز ارادا تۇزەتۋى ءتيىس» دەگەن كوزقاراستارىن بىلدىرگەن.

ءۇندى-قىتاي شەكارا جانجالى باسىلماي جاتىپ، پاكىستان مەن ءۇندىستان اراسىندا شەكارا جانجالى شىقتى. بۇعان قۇراما شتاتتار ارا اعايىندىق جاساپ، كەلىسىمگە شاقىرعانى دا باق-تا ايتىلۋدا. ال، تايۋان ساراپشىلارى پاكىستان مەن ءۇندىستان شەكارا قايشىلىعىنىڭ ءدال وسى كەزدە پايدا بولۋىن بەيجىڭنىڭ ىقپالى دەپ سانايدى. سەبەبى، پاكىستان وڭىردەگى قىتايدىڭ بىردەن ءبىر سەنىمدى سەرىكتەس ەلى سانالادى. ءتىپتى تايۋان ساراپشىلارى قايشىلىق وسىلاي جالعاسا بەرسە 2020 جىلدىڭ قاڭتار ايىنا قاراي تاراپتار اشىق سوعىسقا ءوتۋى دە عاجاپ ەمەس دەپ بولجايدى.

“The Qazaq Times”